យប់ថ្ងៃទី៦ខែមិថុនា ក្រោមការអមដំណើររបស់លោកភូទីន ប្រធានាធិបតីរុស្ស៊ី លោកស៊ីជីនភីងបានអញ្ជើញចូលរួមពិធីទទួលសញ្ញាបត្របណ្ឌិតកិត្តិយសនៃសកលវិទ្យាល័យជាតិ Saint-Petersburg ។
កាលពីខែមេសាឆ្នាំ២០១៩នេះ សកលវិទ្យាល័យ Tsinghua បានផ្តល់សញ្ញាបត្របណ្ឌិតកិត្តិយសដល់លោកភូទីន ហើយលោកស៊ីជីនភីងបានអមដំណើរលោកភូទីនចូលរួមពិធីផ្តល់សញ្ញាបត្រដែលធ្វើឡើងនៅក្រុងប៉េកាំងផងដែរ ។ សកលវិទ្យាល័យ Tsinghua និងសកលវិទ្យាល័យជាតិ Saint-Petersburg ជាគ្រឹះស្ថានឧត្តមសិក្សាដ៏ល្បីឈ្មោះរបស់ចិននិងរុស្ស៊ី ហើយក៏ជាសកលវិទ្យាល័យដែលលោកស៊ីជីនភីងនិងលោកភូទីនធា្លប់រៀនសូត្រផងដែរ ។
ក្នុងសុន្ទរកថាកាលពីថ្ងៃទី៦ខែមិថុនា លោកស៊ីជីនភីងបានថ្លែងថា សកលវិទ្យាល័យទាំងពីរនេះបានផ្តល់សញ្ញាបត្របណ្ឌិតកិត្តិយសដល់ប្រមុខរដ្ឋនៃប្រទេសទាំងពីរ គឺជាគំរូនៃការផ្លាស់ប្តូរយ៉ាងជិតស្និទ្ធក្នុងវិស័យអប់រំនិងវប្បធម៌មនុស្សសាស្ត្ររវាងភាគីទាំងពីរ ហើយក៏ជាការបង្ហាញដ៏សំខាន់នូវទំនាក់ទំនងកម្រិតខ្ពស់រវាងចិននិងរុស្ស៊ីផងដែរ ។ លោកសង្ឃឹមថា ភាគីទាំងពីរនឹងបង្កើនការផ្លាស់ប្តូរនិងកិច្ចសហប្រតិបត្តិការឥតឈប់ឈរ ដើម្បីបណ្តុះបណ្តាលធនធានមនុស្សដ៏ឆ្នើមកាន់តែច្រើនឡើងៗសម្រាប់ការកសាងនិងការអភិវឌ្ឍរបស់ប្រទេសទាំងពីរ ។
គិតមកដល់បច្ចុប្បន្ននេះ សកលវិទ្យាល័យជាតិរុស្ស៊ី Saint-Petersburg មានប្រវត្តិសាស្ត្រជិត៣០០ឆ្នាំមកហើយ ។ សាលានេះបានបង្កើតមនុស្សដ៏ល្បីឈ្មោះជាច្រើន ដូចជាលោក Dmitri Mendeleev អ្នករកឃើញវដ្តនៃសារធាតុគីមី និងលោក Ivan Pavlov អ្នកផ្តើមទ្រឹស្តីសកម្មភាពសរសៃប្រសាទកម្រិតខ្ពស់ជាដើម ។
