នៅក្នុងពិធីសម្ពោធបើកនៃវេទិកាកំពូលស្តីពីកិច្ចសហប្រតិបត្តិការអន្តរជាតិ"ខ្សែក្រវាត់មួយនិងផ្លូវមួយ"លើកទី ២ ដែលត្រូវបានប្រារព្ធឡើងកាលពីថ្ងៃទី ២៦ ខែមេសា មេដឹកនាំពហុជាតិនិងលោក Antonio Guterres អគ្គលេខាធិការអង្គការសហប្រជាជាតិបានវាយតម្លៃខ្ពស់ចំពោះសមិទ្ធផលសំខាន់ៗនៃការកសាងគំនិតផ្តួចផ្តើម"ខ្សែក្រវាត់មួយនិងផ្លូវមួយ"ក្នុងរយៈពេល ៥ ឆ្នាំកន្លងមក ហើយបានកត់សម្គាល់ជាឯកច្ឆ័ន្ទថា បណ្តាប្រទេសនានាគួរតែពួតដៃជាមួយគ្នាដើម្បីជំរុញការរួមគ្នាកសាងគំនិតផ្តួចផ្តើម"ខ្សែក្រវាត់មួយនិងផ្លូវមួយ"ឲ្យបន្តឆ្ពោះទៅរកការអភិវឌ្ឍដែលមានគុណភាពខ្ពស់។
លោក ភូទីន ប្រធានាធិបតីរុស្ស៊ីបានថែ្លងនៅក្នុងសុន្ទរកថាថា គំនិតផ្តួចផ្តើម"ខ្សែក្រវាត់មួយនិងផ្លូវមួយ"ឆ្លើយតបនឹងកិច្ចខិតខំប្រឹងប្រែងរបស់រុស្ស៊ីក្នុងការបង្កើត"ទំនាក់ទំនងភាពជាដៃគូរវាងអឺរ៉ុបនិងអាស៊ី" ហើយអំណោយផលដល់ការជំរុញការសម្រេចបាននូវការអភិវឌ្ឍប្រកបដោយសុខដុមនិងជានិរន្តភាពនៅក្នុងមហាដីគោកអឺរ៉ុបនិងអាស៊ី។
លោក Sebastián Piñera ប្រធានាធិបតីឈីលីបានថែ្លងថា គំនិតផ្តួចផ្តើម"ខ្សែក្រវាត់មួយនិងផ្លូវមួយ"ផ្តល់នូវវេទិកាល្អប្រសើរមួយ ហើយអំណោយផលដល់ភាគីនានាក្នុងការជំរុញពាណិជ្ជកម្មសេរីនិងធានារក្សាពហុភាគីនិយមតាមរយៈកិច្ចសហប្រតិបត្តិការ ហើយបន្តជំរុញកំណើនសេដ្ឋកិច្ចនៃបណ្តាប្រទេសនានានិងលើកកម្ពស់សុខុមាលភាពរបស់ប្រជាជន។
លោក Mahathir Bin Mohamad នាយករដ្ឋមន្ត្រីម៉ាឡេស៊ីបានថែ្លងថា "ខ្ញុំគាំទ្រយ៉ាងពេញទំហឹងចំពោះគំនិតផ្តួចផ្តើម"ខ្សែក្រវាត់មួយនិងផ្លូវមួយ" ហើយជឿជាក់ថា ប្រទេសម៉ាឡេស៊ីនឹងទទួលបានផលប្រយោជន៍ក្នុងនេះ"។
