យប់ថ្ងៃទី ១២ ខែមិថុនា តាមម៉ោងក្នុងតំបន់ លោក ស៊ី ជីនភីង ប្រធានរដ្ឋចិនបានធ្វើដំណើរទៅដល់ក្រុងប៊ីស្កេក ព្រមទាំងជួបពិភាក្សាជាមួយលោក Zheenbekov ប្រធានាធិបតីសាធារណរដ្ឋកៀហ្ស៉ីស៊ីស្ថាន ។
ក្នុងកិច្ចជំនួប លោក ស៊ី ជីនភីង បានលើកឡើងថា តាំងពីប្រទេសទាំងពីរបានបង្កើតទំនាក់ទំនងការទូតរយៈពេល២៧ ឆ្នាំមក ក្រោមការខិតខំប្រឹងប្រែងរបស់ភាគីទាំងពីរ ទំនាក់ទំនងរវាងចិននិងសាធារណរដ្ឋកៀហ្ស៉ីស៊ីស្ថានទទួលបានការអភិវឌ្ឍគួរឱ្យកត់សម្គាល់ ក្រោមសភាពការណ៍យ៉ាងល្អប្រសើរ ពោលគឺមានទំនុកចិត្តខ្ពស់ផ្នែកនយោបាយនិងមានកិច្ចសហប្រតិបតិ្តការផ្នែកសេដ្ឋកិច្ចដែលផ្តល់ផលប្រយោជន៍ដល់គ្នាទៅវិញទៅមក ។ លោកស៊ី ជីនភីង ក៏បានបង្ហាញពីទឹកចិត្តសប្បាយរីករាយដែលបានឃើញកិច្ចសហប្រតិបតិ្តការរួមគ្នាកសាង “ខ្សែក្រវាត់និងផ្លូវ”របស់ភាគីទាំងពីរបាននិងកំពុងសម្រេចបានជាបណ្តើរនិងមានភាពកាន់តែស៊ីជម្រៅ ។ ប្រទេសចិនរីករាយធ្វើការខិតខំប្រឹងប្រែងជាមួយសាធារណរដ្ឋកៀហ្ស៉ីស៊ីស្ថាន ដើម្បីរួមចំណែកយ៉ាងសកម្មក្នុងការជំរុញការបង្កើតសហគមន៍រួមវាសនាតែមួយរបស់មនុស្សជាតិ ។
ជាការឆ្លើយតប លោក Zheenbekov បានថ្លែងថា ឆ្នាំនេះជាខួបទី៧០នៃការបង្កើតប្រទេសចិនថ្មី សូមជូនពរឱ្យការអភិវឌ្ឍនៃប្រទេសចិនទទួលបានសមិទ្ធផលកាន់តែធំធេង ។ សាធារណរដ្ឋកៀហ្ស៉ីស៊ីស្ថាននឹងប្រកាន់ខ្ជាប់យ៉ាងមុតមាំក្នុងការគាំទ្រវិធានការរបស់ប្រទេសចិនលើវិស័យការគាំពារសនិ្តភាពនិងស្ថិរភាពនៅតំបន់ Xin Jiang និងការបង្ក្រាបសកម្មភាពជ្រុលនិយម ហើយរីករាយរួមសហការជាមួយប្រទេសចិនក្នុងន័យជំរុញឱ្យកិច្ចសហប្រតិបតិ្តការផ្តល់ផលប្រយោជន៍ដល់គ្នាទៅវិញទៅមកលើគ្រប់វិស័យនៃកិច្ចកសាង “ខ្សែក្រវាត់និងផ្លូវ ”មានភាពកាន់តែស៊ីជម្រៅ ដើម្បីជំរុញឱ្យទំនាក់ទំនងរវាងភាគីទាំងពីរទទួលបានការអភិវឌ្ឍប្រកបដោយភាពលោតផ្លោះ ៕