ពិព័រណ៍នាំចូលចិនអន្តរជាតិលើកដំបូងបានសម្ពោធបើកជាផ្លូវការកាលពីថ្ងៃទី ៥ ខែវិច្ឆិកា ។ អ្នកទទួលខុសត្រូវនៃអង្គការអន្តរជាតិសំខាន់ៗ ៣ គឺអង្គការពាណិជ្ជកម្មពិភពលោក អង្គការរូបិយវត្ថុអន្តរជាតិនិងធនាគារពិភពលោក បានថ្លែងសុន្ទរកថាជាបន្តបន្ទាប់ក្នុងពិធីសម្ពោធបើកកាលពីថ្ងៃដដែលនោះ ដោយបានកោតសរសើរចំពោះប្រទេសចិនដែលបានចាត់វិធានការថ្មីដើម្បីពង្រីកការបើកទូលាយដោយម្ចាស់ការនិងគាំពារយ៉ាងសកម្មនូវប្រព័ន្ធពាណិជ្ជកម្មពហុភាគី ។ នេះបានបង្កើនជំនឿទុកចិត្តក្នុងសហគមន៍អន្តរជាតិ និងបានបំពេញបន្ថែមនូវកម្លាំងវិជ្ជមានដល់សេដ្ឋកិច្ចពិភពលោក ។
ពេលថ្លែងសុន្ទរកថា អគ្គនាយកនៃអង្គការពាណិជ្ជកម្មពិភពលោកបានអំពាវនាវឲ្យពង្រឹងប្រព័ន្ធពាណិជ្ជកម្មពិភពលោក ។ លោករំពឹងទុកថា ប្រទេសចិននិងបណ្តាប្រទេសនានារួមសហការគ្នាដើម្បីបង្កើតអនាគតសេដ្ឋកិច្ចកាន់តែល្អបវរ ។
ពេលថ្លែងសុន្ទរកថា អគ្គនាយកនៃអង្គការមូលនិធិរូបិយវត្ថុអន្តរជាតិបានកោតសរសើរចំពោះការរីកចម្រើនជាបន្តបន្ទាប់របស់ប្រទេសចិន និងបន្តរួមចំណែកដល់ពិភពលោកតទៅទៀត ។ លោកស្រីបានថ្លែងទៀតថា ប្រទេសចិនជាគំរូនៃកិច្ចសហប្រតិបត្តិការអន្តរជាតិ ជាពិសេសក្នុងកិច្ចសហប្រតិបត្តិការពាណិជ្ជកម្ម ។ សព្វថ្ងៃនេះគួរតែបង្កើនកិច្ចសហប្រតិបត្តិការអន្តជាតិ ដើម្បីជួយដល់សន្តិភាពពិភពលោក ។
ពេលថ្លែងសុន្ទរកថា ប្រធាននៃធនាគារពិភពលោកបានវាយតម្លៃខ្ពស់ចំពោះសមិទ្ធផលនៃការកាត់បន្ថយភាពក្រីក្ររបស់ប្រទេសចិន ។ លោករំពឹងទុកថា ក្នុងឱកាសនៃពិព័រណ៍នាំចូលចិនអន្តរជាតិនេះ ប្រព័ន្ធទីផ្សារសកលលោកនឹងផ្តល់ផលប្រយោជន៍កាន់តែច្រើនដល់ប្រជាជនលើពិភពលោក ។