នៅរៀងរាល់ចុងឆ្នាំឬដើមឆ្នាំនីមួយៗ បណ្តាអង្គការ ស្ថាប័ន្ធស្រាវជ្រាវ ប្រព័ន្ធសារព័ត៌មាន ធនាគារគំនិត អន្តរជាតិនិងអង្គការក្រៅរដ្ឋាភិបាល នឹងប្រកាសនូវលទ្ធផលត្រួតពិនិត្យវាយតម្លៃលើបណ្តាតួអង្គសេដ្ឋកិច្ចក៏ដូចជាចំណាត់ថ្នាក់លើលោក ដោយយោងតាមសន្ទុស្សន៍សូចនាករវាយតម្លៃខុសៗគ្នាក្នុងច្រើនវិស័យ ដូចជា នយោបាយ សេដ្ឋកិច្ចនិងពាណិជ្ជកម្ម ទេសចរណ៍ វប្បធម៌ សុខាភិបាល ការច្នៃប្រឌិតថ្មី ឬកម្លាំងប្រកួតប្រជែងជាដើម។ ក្នុង “តារាងវាយតម្លៃ” ទាំងនេះ មានតារាងវាយតម្លៃមួយ ត្រូវបានគេយកចិត្តទុកដាក់ខ្លាំងបំផុត ។ ជាក់ស្តែងគឺលំដាប់ថ្នាក់ទូទៅនៃបរិយាកាសធ្វើអាជីវកម្មប្រចាំឆ្នាំសម្រាប់បណ្តាតួអង្គសេដ្ឋកិច្ច ដែលត្រូវគេសម្គាល់ជាទូទៅថាជា “របាយការណ៍ចម្បង” នៃធនាគារពិភពលោក ។
យោងតាម «របាយការណ៍ចុងក្រោយរបស់ធនាគារពិភពលោកអំពីបរិយាកាសធ្វើអាជីវកម្មឆ្នាំ ២០១៩ ៖ ការបណ្តុះបណ្តាលសម្រាប់កំណែទម្រង់» ដែលទើបប្រកាសផ្សព្វផ្សាយនាពេលថ្មីៗនេះបានឲ្យដឹងថា ក្នុងតួអង្គសេដ្ឋកិច្ចចំនួន ១៩០ ប្រទេសចិនឈរនៅលំបាប់ថ្នាក់ទី ៤៦ គឺជាតួអង្គសេដ្ឋកិច្ចដែលលូតលាស់ខ្លាំងបំផុតក្នុងមួយឆ្នាំកន្លងទៅនេះ។
សន្ទស្សន៍សម្រាប់ការវាយតម្លៃសូចនាករចំពោះប្រទេសចិនរបស់ធនាគារពិភពលោក បានឆ្លុះបញ្ចាំងឲ្យឃើញយ៉ាងច្បាស់នូវសភាពការណ៍ធ្វើអាជីវកម្មយ៉ាងជាក់ស្តែងរបស់សហគ្រាសធុនមតូចនិងធ្យម ហើយក៏បានបង្ហាញថា តើអង្គភាពសេដ្ឋកិច្ចនានាបានដាក់ចេញនូវវិធានការកំណែទម្រង់ឬអត់ក្នុងរយៈពេលមួយឆ្នាំកន្លងមកនេះ ព្រមទាំងសមិទ្ធផលនៃវិធានការកំណែទម្រង់ផងដែរ។
លោកស្រី Rita Ramalho នាយកជាន់ខ្ពស់នៃការិយាល័យសូចនាករសកលនៃធនាគារពិភពលោកដែលទទួលខុសត្រូវចងក្រង«របាយការណ៍នៃបរិយាកាសធ្វើអាជីវកម្ម»បានថ្លែងថា ក្នុងរយៈពេល ១ ឆ្នាំកន្លងទៅនេះ ប្រទេសចិនបានធ្វើកំណែទម្រង់ច្រើនបំផុតដើម្បីកែលម្អបរិយាកាសប្រកបអាជីវកម្មនៃសហគ្រាសធុនមតូចនិងធ្យម ក្នុងនោះមានកំណែទម្រង់សំខាន់ៗចំនួន ៧ ។
វិធានការកំណែទម្រង់ទាំងនេះ រួមមានដូចជា ដំណើរការប្រព័ន្ធចុះបញ្ជីនៃសហគ្រាសជាដើម ។ ប្រទេសចិនបានដាក់ឲ្យដំណើរការប្រព័ន្ធចុះបញ្ជី និងវិធានការនៃការចុះឈ្មោះប្រព័ន្ធធានារ៉ាប់រងសង្គមតាមបណ្តាញអ៊ីនធើណែត ដែលគិតជាមធ្យម សហគ្រាសចំណាយពេលត្រឹមតែ ៩ ថ្ងៃប៉ុណ្ណោះ អាចសម្រេចបាននូវការចុះបញ្ជីដោយជោគជ័យ ។
នៅក្នុងវិស័យដោះស្រាយវិវាទផែ្នកពាណិជ្ជកម្ម ប្រទេសចិនបានចំណាយពេលជាមធ្យមគឺ ៤៩៦ ថ្ងៃ ហើយបានចំណាយក្នុងអត្រា ១៦ ភាគរយនៃចំនួនទឹកប្រាក់សំណងពោល គឺល្អប្រសើរជាងតួអង្គសេដ្ឋកិច្ចដែលមានចំណូលខ្ពស់របស់អង្គការកិច្ចសហប្រតិបត្តិការសេដ្ឋកិច្ចដែលចំណាយពេលជាមធ្យម ៥៨២ ថ្ងៃនិងបានចំណាយក្នុងអត្រា ២១ ភាគរយនៃចំនួនទឹកប្រាក់សំណង។ដូច្នេះ ចិនឈរនៅក្នុងចំណាត់ថ្នាក់ទី ៦ ហើយជាតួអង្គសេដ្ឋកិច្ចល្អបំផុតមួយនៅក្នុងពិភពលោក។ គួរកត់សម្គាល់ថា នៅក្នុងរបាយការណ៍បរិយាកាសធ្វើអាជីវកម្មពិភពលោកចុងក្រោយបំផុតរបស់ធនាគារពិភពលោក ប្រទេសម៉ូរីទូសនិងរ៉្វានដានៅទ្វីបអាហ្រ្វិកបានឈរនៅចំណាត់ថ្នាក់ទី ២០ និងទី ២៩ ដោយឡែកពីគ្នាដែលមានកម្រិតខ្ពស់ជាងប្រទេសចិននិងជប៉ុន។ប្រការនេះបង្ហាញថា សត្យានុម័តនិងភាពយុត្តិធម៌នៃសូចនាករវាយតម្លៃរបស់ធនាគារពិភពលោក គឺដោយមិនគិតពីទំហំនៃតួអង្គសេដ្ឋកិច្ច ហើយផ្តោតទៅលើវិធានការកំណែទម្រង់ជាក់លាក់និងលទ្ធផលអនុវត្តនៃតួអង្គសេដ្ឋកិច្ចនីមួយៗថែមទៀត។
ទោះជាយ៉ាងណាក៏ដោយ បច្ចុប្បន្ន បរិយាកាសធ្វើអាជីវកម្មរបស់ប្រទេសចិននៅតែត្រូវពុះពារគ្រប់ឧបសគ្គ ។ មេដឹកនាំចិនបានដឹងយ៉ាងច្បាស់ ។
នៅក្នុងពិព័រណ៍នាំចូលចិនអន្តរជាតិលើកដំបូងដែលសម្ពោធបើកកាលពីថ្ងៃទី ៥ ខែវិច្ឆិកា លោកស៊ីជិនភីង ប្រធានរដ្ឋចិនបានចាត់ទុកការបង្កើតបរិយាកាសធ្វើអាជីវកម្មឈានមុខលើផ្ទៃអន្តរជាតិជាគោលដៅនិងភារកិច្ចដ៏សំខាន់ក្នុងការពង្រីកការបើកទូលាយនៃប្រទេសចិន ជាពិសេសគឺបានសង្កត់ធ្ងន់ថាត្រូវតែផ្តន្ទាទោសរាល់ទង្វើរំលោភសិទ្ធិនិងផលប្រយោជន៍ស្របច្បាប់របស់ពាណិជ្ជករបរទេស ពិសេសគឺរំលោភលើកម្មសិទ្ធិបញ្ញា ។ ព្រមជាមួយនេះ លោកស៊ីជីនភីងថ្លែងថា បណ្តាប្រទេសនានាគួរតែខិតខំធ្វើឲ្យប្រសើរឡើងនូវបរិយាកាសធ្វើអាជីវកម្មរបស់ខ្លួននិងដោះស្រាយបញ្ហារបស់ខ្លួន កុំចេះតែឆ្លុះបញ្ចាំងអ្នកដទៃ តែមិនបានឆ្លុះបញ្ចាំងខ្លួនឯងនោះ ។
ទន្ទឹមនឹងការដែលមេដឹកនាំកំពូលចិននិងផ្នែកជាច្រើននៃរដ្ឋាភិបាលចិនបានចេញគោលនយោបាយនិងវិធានការសម្រាប់គាំទ្រដល់ការអភិវឌ្ឍសេដ្ឋកិច្ចឯកជនរបស់ចិន ជាពិសេសគឺការអនុវត្តជាក់ស្តែងនៃកំណែទម្រង់នៃស្ថាប័នប្រទេសចិននៅចុងឆ្នាំនេះនិងដើមឆ្នាំ២០១៩ បរិយាកាសអភិវឌ្ឍន៍អាជីវកម្មដែលកាន់តែបើកទូលាយ ច្នៃប្រឌិតថ្មីនិងបរិយាប័ន្នមួយ នឹងជួយដល់ការបើកទូលាយកម្រិតថ្មីរបស់ចិនចំពោះបរទេស ៕