ថ្ងៃទី ៧ ខែមិថុនា តាមម៉ោងតំបន់ លោក ស៊ី ជីនភីង ប្រធានរដ្ឋចិនបានអញ្ជើញចូលរួមសន្និសិទពេញអង្គនៃវេទិកាសេដ្ឋកិច្ចអន្តរជាតិក្រុង St. Petersburg លើកទី ២៣ ព្រមទាំងឡើងថ្លែងសុន្ទរកថាក្រោមចំណងជើង «ប្រកាន់ការអភិវឌ្ឍជានិរន្តរភាព រួមគ្នាកសាងពិភពលោកដ៏រុងរឿងនិងស្រស់ស្អាត» ។
លោកបានថ្លែងថា ប្រធានបទនៃវេទិកាលើកនេះពោលគឺ “ កសាងកម្មវិធីអភិវឌ្ឍន៍ដោយនិរន្តរភាព” គឺសមស្របនឹងការយកចិត្តទុកដាក់រួមគ្នារបស់សហគមន៍អន្តរជាតិនាពេលបច្ចុប្បន្ន ហើយមានសារសំខាន់ក្នុងការអនុវងត្តជាក់ស្តែង។ បច្ចុប្បន្ននេះ ពិភពលោកកំពុងមានការផ្លាស់ប្តូរខ្លំងពុំធ្លាប់មានក្នុងរយៈពេល១រយឆ្នាំកន្លងមកនេះ ហើយការបង្រួមកម្លាំងគ្នា ពិភាក្សាគ្នា សហការគ្នានិងឈ្នះ- ឈ្នះ ជាជម្រើសដ៏ត្រឹមត្រូវសម្រាប់បណ្តាភាគីទាំងអស់។ ការអភិវឌ្ឍជានិរន្តរភាពគឺជាចំណុចសមស្របផ្នែកផលប្រយោជន៍ដ៏ធំបំផុតនិងជាចំណុចនៃកិច្ចសហប្រតិបត្តិការដ៏ល្អបំផុតសម្រាប់បណ្តាភាគីទាំងអស់។ របៀបវារៈអភិវឌ្ឍជានិរន្តរភាពឆ្នាំ ២០៣០ នៃអង្គការសហប្រជាជាតិបានលើកឡើងនូវភារកិច្ចធំៗចំនួនបី ពោលគឺ ជំរុញឱ្យសេដ្ឋកិច្ចមានការកើនឡើង ជំរុញឱ្យសង្គមមានការអភិវឌ្ឍ និងការពារបរិស្ថាន ដែលនេះ បានបង្កើតនូវចក្ខុវិស័យមួយសម្រាប់ការអភិវឌ្ឍនៃសកលលោក។
លោកស៊ីជីនភីង ប្រធានរដ្ឋចិនបានបញ្ជាក់ថា ក្នុងនាមជាប្រទេសកំពុងអភិវឌ្ឍន៍ធំបំផុតនិងមានទំនួលខុសត្រូវលើពិភពលោក ប្រទេសចិនបានប្រកាន់ខ្ជាប់ជានិច្ចនូវការអនុវត្តតាមពាក្យសន្យាស្តីពីការអភិវឌ្ឍប្រកបដោយនិរន្តរភាព ដោយបានយកចិត្តទុកដាក់ខ្ពស់ចំពោះការបង្កើនកិច្ចសហប្រតិបត្តិការអន្តរជាតិសម្រាប់ការអភិវឌ្ឍប្រកបដោយនិរន្តរភាព ។ គំនិតផ្តួចផ្តើមស្តីពីការរួមគ្នាកសាង “ខ្សែក្រវាត់និងផ្លូវ” ដែលបានលើកឡើងកាលពីឆ្នាំ ២០១៣ គឺក្នុងគោលបំណងផ្តល់ផលប្រយោជន៍ដល់គ្នាទៅវិញទៅមកនិងឈ្នះ-ឈ្នះ ក៏ដូចជាធ្វើឱ្យបណ្តាប្រទេសនានាទទួលបានការអភិវឌ្ឍរួម ។ វេទិកាកំពូលសម្រាប់កិច្ចសហប្រតិបត្តិការអន្តរជាតិស្តីពី “ខ្សែក្រវាត់និងផ្លូវ “លើកទី ២ បានប្រារព្ធឡើងដោយជោគជ័យនៅក្រុងប៉េកាំងកាលពីខែមេសា ឆ្នាំ២០១៩នេះ ។ ភាគីនានាដែលបានចូលរួមបានឯកភាពគ្នាថានឹងជំរុញការរួមគ្នាកសាង “ខ្សែក្រវាត់និងផ្លូវ ”ប្រកបដោយគុណភាពខ្ពស់ ព្រមទាំងនឹងធ្វើការតភ្ជាប់គ្នាប្រកបដោយប្រសិទ្ធភាពរវាងការរួមគ្នាកសាង “ខ្សែក្រវាត់និងផ្លូវ ” និងការអនុវត្តតាមរបៀបវារៈនៃការអភិវឌ្ឍប្រកបដោយនិរន្តរភាពឆ្នាំ ២០៣០ នៃអង្គការសហប្រជាជាតិ ដើម្បីដើរតាមផ្លូវអភិវឌ្ឍន៍បៃតងប្រកបដោយនិរន្តរភាពដែលបញ្ចេញកាបូនទាប ។
លោកបានបន្តទៀតថា ការធ្វើកិច្ចសហប្រតិបត្តិការអន្តរជាតិមិនអាចខ្វះដៃគូដែលស្មោះត្រង់ ជឿទុកចិត្តគ្នានិងមានគោលដៅដូចគ្នានោះទេ ប្រទេសរុស្ស៊ីគឺជាដៃគូសហប្រតិបត្តិការអាទិភាពដ៏សំខាន់មួយក្នុងកិច្ចសហប្រតិបត្តិការគ្រប់វិស័យ ។ ភាគីទាំងពីរប្រកាន់ខ្ជាប់ទស្សនៈវិស័យអភិវឌ្ឍប្រកបដោយនិរន្តរភាព ធ្វើកិច្ចសហប្រតិបត្តិការជាវិជ្ជមានក្នុងវិស័យថាមពលស្អាត ការច្នៃប្រឌិតថ្មីនូវវិទ្យាសាស្ត្រនិងបច្ចេកវិទ្យា សេដ្ឋកិច្ចឌីជីថល ពាណិជ្ជកម្មតាមអ៊ីនធើណេតជាដើម ។ ភាគីចិននិងរុស្ស៊ីបានឈានដល់មតិឯកភាពគ្នាស្តីពីការរួមគ្នាកសាងគំនិតផ្តួចផ្តើមខ្សែក្រវាត់និងផ្លូវនិងការតភ្ជាប់ជាមួយសហភាពសេដ្ឋកិច្ចអឺរ៉ុបនិងអាស៊ី ដែលនឹងជំរុញការធ្វើសមាហរណកម្មសេដ្ឋកិច្ចក្នុងតំបន់យ៉ាងខ្លាំង និងមានផលប្រយោជន៍ដល់ការសម្រេចបានការអភិវឌ្ឍប្រកបដោយនិរន្តរភាពជាមួយគ្នា ។
លោក ស៊ី ជីនភីង បាននិយាយថា ភាគីចិនមានឆន្ទៈបន្តរួមសហការជាមួយសហគមន៍អន្តរជាតិ ដើម្បីត្រួសត្រាយផ្លូវអភិវឌ្ឍន៍ប្រកបដោយនិរន្តរភាពថ្មីមួយ ។ ត្រូវតែប្រកាន់ខ្ជាប់ការរួមគ្នាពិគ្រោះពិភាក្សា កសាងនិងចែករំលែក សហការគ្នាបង្កើតសេដ្ឋកិច្ចពិភពលោកដែលបើកទូលាយនិងពិពិធកម្ម ត្រូវតែប្រកាន់ខ្ជាប់ការចាត់ទុកមនុស្សជាមូលដ្ឋាន ខិតខំកសាងសង្គមដែលមានសុភមង្គលដែលផ្តល់ផលប្រយោជន៍ជាទូទៅនិងបរិយាប័ន្ន ត្រូវតែប្រកាន់ខ្ជាប់ការអភិវឌ្ឍបៃតង ខិតខំកសាងផ្ទះស្រស់ស្អាតដែលមានភាពសុខដុមរមនារវាងមនុស្សនិងធម្មជាតិ ។
លោកបានចង្អុលបង្ហាញថា ប្រទេសចិននឹងបន្តបើកទូលាយទៅកាន់អន្តរជាតិឥតឈប់ឈរ ក៏ដូចជាប្តេជ្ញាចិត្តក្នុងការដោះស្រាយបញ្ហាអតុល្យភាពនិងវិសមភាពនៅក្នុងការអភិវឌ្ឍសេដ្ឋកិច្ចពិភពលោកដើម្បីបង្កើតឱកាសកាន់តែច្រើនសម្រាប់បណ្តាប្រទេសកំពុងអភិវឌ្ឍន៍។ប្រទេសចិនមានឆន្ទៈក្នុងការចែករំលែកនូវសមិទ្ធផលសិក្សាស្រាវជ្រាវផែ្នកវិទ្យាសាស្រ្តចុងក្រោយបំផុត រួមទាំង បច្ចេកវិទ្យា 5G ជាមួយបណ្តាប្រទេសនានា ហើយមានបំណងពង្រឹងការផ្លាស់ប្តូរនិងកិច្ចសហប្រតិបត្តិការនិងរៀនសូត្រពីគ្នាទៅវិញទៅមកជាមួយបណ្តាប្រទេសដទៃទៀតលើបញ្ហា ដូចជា ការកាត់បន្ថយភាពក្រីក្រនិងការធានាសង្គមជាដើម។ការអភិវឌ្ឍរបស់ប្រទេសចិនដាច់ខាតមិនបោះបង់ចោលបរិស្ថាននោះទេ ហើយនឹងអនុវត្តឱ្យបានល្អតាមគំនិតឯកភាពគ្នារបស់សហគមន៍អន្តរជាតិ ដូចជា <កិច្ចព្រមព្រៀងក្រុងប៉ារីស>ស្តីពីបម្រែបម្រួលអាកាសធាតុជាដើម។
លោក ស៊ី ជីនភីងបានថ្លែងថា ការអភិវឌ្ឍជានិរន្តរភាព គឺជា "គន្លឹះមាស"សម្រាប់ដោះស្រាយបញ្ហាសកលនាពេលបច្ចុប្បន្ននេះ។វាមានគោលដៅប្រហាក់ប្រហែលគ្នានិងមានគំនិតដូចគ្នាជាមួយការកសាងសហគមន៍រួមវាសនានៃមនុស្សជាតិ ដែលនឹងផ្តល់ផលប្រយោជន៍ដល់មនុស្សជាតិទាំងអស់និងពិភពលោកទាំងមូល។ប្រទេសចិនមានឆន្ទៈបន្តប្រកាន់ខ្ជាប់នូវទស្សនៈនៃការអភិវឌ្ឍជានិរន្តរភាពជាមួយគ្រប់ភាគីទាំងអស់ ក៏ដូចជាឆ្លុះបញ្ចាំងពីទំនួលខុសត្រូវនៃសហគមន៍រួមវាសនានៃមនុស្សជាតិ ផ្តួចផ្តើមពហុភាគីនិយមនិងកែលម្អនូវអភិបាលកិច្ចសកលដើម្បីរួមគ្នាលើកកម្ពស់សន្តិភាព សុខសាន្តត្រាណដ៏យូរអង្វែងនៃភូមិផែនទី ក៏ដូចជារួមគ្នាបង្កើតពិភពលោកមួយកាន់តែមានភាពរុងរឿងថ្កុំថ្កើងនិងភាពស្រស់ស្អាត។
សូមបញ្ជាក់ថា វេទិកានេះនឹងធ្វើឡើងរយៈពេល ៣ ថ្ងៃ ក្រោមប្រធានបទ “កសាងកម្មវិធីអភិវឌ្ឍន៍ដោយនិរន្តរភាព” ហើយភ្ញៀវកិត្តិយសចំនួនជាង ១៥០០០ នាក់ដែលមកពីប្រទេសចំនួនជាង ៧០ បានចូលរួម៕
វេទិកានេះនឹងធ្វើឡើងរយៈពេល ៣ ថ្ងៃ ក្រោមប្រធានបទ “កសាងកម្មវិធីអភិវឌ្ឍន៍ដោយនិរន្តរភាព” ហើយភ្ញៀវកិត្តិយសចំនួនជាង ១៥០០០ នាក់ដែលមកពីប្រទេសចំនួនជាង ៧០ បានចូលរួម។ ក្រោមបរិបទនៃខួបលើកទី ៧០ នៃការបង្កើតទំនាក់ទំនងការទូតរវាងចិននិងរុស្ស៊ី ក៏ដូចជាការតភ្ជាប់គំនិតផ្តួចផ្តើម “ខ្សែក្រវាត់និងផ្លូវ” ជាមួយនឹងសហភាពសេដ្ឋកិច្ចអឺរ៉ុប-អាស៊ី កិច្ចសហប្រតិបត្តិការរវាងចិននិងរុស្ស៊ីគឺជាខ្លឹមសារដ៏សំខាន់សម្រាប់វេទិកាលើកនេះ។
