ថ្ងៃទី ២៩ ខែតុលា ក្នុងសន្និសីទសារព័ត៌មានរបស់ក្រសួងពាណិជ្ជកម្មចិន លោកFu Ziying តំណាងចរចាពាណិជ្ជកម្មអន្តរជាតិនិងជាអនុរដ្ឋមន្រ្តីនៃក្រសួងពាណិជ្ជកម្មចិនបានធ្វើបទបង្ហាញពីព័ត៌មានពាក់ព័ន្ធនឹងលោកស៊ី ជីនភីង ប្រធានរដ្ឋចិននឹងអញ្ជើញចូលរួមពិធីសម្ពោធបើកពិព័រណ៍នាំចូលចិនអន្តរជាតិលើកដំបូង ។
លោកFu Ziying បានថ្លែងថា ពិព័រណ៍នាំចូលចិនអន្តរជាតិលើកដំបូងនឹងបើកធ្វើនៅក្រុងសៀងហៃពីថ្ងៃទី៥ ដល់ទី ១០ ខែវិច្ឆិកាខាងមុខ ។ លោកស៊ី ជីនភីង ប្រធានរដ្ឋចិននឹងអញ្ជើញចូលរួមពិធីសម្ពោធបើកពិព័រណ៍និងសកម្មភាពពាក់ព័ន្ធ ។ ក្នុងឱកាសបើកធ្វើពិព័រណ៍លើកនេះ នឹងមានវត្តមានរបស់ថ្នាក់ដឹកនាំសំខាន់ៗ រួមនិងឥស្សរជនក្នុងមជ្ឈដ្ឋានឧស្សាហកម្មនិងពាណិជ្ជកម្ម ដែលមកពីប្រទេសនិងតំបន់ប្រហែល ១៥០ ព្រមនិងអ្នកទទួលខុសត្រូវនៃអង្គការអន្តរជាតិពាក់ព័ន្ធ ។
ក្រៅពីនេះ លោកFu Ziying បានបញ្ជាក់ទៀតថា ពិព័រណ៍នាំចូលចិនអន្តរជាតិជាពិព័រណ៍ថ្នាក់ជាតិធំទីមួយរបស់ពិភពលោកដែលធ្វើក្រោមប្រធានបទនាំចូល ដែលចែកជាពីរផ្នែកធំៗ គឺការតាំងពិព័រណ៍និងវេទិកា ។ ការតាំងពិព័រណ៍រួមមានពិព័រណ៍ចម្រុះ ផ្នែកពាណិជ្ជកម្មនិងវិនិយោគថ្នាក់ជាតិ និងពិព័រណ៍ពាណិជ្ជកម្មសម្រាប់សហគ្រាស រីឯវេទិកាគឺវេទិកាផ្នែកសេដ្ឋកិច្ចនិងពាណិជ្ជកម្មអន្តរជាតិHongqiao ។ ជឿជាក់ថា ពិព័រណ៍នាំចូលចិនអន្តរជាតិនឹងក្លាយទៅជាវេទិកាសហប្រតិបត្តិការបែបបើកចំហសម្រាប់បង្ហាញពីរូបភាពរបស់បណ្តាប្រទេសនានាលើពិភពលោក ជំរុញការធ្វើពាណិជ្ជកម្ម ព្រមនិងជាពិព័រណ៍សាធារណៈសម្រាប់ជំរុញការធ្វើសកលភាវូបនីយកម្មសេដ្ឋកិច្ច ៕