ពិព័រណ៍នាំចូលចិនអន្តរជាតិលើកដំបូងបានសម្ពោធបើកជាផ្លូវការនៅទីក្រុងសៀងហៃប្រទេសចិនកាលពីព្រឹកថ្ងៃទី ៥ ខែវិច្ឆិកា ។ លោក ស៊ី ជីនភីង ប្រធានរដ្ឋចិនបានអញ្ជើញចូលរួមពិធីព្រមទាំងថ្លែងសុន្ទរកថាគន្លឹះ ដោយបានប្រកាសនូវវិធានការបើកទូលាយថ្មីរបស់ប្រទេសចិន ហើយលោកបានសង្កត់ធ្ងន់ថា ជំហានជំរុញឲ្យការបើកទូលាយមានកម្រិតកាន់តែខ្ពស់របស់ចិននឹងមិនឈប់ទេ។
ប្រឈមនឹងបញ្ហានៃសេដ្ឋកិច្ចពិភពលោក លោក ស៊ី ជីនភីង បានផ្តល់វិធីទប់ទល់ ដោយបានអំពាវនាវឲ្យបណ្តាភាគីប្រកាន់ការជឿទុកចិត្តលើការបើកទូលាយនិងកិច្ចសហប្រតិបត្តិការ ដើម្បីជំរុញឲ្យសកលភាវូបនីយកម្មនៃសេដ្ឋកិច្ចអភិវឌ្ឍតាមទិសដៅកាន់តែបើកទូលាយ បរិយាប័ទ្ន មានតុល្យភាព និងឈ្នះ-ឈ្នះ។
ឆ្នាំ២០១៨នេះជាខួប ៤០ ឆ្នាំនៃការធ្វើកំណែទម្រង់និងបើកទូលាយរបស់ចិន ។ ពេលថ្លែងសុន្ទរកថា លោកស៊ីជីនភីងបានរំលឹកម្តងទៀតថា ទ្វារបស់ចិនកាន់តែបើកទូលាយថែម ទៀត ។ លោកបានបញ្ជាក់ថា ជានិច្ចកាល ប្រទេសចិនជាអ្នកជំរុញដ៏សំខាន់ក្នុងការបើកទូលាយរួមលើពិភពលោក ជាកម្លាំងចលករយ៉ាងនឹងនរនៃកំណើនសេដ្ឋកិច្ចពិភពលោក ជាទីផ្សារដ៏មានសក្តានុពលសម្រាប់បណ្តាប្រទេសនានាពង្រីកពាណិជ្ជកម្ម និងជាអ្នករួមចំណែកយ៉ាងសកម្មដល់អភិបាលកិច្ចនិងកំណែទម្រង់នៃសកលលោក ។
ក្នុងមួយរយៈពេលកន្លងទៅនេះ អនាគតនៃសេដ្ឋកិច្ចរបស់ចិនទទួលបានការចាប់អារម្មពីសំណាក់មជ្ឈដ្ឋានខាងក្រៅ ។ លោកស៊ីជីនភីងបានថ្លែងក្នុងពិធីសម្ពោធបើកថា
មូលដ្ឋានគ្រឹះនៃការអភិវឌ្ឍនិងស្ថិរភាពសេដ្ឋកិច្ចប្រទេសចិនមិនកែប្រែទេ ល័ក្ខខ័ណ្ឌផលិតកម្មដែលទ្រទ្រង់ការអភិវឌ្ឍដោយគុណភាពខ្ពស់មិនកែប្រែទេ និន្នាការជាទូទៅមានភាពល្អប្រសើរនិងស្ថិរភាពយូរអង្វែងមិនកែប្រែទេ ប្រទេសចិនពន្លឿនការវិនិយោគនិងកិច្ចសហប្រតិបត្តិការពាណិជ្ជកម្មជាមួយប្រទេសតាមបណ្តោយខ្សែក្រវាត់មួយនិងផ្លូវមួយ។ប្រទេសចិនមានល័ក្ខខ័ណ្ឌអំណោយផលជាច្រើនសម្រាប់អភិវឌ្ឍសេដ្ឋកិច្ចដោយបរិសុទ្ធនិងស្ថិរភាពយូរអង្វែង។ខ្ញុំជឿជាក់ថា សេដ្ឋកិច្ចចិននឹងពន្លឿនឆ្ពោះទៅផ្លូវអភិវឌ្ឍដោយគុណភាពខ្ពស់បាន ហើយទទួលបាននូវអនាគតអភិវឌ្ឍកាន់តែភ្លឺស្វាងមិនខាន។
ក្នុងពិធីសម្ពោធបើក មេដឹកនាំបរទេសនិងអ្នកទទួលខុសត្រូវនៃអង្គការអន្តរជាតិមួយចំនួនបានថ្លែងសុន្ទរកថារៀងៗខ្លួន ។ ពួកគេបង្ហាញថា នឹងចាត់ទុកពិព័រណ៍នាំចូលចិនអន្តរជាតិជាឱកាស ដើម្បីពង្រីកពាណិជ្ជកម្មទ្វេភាគីជាមួយប្រទេសចិន ជំរុញសកលភាវូបនីយកម្មផ្នែកសេដ្ឋកិច្ច ក៏ដូចជារួមគ្នាជាមួយភាគីចិនក្នុងកិច្ចខិតខំប្រឹងប្រែងកសាងសេដ្ឋកិច្ចពិភពលោកដែលបើកទូលាយ ៕
