នៅឆ្នាំ២០១៣ លោកស៊ីជីនភីង មេដឹកនាំកំពូលរបស់ប្រទេសចិនបានលើកឡើងនូវគំនិតផ្តួចផ្តើមស្តីពីខ្សែក្រវាត់មួយនិងផ្លូវមួយ ។ ក្នុងរយៈពេលជិត៦ឆ្នាំកន្លងទៅនេះ គំនិតផ្តួចផ្តើមស្តីពីខ្សែក្រវាត់មួយនិងផ្លូវមួយបានប្រែពីគោលបំណងទៅជាការពិតជាក់ស្តែង មានប្រទេសចំនួន១២៦និងអង្គការអន្តរជាតិចំនួន២៩បានចុះហត្ថលេខាលើឯកសារកិច្ចសហប្រតិបត្តិការនៃខ្សែក្រវាត់មួយនិងផ្លូវមួយជាមួយភាគីចិន មិត្តភក្តិរបស់ប្រទេសចិនបានគ្របដណ្តប់ទ្វីបអាស៊ី អាហ្វ្រិក អឺរ៉ុប អូសេអានីនិងអាមេរិកឡាទីន ។
ជាង២១០០ឆ្នាំមុន លោក Zhangqian នៃរជ្ជកាលហាន់ប្រទេសចិនបានរ៉ាប់រងបេសកកម្មសន្តិភាពនិងមេត្រីភាព ទៅទស្សនាអាស៊ីកណ្តាលពីរលើក ដែលបើកទ្វារទំនាក់ទំនងមេត្រីភាពរវាងប្រទេសចិននិងប្រទេសអាស៊ីកណ្តាលនានា ព្រមទាំងផ្លូវសូត្រមួយដែលឆ្លងកាត់ពីទិសខាងកើតទៅខាងលិចនិងតភ្ជាប់ទ្វីបអឺរ៉ុបនិងអាស៊ី ។
កាលពីខែកញ្ញា ឆ្នាំ ២០១៣ កន្លងមក លោក ស៊ីជីនភីង ប្រធានរដ្ឋចិនបានលើកឡើងជាដំបូងនូវគំនិតនៃ"ខ្សែក្រវាត់សេដ្ឋកិច្ចតាមផ្លូវសូត្រ"នៅក្នុងប្រទេសកាហ្សាក់ស្ថាន។លោក ស៊ីជីនភីង បានចង្អុលបង្ហាញថា "ដរាបណាប្រកាន់ខ្ជាប់នូវសាមគ្គីភាពគ្នានិងការជឿទុកចិត្តគ្នាទៅវិញទៅមក សមភាពនិងការផ្តល់ផលប្រយោជន៍ដល់គ្នាទៅវិញទៅមក បរិប័ន្ននិងការរៀនសូត្រពីគ្នាទៅវិញទៅមក កិច្ចសហប្រតិបត្តិការនិងឈ្នះ-ឈ្នះ បណ្តាប្រទេសដែលមានពូជសាសន៍ ជំនឿនិងវប្បធម៌ខុសគ្នាអាចចែករំលែកនូវសន្តិភាពនិងការអភិវឌ្ឍរួមគ្នា។គ្រប់ភាគីពាក់ព័ន្ធទាំងអស់អាចប្រើរូបមន្តកិច្ចសហប្រតិបត្តិការប្រកបដោយភាពច្នៃប្រឌិតថ្មីដើម្បីកសាង"ខ្សែក្រវាត់សេដ្ឋកិច្ចតាមផ្លូវសូត្រ"ជាមួយគ្នា។
កាលពីខែតុលា ឆ្នាំដដែលនោះ លោក ស៊ីជីនភីង បានលើកឡើងបន្ថែមទៀតនូវគំនិតនៃផ្លូវសូត្រលើសមុទ្រសតវត្សទី ២១ នៅក្នុងប្រទេសឥណ្ឌូណេស៊ី។លោកបានថែ្លងថា តំបន់អាស៊ីអាគ្នេយ៍គឺជាមជ្ឈមណ្ឌលដ៏សំខាន់នៃផ្លូវសូត្រលើសមុទ្រតាំងពីសម័យបុរាណមក ប្រទេសចិនមានឆន្ទៈក្នុងការពង្រឹងកិច្ចសហប្រតិបត្តិការលើសមុទ្រជាមួយបណ្តាប្រទេសអាស៊ាននានាដើម្បីរួមគ្នាកសាងផ្លូវសូត្រលើសមុទ្រសតវត្សទី ២១ ។
គំនិតផ្តួចផ្តើមខ្សែក្រវាត់មួយនិងផ្លូវមួយគឺជាគំនិតស្តីពីកិច្ចសហប្រតិបត្តិការផ្នែកសេដ្ឋកិច្ចអន្តរជាតិដែលលើកឡើងដោយលោកស៊ីជីនភីង ស្នូលនៃគំនិតនេះគឺចាត់ទុកកិច្ចកសាងហេដ្ឋារចនាសម្ព័ន្ធជាខ្សែសំខាន់ បង្កើនការតភ្ជាប់គ្នាក្នុងគ្រប់ផ្នែក បង្កើតកម្លាំងចលករថ្មីសម្រាប់កំណើនសេដ្ឋកិច្ចពិភពលោក និងវេទិកាថ្មីសម្រាប់កិច្ចសហប្រតិបត្តិការសេដ្ឋកិច្ចអន្តរជាតិ។
ស្មារតីផ្លូវសូត្រ៖សន្តិភាពនិងកិច្ចសហប្រតិបត្តិការ ការបើកទូលាយនិងបរិយាបន្ន័ រៀនសូត្រពីគ្នានិងយកបទពិសោធន៍គ្នាទៅវិញទៅមក ផ្តល់ផលប្រយោជន៍ដល់គ្នាទៅវិញទៅមកនិងឈ្នះ-ឈ្នះ។
គោលការណ៍ស្តីពីពិភាក្សារួមគ្នា កិច្ចកសាងរួមគ្នានិងចែករំលែកជាមួយគ្នា ៖ការពិភាក្សាជាមួយគ្នាគឺ ប្រមូលមតិនិងប្រាជ្ញាយ៉ាងទូលំទូលាយ ទាំងអស់គ្នាពិគ្រោះពិភាក្សាសម្រាប់ធ្វើការ កិច្ចកសាងរួមគ្នាគឺធ្វើការខិតខំប្រឹងប្រែងទាំងអស់និងអស់សមត្ថភាពរបស់ខ្លួន ការចែករំលែកជាមួយគ្នាគឺ ធ្វើឲ្យសមិទ្ធិផលនៃកិច្ចកសាងអំណោយផលដល់ប្រជាជនឲ្យបានកាន់តែច្រើននិងកាន់តែយុត្តិធម៌។
លោកស៊ីជីនភីង ប្រធានរដ្ឋចិនធ្លាប់មានប្រសាសន៍ជាច្រើនលើកថា គំនិតផ្តួចផ្តើមស្តីពី”ខ្សែក្រវាត់មួយនិងផ្លូវមួយ” មិនមែនកសាងដោយប្រទេសណាមួយទេ គឺស្វាគមន៍ប្រទេសនានារួមគ្នាចូលរួមការកសាង ។ មិនមែនស្វែងរកក្របខ័ណ្ឌអំណាចទេ គឺដើម្បីគាំទ្រប្រទេសនានាឲ្យទទួលបានការអភិវឌ្ឍរួម ។ គំនិតផ្តួចផ្តើមស្តីពី”ខ្សែក្រវាត់មួយនិងផ្លូវមួយ” ជាគម្រោងរបស់ចិនដើម្បីសម្រេចបាននូវការអភិឌ្ឍគ្នានិងភាពរុងរឿងលើពិភពលោកដែលជាគោលបំណងរួមរបស់ប្រជាជននៃបណ្តាប្រទេសនានា ។
