ព្រឹកថ្ងៃទី១៥ខែមីនា មហាសន្និបាតលើកទីពីរនៃសភាតំណាងប្រជាជនទូទាំងប្រទេសចិននីតិកាលទី១៣បានបិទបញ្ចប់នៅក្រុងប៉េកាំង ហើយបានអនុម័តលើច្បាប់វិនិយោគសម្រាប់ពាណិជ្ជករបរទេសរបស់សាធារណរដ្ឋប្រជាមានិតចិនដោយសំឡេងគាំទ្រលើសលប់ ។
ច្បាប់នេះរួមទាំងអស់មានជំពូក៦និងមាត្រា៤២ ។ បទប្បញ្ញត្តិជាទូទៅអំពីការអនុញ្ញាតឲ្យចូល ជំរុញ ការពារនិងគ្រប់គ្រងវិនិយោគរបស់ពាណិជ្ជករបរទេស គឺជាច្បាប់មូលដ្ឋានដ៏មានលក្ខណៈណែនាំក្នុងវិស័យវិនិយោគសម្រាប់ពាណិជ្ជករបរទេសរបស់ប្រទេសចិន ។
បន្ទាប់ពីអនុវត្តកំណែទម្រង់និងបើកទូលាយនៅចុងទសវត្សរ៍ឆ្នាំ១៩៧០ ប្រទេសចិនបានអនុម័តច្បាប់ស្តីពីការរួមទុនរវាងសហគ្រាសចិននិងបរទេស ច្បាប់សហគ្រាសទុនបរទេស និងច្បាប់សហវិនិយោគរវាងសហគ្រាសចិននិងបរទេសជាបន្តបន្ទាប់ គឺត្រូវបានគេហៅថា “ច្បាប់ទុនបរទេសទាំងបី” ។ សាធារណមតិយល់ឃើញថា ប្រទេសចិនតាក់តែងច្បាប់វិនិយោគសម្រាប់ពាណិជ្ជករបរទេសទៅជំនួស“ច្បាប់ទុនបរទេសទាំងបី” គឺចង់បង្ហាញពីការប្តេជ្ញាចិត្តនិងឆន្ទៈនៃការធ្វើកំណែទម្រង់និងបើកទូលាយជាដាច់ខាតតាមរយៈច្បាប់រដ្ឋ ។ ច្បាប់នេះនឹងផ្តល់ផលប្រយោជន៍ដល់ការការពារសិទ្ធិនិងផលប្រយោជន៍ស្របច្បាប់របស់ពាណិជ្ជករបរទេសថែមមួយកម្រិតទៀត ដើម្បីជំរុញការបើកទូលាយកម្រិតខ្ពស់ចំពោះអន្តរជាតិនិងការអភិវឌ្ឍសេដ្ឋកិច្ចដ៏មានគុណភាពខ្ពស់របស់ចិន ។
