ថ្ងៃទី ១៤ ខែមិថុនា សន្និសីទលើកទី ១៩ ស្តីពីក្រុមប្រឹក្សានៃថ្នាក់ដឹកនាំរដ្ឋសមាជិកអង្គការសហប្រតិបត្តិការសៀងហៃបានបើកធ្វើនៅក្រុងBishkek រដ្ឋធានីប្រទេសតាហ្ស៊ីគីស្ថានក្រោមវត្តមានរបស់លោកស៊ី ជីនភីង ប្រធានរដ្ឋចិន លោកNarendra Modi នាយករដ្ឋមន្រ្តីឥណ្ឌា លោកKassym-Jomart Tokayev ប្រធានាធិបតីកាហ្សាក់ស្ថាន លោកSooronbay Zheenbekov ប្រធានាធិបតីកៀហ្ស៊ីស្ថាន លោកImran Khan នាយករដ្ឋមន្រ្តីប៉ាគីស្ថាន លោកPutin ប្រធានាធិបតីរុស្ស៊ី លោកEmomali Rakhmonov ប្រធានាធិបតីតាហ្ស៊ីគីស្ថាន និងលោកShavkat Mirziyoyev ប្រធានាធិបតីអ៊ូបេគីស្ថាន ។
ថ្លែងក្នុងកិច្ចប្រជុំ លោកស៊ី ជីនភីងបានគូសបញ្ជាក់ថា គួរខិតខំស្វែងរកពុទ្ធិពីក្នុងស្មារតីសៀងហៃ និងទទួលបានថាមពលពីក្នុងសាមគ្គីភាពនិងកិច្ចសហប្រតិបត្តិការ ដើម្បីកសាងអង្គការសហប្រតិបត្តិការសៀងហៃឱ្យទៅជាគំរូប្រកបដោយសាមគ្គីភាព មានទំនុកចិត្តលើគ្នា រ៉ាប់រងតួនាទីជាមួយគ្នាទាំងក្នុងកាលៈទេសៈសុខសន្តិភាពនិងមានគ្រោះអាសន្ន ផ្តល់ផលប្រយោជន៍ដល់គ្នានិងឈ្នះ-ឈ្នះ បរិយាប័ន្ន រៀនសូត្របទពិសោធន៍ពីគ្នាទៅវិញទៅមក ប្រកៀកស្មាគ្នាកសាងសហគមន៍រួមវាសនានៃអង្គការសហប្រតិបត្តិការសៀងហៃដែលមានភាពកាន់តែស្អិតល្មួត ។
ថ្នាក់ដឹកនាំនៃរដ្ឋសមាជិកបានចុះហត្ថលេខាលើសេចក្តីប្រកាសBishkek ស្តីពីក្រុមប្រឹក្សា ថ្នាក់ដឹកនាំរដ្ឋសមាជិកអង្គការសហប្រតិបត្តិការសៀងហៃ និងឯកសារសហប្រតិបត្តិការចំនួន ១៣ លើវិស័យព័ត៌មានវិទ្យា ការប្រយុទ្ធប្រឆាំងគ្រឿងញៀន និងកិច្ចសហប្រតិបត្តិការតាមតំបន់មូលដ្ឋានជាដើម ៕