ថ្ងៃទី៥ខែវិចិ្ឆកា ពិព័រណ៍នាំចូលចិនអន្តរជាតិលើកដំបូងបានបើកធ្វើនៅក្រុងសៀងហៃ ។ លោកស៊ីជីនភីង ប្រធានរដ្ឋចិនបានថ្លែងសុន្ទរកថាគន្លឹះ ដោយបានលើកឡើងនូវវិធានការមានពាក់ព័ន្ធដើម្បីជំរុញការពង្រីកការបើកទូលាយថែមមួយកម្រិតទៀត ។ តំណាងមជ្ឈដ្ឋាននយោបាយ ពាណិជ្ជកម្មនិងបញ្ញវន្តនៃបណ្តាប្រទេសនានាដែលចូលរួមពិព័រណ៍នាំចូលចិនអន្តរជាតិនេះបានវាយតម្លៃខ្ពស់ចំពោះការនេះ ។ មជ្ឈដ្ឋានទាំងនេះជឿជាក់ថា សុន្ទរកថារបស់លោកប្រធានរដ្ឋចិនស៊ីជីនភីងបានបង្ហាញឲ្យឃើញនូវអាកប្បកិរិយាវិជ្ជមានរបស់ចិនដែលប្រកាន់ខ្ជាប់ដើរលើផ្លូវនៃកំណែទម្រង់និងបើកទូលាយនិងស្វែងរកវិបុលភាពនិងការអភិវឌ្ឍរួមជាមួយប្រទេសទាំងអស់លើពិភពលោក ។
លោក Jean-Pierre Raffarin អតីតនាយករដ្ឋមន្ត្រីបារាំងបានថ្លែងថា ក្នុងពេលដែលការការពារនិយមផ្នែកពាណិជ្ជកម្មកំពុងកើនឡើងធ្វើឲ្យបណ្តាប្រទេសនានាមានការព្រួយបារម្ភជាទូទៅ សុន្ទរកថារបស់លោកស៊ីជីនភីងបានបង្ហាញនូវគោលជំហរដ៏ម៉ឺងម៉ាត់របស់ចិនក្នុងការគាំទ្រដល់ពហុភាគីនិយមនិងពាណិជ្ជកម្មសេរី ។ នេះជាមាគ៌ាឆ្ពោះទៅរកការបង្កើតទ្រព្យសម្បត្តិនិងសម្រេចការអភិវឌ្ឍ ហើយក៏ជាមតិឯកភាពគ្នារបស់ប្រទេសភាគច្រើនផងដែរ ។ សន្តិភាពនិងការអភិវឌ្ឍរបស់ពិភពលោកគួរតែសម្រេចបានតាមរយៈការពួតដៃធ្វើកិច្ចសហប្រតិបត្តិការគ្នារវាងបណ្តាប្រទេសនានា មិនមែនសម្រេចដោយការធ្វើបាបអ្នកខ្សោយនោះទេ ។
លោក Jean-Paul Agon ប្រធានក្រុមហ៊ុន L’ORÉAL របស់បារាំងបានប្រាប់អ្នកសារព័ត៌មានថា ខណៈដែលសកលភាវូបនីយកម្មនិងពហុភាគីនិយមរងការគំរាមកំហែង សុន្ទរកថារបស់លោកស៊ីជីនភីងបានបង្ហាញនូវអាកប្បកិរិយាជាក់ច្បាស់របស់ចិនដែលនឹងបន្តពង្រីកការបើកទូលាយ នេះនឹងក្លាយទៅជានិមិត្តសញ្ញាក្នុងប្រវត្តិសាស្ត្រនៃពាណិជ្ជកម្មពិភពលោក ។ ប្រទេសចិនកំពុងក្លាយទៅជាអ្នកណែនាំខាងពាណិជ្ជកម្មនិងសកលភាវូបនីយកម្ម ។ យើងមានជំនឿចិត្តចំពោះទីផ្សារប្រទេសចិន ហើយក៏មានជំនឿចិត្តចំពោះពេលអនាគតផងដែរ ។
