លោក ស៊ីជីនភីង ប្រធានរដ្ឋចិនបានអញ្ជើញចូលរួមពិធីសម្ពោធបើកនៃវេទិកាកំពូលស្តីពីកិច្ចសហប្រតិបត្តិការអន្តរជាតិ"ខ្សែក្រវាត់មួយនិងផ្លូវមួយ"លើកទី ២ នៅមជ្ឈមណ្ឌូលសន្និសីទជាតិទីក្រុងប៉កាំងកាលពីថៃ្ងទី ២៦ ខែមេសា ព្រមទាំងបានថ្លែងសុន្ទរកថាដ៏សំខាន់។ សហគមន៍អន្តរជាតិបានវាយតម្លៃយ៉ាងសកម្មនិងកក់ក្តៅទៅលើខ្លឹមសារនៃសុន្ទកថារបស់លោក ស៊ី ជីនភីង ដោយបានយល់ឃើញថា សុន្ទរកថាបានប្រកាសនូវសេចក្តីសម្រេចចិត្តដ៏ម៉ឺងម៉ាត់និងវិធានការជាក់ស្តែងនៃការធ្វើកំណែទម្រង់និងការបើកទូលាយឲ្យកាន់តែស៊ីជម្រៅរបស់ប្រទេសចិនក្នុងយុគ្គសម័យថ្មី។
លោក Do Tien Sam អ្នកសិក្សាស្រាវជ្រាវនៃបណ្ឌិតសភាវិទ្យាសាស្ត្រសង្គមវៀតណាមបាននិយាយថា មានប្រទេសនិងអង្គការអន្តរជាតិចំនួនជាង ១៥០ បានចុះហត្ថលេខាលើកិច្ចព្រមព្រៀងអំពីការរួមគ្នាកសាងគំនិតផ្តួចផ្តើម"ខ្សែក្រវាត់មួយផ្លូវមួយ" ជាមួយប្រទេសចិន នេះមិនគ្រាន់តែបានបង្កើតឱកាសការងាររដ៏ច្រើនសន្ធឹក ជំរុញដល់ការកសាងហេដ្ឋារចនាសម្ព័ន្ធតែប៉ុណ្ណោះទេ ក៏បានជួយដល់ការបង្កើនការស្វែងយល់គ្នានិងការជឿទុកចិត្តគ្នាសម្រាប់បណ្តាភាគីផង ដើម្បីបង្កើនកិច្ចសហប្រតិបត្តិការអន្តរជាតិក្នុងបញ្ហាពិភពលោកដូចជាការឆ្លើយតបនឹងការប្រែប្រួលនៃធាតុអាកាស ការកាត់បន្ថយភាពក្រីក្រជាដើម។
លោក Charles Onunaiju ប្រធានមជ្ឈមណ្ឌូលសិក្សាស្រាវជ្រាវប្រទេសចិនរបស់ប្រទេសនីហ្សេរីយ៉ាបានសរសើរថា ប្រទេសចិនមិនគ្រាន់តែមានជំនឿទុកចិត្តលើការអភិវឌ្ឍនាពេលអនាគតរបស់ផ្ទាល់ខ្លួនតែប៉ុណ្នោះទេ ចិនកាន់តែមានជំនឿថា តាមរយៈការទាក់ទងជាមួយសកលលោក ខ្លួនឯងនឹងផ្តល់វិភាគទានដល់សន្តិភាព ស្ថិរភាព និងវិវឌ្ឍនភាពនៃសកលលោក។
លោក Sayeed Chowdhury ប្រធានគណៈកម្មាធិការកិច្ចការអន្តរជាតិក្រុងអ៊ីស្លាម៉ាបាដប្រទេសប៉ាគីស្ថានបានមានប្រសាសថា លោកជឿជាក់ថា វិធានការពង្រីកធ្វើកំណែទម្រង់និងការបើកទូលាយមួយចំនួនរបស់ប្រទេសចិននឹងជះឥទ្ធិពលយ៉ាងស៊ីជម្រៅនិងយូរអង្វែងដល់ការអភិវឌ្ឍនៃទូទាំងពិភពលោក៕