លោកXuLinអនុរដ្ឋមន្រ្តីក្រសួងឃោសនាការនៃគណៈកម្មាធិការមជ្ឈិមបក្សកុម្មុយនិស្តចិននិងជាប្រធាននៃការិយាល័យព័ត៌មានក្រុមប្រឹក្សាកិច្ចការរដ្ឋចិនបានប្រកាសក្នុងសន្និសីទព័ត៌មានដែលធ្វើឡើងដោយការិយាល័យព័ត៌មាននៃក្រុមប្រឹក្សាកិច្ចការរដ្ឋចិននាថ្ងៃទី៩ខែឧសភាថា កិច្ចប្រជុំសន្ទនាស្តីពីអរិយធម៌អាស៊ីនឹងប្រារព្ធធ្វើនៅក្រុងប៉េកាំងនាថ្ងៃទី១៥ខែឧសភាយ៉ាងឱឡារិក។លោកស៊ីជីនភីងប្រធានរដ្ឋចិននឹងអញ្ជើញចូលរួមពិធីសម្ពោធបើក ដោយថ្លែងសុន្ទរកថាសំខាន់និងចូលរួមសកម្មភាពមានពាក់ព័ន្ធ។ប្រមុខរដ្ឋនិងប្រមុខរដ្ឋាភិបាលនៃប្រទេសកម្ពុជា ក្រិក សិង្ហបុរី ស្រីលង្កានិងអាមេនី ថ្នាក់ដឹកនាំនៃប្រទេសម៉ុហ្គោលី និងអ្នកទទួលខុសត្រូវនៃអង្គការអន្តរជាតិដូចជាអង្គការយូណេស្កូជាដើមនឹងអញ្ជើញចូលរួមកិច្ចប្រជុំលើកនេះ។តំណាងនៃប្រទេសអាស៊ីចំនួន៤៧និងតំណាងនៃប្រទេសក្រៅពីអាស៊ីនឹងចូលរួមសកម្មភាពមានពាក់ព័ន្ធ។
កិច្ចប្រជុំសន្ទនាស្តីពីអរិយធម៌អាស៊ីជាសកម្មភាពការទូតដ៏សំខាន់មួយទៀតដែលប្រទេសចិនរៀបចំធ្វើឡើងក្នុងឆ្នាំនេះ បន្ទាប់ពីវេទិកាកំពូលលើកទី២សម្រាប់កិច្ចសហប្រតិបត្តិការអន្តរជាតិស្តីពីខ្សែក្រវាត់និងផ្លូវនិងពិព័រណ៍សាកវប្បកម្មពិភពលោកក្រុងប៉េកាំង ដែលជាព្រឹត្តិការអន្តរជាតិដ៏សំខាន់ប្រកបដោយអត្ថន័យ។ប្រធានបទនៃកិច្ចប្រជុំលើកនេះគឺការផ្លាស់ប្តូរនិងរៀនសូត្រពីគ្នាអំពីអរិយធម៌អាស៊ីនិងសហគមន៍វាសនារួមគ្នា របៀបវារៈនៃកិច្ចប្រជុំលើកនេះរួមមាន ពិធីលៀងសាយភោជន ពិធីសម្ពោធបើក អនុវេទិកា ពិធីក្បួនដង្ហែសម្រាប់ព្រឹត្តិការណ៍វប្បធម៌អាស៊ីនិងសប្តាហ៍អរិយធម៌អាស៊ីជាដើម។