ផ្នែកសេដ្ឋកិច្ចនិងពាណិជ្ជកម្មអន្តរជាតិនៃសកលវិទ្យាល័យគរុកោសល្យក្រុងប៉េកាំងបានចេញផ្សាយ« របាយការណ៍ស្តីពីការអភិវឌ្ឍនៃការនាំចូលរបស់ចិនប្រចាំឆ្នាំ២០១៨ »នៅក្រុងប៉េកាំងកាលពីពេលថ្មីៗកន្លងទៅនេះ ។ របាយការណ៍បានបញ្ជាក់ថាការនាំចូលរបស់ចិនពីឆ្នាំ ២០១២ ដល់ ឆ្នាំ២០១៧ គិតជាមធ្យមបានរួមចំណែក ២២ .៥ % សម្រាប់កំណើននៃការនាំចូលលើពិភពលោក ។
របាយការណ៍នេះបានបញ្ជាក់ថា ទំហំនៃការនាំចូលពីប្រទេសនានាលើពិភពលោករបស់ចិនជាទូទៅមាននិន្នាការកើនឡើងជាបន្តបន្ទាប់ចាប់តាំងពីការអនុវត្តគោលនយោបាយកំណែទម្រង់និងការបើកទូលាយ ។ ជាពិសេសបន្ទាប់ពីចូលជាសមាជិកនៃអង្គការពាណិជ្ជកម្មពិភពលោកកាលពីឆ្នាំ ២០០១ ធ្វើឲ្យទំហំនៃការនាំចូលរបស់ចិនបានកើនឡើងយ៉ាងឆាប់រហ័ស ។ សូមបញ្ជាក់ថា ការនាំចូលរបស់ចិនបានកើនឡើងពីលំដាប់ទី ២៣ លើពិភពលោកកាលពីឆ្នាំ ១៩៧៩ ដល់លំដាប់ទី ២ លើពិភពលោកនៅឆ្នាំ២០១៧ ៕
