ថ្ងៃទី២៥ខែមេសា អនុវេទិកាស្តីពីការតភ្ជាប់ហេដ្ឋារចនាសម្ព័ន្ធនៃវេទិកាកំពូលស្តីពីកិច្ចសហប្រតិបត្តិការអន្តរជាតិ“ខ្សែក្រវាត់មួយនិងផ្លូវមួយ ”លើកទីពីរបានធ្វើឡើងនៅក្រុងប៉េកាំង ។ មានភ្ញៀវកិត្តិយសជាតិនិងអន្តរជាតិជិត២០០រូបដែលរួមមានអ្នកនយោបាយសំខាន់ៗ មន្ត្រីថ្នាក់រដ្ឋមន្ត្រី និងអ្នកទទួលខុសត្រូវនៃអង្គការអន្តរជាតិជាង៥០នាក់ដែលមកពីទ្វីបអាស៊ី អាហ្វ្រិក អឺរ៉ុប អាមេរិកឡាទីននិងអូសេអានីជាដើមបានអញ្ជើញចូលរួមអនុវេទិកានេះ ។
លោក Li Xiaopeng រដ្ឋមន្ត្រីក្រសួងគមនាគមន៍និងដឹកជញ្ជូននៃប្រទេសចិនបានថ្លែងសុន្ទរកថាថា ចាប់តាំងពីលោកប្រធានរដ្ឋចិនស៊ីជីនភីងលើកឡើងគំនិតផ្តួចផ្តើមស្តីពី“ខ្សែក្រវាត់មួយនិងផ្លូវមួយ ”រយៈពេល៦ឆ្នាំកន្លងទៅនេះ កម្រិតតភ្ជាប់ហេដ្ឋារចនាសម្ព័ន្ធកាន់តែជ្រៅជ្រះ ដែលនាំមកឱកាសអភិវឌ្ឍន៍កាន់តែច្រើនដល់បណ្តាប្រទេសនានា ។ លោកអំពាវនាវភាគីនានារួមគ្នាពុះពារឧបសគ្គ ផ្តល់ភាពងាយស្រួលដល់ការអភិវឌ្ឍសេដ្ឋកិច្ច ការចល័តទំនិញនិងការប្រាស្រ័យទាក់ទងគ្នារវាងបុគ្គលិករបស់បណ្តាប្រទេសនានា ដើម្បីធ្វើឲ្យប្រជាជនកាន់តែច្រើនចែករំលែកនូវសមិទ្ធផលនៃកិច្ចកសាង“ខ្សែក្រវាត់មួយនិងផ្លូវមួយ ” ។
ភ្ញៀវចូលរួមអនុវេទិកានេះបានវាយតម្លៃវិជ្ជមានចំពោះស្នាដៃជាក់លាក់នៃការតភ្ជាប់“ខ្សែក្រវាត់មួយនិងផ្លូវមួយ ” ហើយឈានដល់មតិឯកភាពគ្នាអំពីការបង្កើនល្បឿនតភ្ជាប់ហេដ្ឋារចនាសម្ព័ន្ធថែមមួយកម្រិតទៀតផងដែរ ។