ថ្ងៃទី៥ខែមីនា លោកលីខឺឈាងនាយករដ្ឋមន្រ្តីចិនបានតំណាងឲ្យក្រុមប្រឹក្សាកិច្ចការរដ្ឋធ្វើរបាយការណ៍ការងាររដ្ឋាភិបាលជូនមហាសន្និបាតលើកទី២នៃសភាតំណាងប្រជាជនទូទាំងប្រទេសចិននីតិកាលទី១៣ ។ ឥស្សរជនក្នុងមជ្ឈដ្ឋាននយោបាយ ពាណិជ្ជកម្មនិងបញ្ញវន្តនៅបរទេសបានសម្គាល់ឃើញជាទូទៅថា សមិទ្ធផលរបស់ប្រទេសចិនក្នុងរយៈពេល១ឆ្នាំកន្លងទៅនេះគឺទទួលបានដោយមិនងាយនោះទេ ពួកគេក៏បានរំពឹងដែរថា ការរីកចម្រើនរបស់ប្រទេសចិនអាចផ្តល់ផលប្រយោជន៍កាន់តែច្រើនដល់ពិភពលោក ។
លោកLudo Van Campenhoutអភិបាលរងក្រុងAntwerpនៃប្រទេសបែលហ្ស៊ីកបានថ្លែងថា ក្នុងរយៈពេល១ឆ្នាំកន្លងទៅ ក្រោមសភាពការណ៍ដែលស្ថានការណ៍ជាទូទៅលើផ្ទៃអន្តរជាតិមានភាពស្មុគស្មាញនិងមានបញ្ហាប្រឈមយ៉ាងម៉ឺងម៉ាត់ ប្រទេសចិនបានសម្រេចដោយល្អប្រសើរនូវភារកិច្ចអភិវឌ្ឍន៍សេដ្ឋកិច្ចនិងសង្គម ល្បឿនកំណើននៃសេដ្ឋកិច្ចចិនញ៉ាំងឲ្យពិភពលោកមានចំណាប់អារម្មណ៍យ៉ាងជ្រាលជ្រៅ។
លោក Muhammadប្រធានមជ្ឈមណ្ឌលស្រាវជ្រាវនៃក្រុមហ៊ុនPeninsula Media Groupប្រទេសកាតាបានថ្លែងថា បណ្តាប្រទេសនានាលើពិភពលោកយកចិត្តទុកដាក់ខ្ពស់ចំពោះការកែសម្រួលនៃគោលនយោបាយសេដ្ឋកិច្ចរបស់ប្រទេសចិន អ្វីៗទាំងអស់ដែលមានអំណោយផលដល់ការអភិវឌ្ឍសេដ្ឋកិច្ចរបស់ចិន ក៏នឹងមានអំណោយផលដល់ការអភិវឌ្ឍសេដ្ឋកិច្ចរបស់ពិភពលោកផងដែរ ពោលគឺបានសេចក្តីថា ប្រទេសចិនទទួលបានប្រយោជន៍ ពិភពលោកក៏ទទួលបានផលប្រយោជន៍ផងដែរ៕
