នាពេលថ្មីៗកន្លងទៅនេះ ឥស្សរជនមជ្ឈដ្ឋាននយោបាយនិងពាណិជ្ជកម្មនៃប្រទេសថៃជាច្រើនរូបបាននាំគ្នាកោតសរសើរប្រទេសចិនដែលបានប្រកាន់ខ្ជាប់គោលជំហរយ៉ាងមុតមាំក្នុងការគាំពារសេរីភាពពាណិជ្ជកម្មក្រោមបរិបទបច្ចុប្បន្ន ព្រមទាំងអំពាវនាវឲ្យបណ្តាប្រទេសអាស៊ីនានាចាប់ដៃធ្វើកិច្ចសហប្រតិបតិ្តការ និងផ្តល់ការគាំទ្រទៅវិញទៅមក ដើម្បីរួមគ្នាទប់ទល់នឹងឯកតោភាគីនិយមនិងការគាំពារនិយមផ្នែកពាណិជ្ជកម្មនាពេលបច្ចុប្បន្ន ។
គួររំលឹកថា នាពេលថ្មីៗកន្លងទៅនេះ ពេលថ្លែងសុន្ទរកថាក្នុងកិច្ចប្រជុំផ្លាស់ប្តូរនិងកិច្ចសហប្រតិបតិ្តការសេដ្ឋកិច្ចនិងពាណិជ្ជកម្មរវាងខេត្តក្វាងទុងប្រទេសចិននិងប្រទេសថៃ លោក Somkid Jatusripitak ឧបនាយករដ្ឋមន្ត្រីថៃបានលើកឡើងថា បច្ចុប្បន្ននេះពិភពលោកបានលេចចេញសកម្មភាពប្រឆាំងសកលភាវូបនីយកម្មនិងប្រឆាំងសេរីភាពពាណិជ្ជកម្ម ដូច្នេះ បណ្តាប្រទេសអាស៊ីនានាគួរតែបង្កើនការប្រាស្រ័យទាក់ទងនិងកិច្ចសហប្រតិបតិ្តការ ផ្តល់ការគាំទ្រទៅវិញទៅមក ក្នុងន័យលើកស្ទួយឱ្យសេដ្ឋកិច្ចអាស៊ីមានភាពខ្លាំងក្លាឡើង ។
ពេលផ្តល់បទសម្ភាសន៍ជាមួយអ្នកសារព័ត៌មាន លោក Chutima Dumsuwan អនុរដ្ឋមន្ត្រីក្រសួងពាណិជ្ជកម្មថៃបានកោតសរសើរប្រទេសចិនដែលបានប្រកាន់ខ្ជាប់យ៉ាងមុតមាំនូវគោលជំហរគាំទ្រសេរីភាពពាណិជ្ជកម្ម ព្រមទាំងរំពឹងថា អាស៊ីនឹងសម្រេចបានក្នុងពេលឆាប់ៗនូវការចរចាស្តីពីកិច្ចព្រមព្រៀងទំនាក់ទំនងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ ដើម្បីបង្កើតជាវេទិកាពាណិជ្ជកម្មសេរីដ៏ថ្មីសន្លាងមួយ ៕