ព្រឹកថ្ងៃទី ២៧ ខែមេសា វេទិកាកំពូលស្តីពីកិច្ចសហប្រតិបត្តិការអន្តរជាតិខ្សែក្រវាត់មួយនិងផ្លូវមួយលើកទី ២ បានប្រារព្ធធ្វើសន្និសីទកំពូលតុមូលនៅមជ្ឈមណ្ឌលសន្និសីទអន្តរជាតិYanqihuក្រុងប៉េកាំង មេដឹកនាំបរទេសនិងអ្នកទទួលខុសត្រូវនៃអង្គការសហប្រជាជាតិនិងអង្គការមូលនិធិរូបិយវត្ថុអន្តរជាតិចំនួន ៣៧ នាក់បានអញ្ជើញចូលរួមសន្និសីទកំពូលតុមូល ។ លោកស៊ីជីនភីង ប្រធានរដ្ឋចិនបានធ្វើជាអធិបតីសន្និសីទកំពូលព្រមទាំងថ្លែងសុន្ទរកថាក្រោមប្រធានបទស្តីពីការរួមគ្នាកសាងខ្សែក្រវាត់មួយនិងផ្លូវមួយប្រកបដោយគុណភាពខ្ពស់ ។
លោកស៊ីជីនភីងបានថ្លែងថា យើងរៀបចំធ្វើវេទិកាកំពូលម្តងទៀត គឺរំពឹងទុករួមជាមួយបណ្តាភាគីនានា ធ្វើឲ្យការរួមគ្នាកសាងខ្សែក្រវាត់មួយនិងផ្លូវមួយមានភាពស៊ីជម្រៅនិងមានភាពជាក់ស្តែង ដើម្បីផ្តល់ផលប្រយោជន៍កាន់តែច្រើនដល់ប្រជាជននៃបណ្តាប្រទេសនានា ។ ទី ១ យើងរង់ចាំរួមជាមួយភាគីនានាធ្វើឲ្យទស្សនៈស្តីពីកិច្ចសហប្រតិបត្តិការមានភាពពេញលេញ ផ្តោតសំខាន់ទៅលើការរួមគ្នាកសាងខ្សែក្រវាត់មួយនិងផ្លូវមួយប្រកបដោយគុណភាពខ្ពស់ ។ ទី ២ យើងរង់ចាំរួមជាមួយភាគីនានាបញ្ជាក់ច្បាស់នូវចំណុចសំខាន់នៃកិច្ចសហប្រតិបត្តិការ និងខិតខំប្រឹងប្រែងបង្កើនការតភ្ជាប់គ្នាដោយគ្រប់ជ្រុងជ្រោយ ។ ទី ៣ យើងរង់ចាំរួមជាមួយភាគីនានាពង្រឹងយន្តការសហប្រតិបត្តិការ ខិតខំបង្កើតទំនាក់ទំនងភាពជាដៃគូដែលតភ្ជាប់គ្នា ។
លោកស៊ីជីនភីងថ្លែងថា លោកជឿជាក់ថានៅក្រោមការខិតខំរួមគ្នានៃភាគីទាំងអស់ សន្និសីទតុមូលមុខជានឹងប្រមូលផ្តុំមតិឯកភាពគ្នាកាន់តែច្រើន និងទទួលបានសមិទ្ធផលកាន់តែច្រើន ជំរុញកិច្ចសហប្រតិបត្តិការអន្តរជាតិនៃការរួមគ្នាកសាងខ្សែក្រវាត់មួយនិងផ្លូវមួយបង្កើតផលប្រយោជន៍កាន់តែច្រើនដល់ប្រជាជននៃបណ្តាប្រទេសនានា ហើយរួចំណែកកាន់តែធំធេងក្នុងការកសាងសហគមន៍រួមវាសនានៃមនុស្សជាតិ ៕
