ថ្ងៃទី២១ខែកុម្ភៈ ក្រសួងការបរទេសនៃប្រទេសតួកគីបានចេញសេចក្តីថ្លែងការណ៍ ដោយបានរំលឹកឡើងវិញនូវគោលបំណងស្តីពីការចូលរួមសហភាពអឺរ៉ុប និងប្រឆាំងនឹងរបាយការណ៍របស់សភាអឺរ៉ុបស្តីពីការផ្អាកការចរចាជាមួយតួកគីអំពីការចូលរួមសហភាពអឺរ៉ុប ។
សូមរំលឹកថា គណៈកម្មាធិការកិច្ចការទូតនៃសភាអឺរ៉ុបបានអនុម័តលើរបាយការណ៍មួយច្បាប់កាលពីថ្ងៃទី២០ខែកុម្ភៈដែលបានអំពាវនាវឲ្យគណៈកម្មាធិការសហភាពអឺរ៉ុបនិងប្រទេសជាសមាជិកសហភាពអឺរ៉ុបផ្អាកការចរចាជាមួយកួកគីស្តីពីការចូលរួមសហភាពអឺរ៉ុប មូលហេតុគឺតួកគីព្រងើយកន្តើយនឹងសិទ្ធិមនុស្សនិងសេរីភាពរបស់ប្រជាពលរដ្ឋ ធ្វើអន្តរគមន៍ទៅលើតុលាការ និងមានជម្លោះខាងទឹកដីជាមួយប្រទេសជិតខាង ដូចជាប្រទេសស៊ីបជាដើម។ របាយការណ៍មួយនេះនឹងត្រូវប្រគល់ជូនសភាអឺរ៉ុបដើម្បីធ្វើការបោះឆ្នោតសម្រេចនៅខែមីនាខាងមុខនេះ៕