វេទិកាកំពូលស្តីពីកិច្ចសហប្រតិបត្តិការអន្តរជាតិ"ខ្សែក្រវាត់មួយនិងផ្លូវមួយ"លើកទី ២បានបិទបញ្ចប់នៅក្រុងប៉េកាំងកាលពីថ្ងៃទី ២៧ ខែមេសា។លោក ស៊ីជីនភីង ប្រធានរដ្ឋចិនបានធ្វើសន្និសីទសារព័ត៌មានមួយបន្ទាប់ពីកិច្ចប្រជុំនេះ និងបានប្រកាសថា កិច្ចប្រជុំកំពូលតុមូលនៃវេទិកានេះបានសម្រេចចេញផ្សាយសេចក្តីប្រកាសរួមមួយ។ក្នុងដំណើរការត្រៀមរៀបចំនិងអំឡុងពេលរៀបចំវេទិកានេះ ភាគីនានាបានឈានដល់លទ្ធផលជាក់ស្តែងសរុប ចំនួន ២៨៣ ។
លោក ស៊ីជីនភីង បានបង្ហាញថា នៅឯកិច្ចប្រជុំកំពូលតុមូលនាថ្ងៃដដែល ភាគីនានាបានឈានដល់គំនិតឯកភាពគ្នាយ៉ាងទូលំទូលាយស្តីពីការរួមគ្នាកសាងគំនិតផ្តួចផ្តើម"ខ្សែក្រវាត់មួយនិងផ្លូវមួយ"ដែលមានគុណភាពខ្ពស់។មហាសន្និបាតសហគ្រិនដែលបានរៀបចំធ្វើឡើងក្នុងអំឡុងពេលវេទិកានេះបានចុះហត្ថលេខាលើកិច្ចព្រមព្រៀងស្តីពីកិច្ចសហប្រតិបត្តិការគម្រោងសរុបចំនួន ជាង ៦៤ ពាន់លានដុល្លារអាមេរិក។
លោក ស៊ីជីនភីង បានថែ្លងថា គំនិតផ្តួចផ្តើមស្តីពីការរួមគ្នាកសាង"ខ្សែក្រវាត់មួយនិងផ្លូវមួយ"មានប្រភពពីប្រទេសចិន ហើយឱកាសនិងសមិទ្ធផលជារបស់ពិភពលោក។ប្រទេសចិនមានឆន្ទៈរួមសហការជាមួយគ្រប់ភាគីទាំងអស់ដើម្បីអនុវត្តឲ្យបានល្អនូវគំនិតឯកភាពគ្នាគ្រប់ប្រការនៃវេទិកាកំពូលនេះក្នុងន័យ រួមគ្នាជំរុញការរួមគ្នាកសាងគំនិតផ្តួចផ្តើម"ខ្សែក្រវាត់មួយនិងផ្លូវមួយ"មានភាពស៊ីជម្រៅនិងមានភាពជាក់ស្តែងនិងបង្កើតអនាគតកាន់តែល្អបវរ៕