ថ្ងៃទី៦ ខែមីនា នៅក្រុងប៉េកាំង លោក Ning Jizhe អនុប្រធានគណៈកម្មាធិការជាតិអភិវឌ្ឍន៍និងកំណែទម្រង់ចិនបានថ្លែងក្នុងសនិ្នសីទសារព័ត៌មាននៃមហាសនិ្នបាតលើកទីពីររបស់សភាតំណាងប្រជាជនទូទាំងប្រទេសចិននីតិកាលទី១៣ថា ឆ្នាំ២០១៩នេះ ប្រទេសចិននឹងប្រកាន់ខ្ជាប់នូវទស្សនៈអភិវឌ្ឍន៍ប្រកបដោយការបើកទូលាយ ហើយនឹងដាក់ចេញវិធានការដែលមានភាពកាន់តែបើកទូលាយលើវិស័យកាន់តែច្រើន ដើម្បីបង្កបង្កើតបរិយាកាសប្រកបអាជីពកាន់តែល្អប្រសើរសម្រាប់វិនិយោគទុនបរទេស ។
លោកបានថ្លែងទៀតថា ឆ្នាំនេះ ប្រទេសចិននឹងដាក់ចេញវិធានការដែលមានភាពកាន់តែទូលាយលើវិស័យកសិកម្ម ឧស្សាហកម្មរ៉ែ ឧស្សាហកម្មផលិតកម្ម និងសេវាកម្មជាដើម ព្រមនិងអនុញ្ញាតឲ្យសហគ្រាសទុនបរទេសរួមទុននិងសហគ្រាសទុនបរទេសទាំងស្រុងប្រកបអាជីពក្នុលើមុខរបរកាន់តែច្រើន ហើយក៏នឹងបន្ធូរបន្ថយយ៉ាងខ្លាំងនូវការដាក់កំហិតចំពោះការអនុញ្ញាតឲ្យទុនបរទេសចូលទីផ្សារចិនជាងឆ្នាំ ២០១៨ទៅទៀត រដ្ឋាភិបាលចិននឹងកាត់បន្ថយថែមទៀតនូវបញ្ជីអវិជ្ជមាននៃការអនុញ្ញាតឲ្យសហគ្រិនបរទេសចូលទីផ្សារចិន ព្រមនិងបន្តធ្វើការសាកល្បងមុនគេបង្អស់លើវិស័យបើកទូលាយនៅតំបន់ពិសោធន៍ផ្នែកពាណិជ្ជកម្មសេរី ។ ក្រៅពីនេះ នៅ ឆ្នាំ ២០១៩ប្រទេសចិននឹងប្រកាស “បញ្ជីមុខរបរដែលលើកទឹកចិត្តឲ្យសហគ្រិនបរទេសបណ្តាក់ទុន”ច្បាប់ថ្មី ដើម្បីពង្រីកក្របខ័ណ្ឌនៃវិស័យដែលលើកទឹកចិត្តឲ្យសហគ្រិនបរទេសមកបណ្តាក់ទុន ៕
