ថ្ងៃទី ៤ខែវិច្ឆិកា វេបសាយស្ថានីយទូរទស្សន៍មជ្ឈិមចិនបានចេញផ្សាយអត្ថបទរបស់អ្នកធ្វើអត្ថាធិប្បាយ ដែលមានចំណងជើងថា “ការអភិវឌ្ឍន៍របស់ប្រទេសចិន កាលានុវត្តភាពរបស់ពិភពលោក ” ដើម្បីអបអរសាទរយ៉ាងកក់ក្តៅចំពោះការសម្ពោធបើកនៃពិព័រណ៍នាំចូលចិនអន្តរជាតិលើកដំបូង ។
បទអត្ថាធិប្បាយនេះបានលើកឡើងថា ថ្ងៃទី ៥ ខែវិច្ឆិកា ពិព័រណ៍នាំចូលចិនអន្តរជាតិលើកដំបូងនឹងសម្ពោធបើកនៅក្រុងសៀងហៃប្រទេសចិន ។ សហគ្រាសមកពីតំបន់នានាលើពិភពលោកដែលបានចុះឈ្មោះចូលរួមការតាំងពិព័រណ៍លើកនេះ សរុបជាង ៣ ពាន់សហគ្រាស នឹងប្រមូលប្រភពធនធានផ្នែកពាណិជ្ជកម្មសកល ហើយឥស្សរជនសំខាន់ៗនៃមជ្ឈដ្ឋាននយោបាយ ឧស្សាហកម្ម និងពាណិជ្ជកម្មមកពីប្រទេសនិងតំបន់ចំនួនប្រមាណ ១៥០ ព្រមនិងអ្នកទទួលខុសត្រូវនៃអង្គការអន្តរជាតិពាក់ព័ន្ធនឹងមានវត្តមានក្នុងពិព័រណ៍លើកនេះ ។ ពិព័រណ៍នាំចូលចិនអន្តរជាតិលើកដំបូងគឺអាស្រ័យដោយលោក ស៊ីជីនភីង ប្រធានរដ្ឋចិនធ្វើការសិក្សាស្រាវជ្រាវ ផ្តួចផ្តើមឡើងនិងរៀបចំការងារចាត់ចែងដោយផ្ទាល់ គឺជាពិព័រណ៍ថ្នាក់ជាតិផ្នែកការនាំចូលលើកដំបូងរបស់ប្រទេសចិន ។ ឆ្លងតាមប្រតិបតិ្តការជាក់ស្តែងលើកនេះ ប្រទេសចិននឹងបង្ហាញទៅកាន់ពិភពលោកថា ទ្វារសម្រាប់ការបើកទូលាយរបស់ប្រទេសចិននឹងមិននោះទេ ថែមទាំងនឹងមានភាពកាន់តែទូលាយថែមទៀត !
បទអត្ថាធិប្បាយបានគូសបញ្ជាក់ថា ប្រទេសចិនគឺជាអ្នកទទួលផលប្រយោជន៍ពីការធ្វើសកលភាវូបនីយកម្មសេដ្ឋកិច្ច ហើយក៏ជាអ្នករួមចំណែកផងដែរ ។ សេដ្ឋកិច្ចចិនដែលកំណើនយ៉ាងឆាប់រហ័សបានក្លាយជាក្បាលម៉ាស៊ីននិងយុថ្កាសម្រាប់អូសទាញសេដ្ឋកិច្ចពិភពលោក ។ ការរៀបចំពិព័រណ៍នាំចូលចិនអន្តរជាតិដែលមានទ្រង់ទ្រាយធំ គឺដើម្បីប្រាប់ទៅកាន់ពិភពលោកតាមរយៈប្រតិបតិ្តការជាក់ស្តែងថា ប្រទេសចិននឹងជំរុញយ៉ាងមុតមាំនូវពាណិជ្ជកម្មសេរី ការបើកទូលាយនិងការអភិវឌ្ឍន៍ ការអភិវឌ្ឍន៍របស់ប្រទេសចិន គឺជាកាលានុវត្តភាពរបស់ពិភពលោក ។ ប្រទេសចិនមានក្តីរំពុងថា បណ្តាប្រទេសនានានឹងឆ្លៀតប្រើពិព័រណ៍លើកនេះ ជំរុញការធ្វើសកលភាវូបនីយកម្មសេដ្ឋកិច្ចឲ្យឆ្ពោះទៅកាន់ទិសដៅដែលមានភាពកាន់តែបើកទូលាយ បរិយាប័ន្ន ផ្តល់ផលប្រយោជន៍ជាទូទៅ មានតុល្យយភាពនិងឈ្នះ-ឈ្នះ ធ្វើការខិតខំប្រឹងប្រែងដើម្បីកសាងពិភពលោកដែលមានសនិ្តភាពយូរអង្វែង ភាពចំរុងចម្រើនរួមគ្នា ព្រមនិងមានភាពបើកទូលាយនិងបរិយាប័ន្ន !
