នៅខែវិច្ឆិកាខាងមុខនេះ ក្រុមហ៊ុនចំនួន៣២ដែលមកពីសមាគមពាណិជ្ជកម្មធំទាំង៣របស់ឥណ្ឌូណេស៊ីនឹងនាំគ្នាចូលរួមពិព័រណ៍នាំចូលចិនអន្តរជាតិលើកទី១នៅក្រុងសៀងហៃ។មន្រ្តីក្រសួងពាណិជ្ជកម្មនៃប្រទេសឥណ្ឌូណេស៊ីបានថ្លែងថា ឥណ្ឌូណេស៊ីរំពឹងថា ឆ្លងតាមរយៈពិព័រណ៍លើកនេះ អាចធ្វើឲ្យអ្នកប្រើប្រាស់ចិនស្គាល់ផលិតផលឥណ្ឌូណេស៊ីកាន់តែច្រើន ដើម្បីបង្កើនថែមមួយកម្រិតទៀតនូវការប្រាស្រ័យទាក់ទងផ្នែកពាណិជ្ជកម្មរវាងចិននិងឥណ្ឌូណេស៊ី។
ក្នុងនាមជាប្រទេសភ្ញៀវកិត្តិយសមួយ រដ្ឋាភិបាលឥណ្ឌូណេស៊ីបានយកចិត្តទុកដាក់ជាទីបំផុតចំពោះពិព័រណ៍នាំចូលចិនអន្តរជាតិលើកទី១។លោកស្រីArlindaអគ្គនាយកនៃអគ្គនាយកដ្ឋានអភិវឌ្ឍន៍ការនាំចេញនៃក្រសួងពាណិជ្ជកម្មឥណ្ឌូណេស៊ីបានថ្លែងថា ការបើកធ្វើពិព័រណ៍នាំចូលចិនអន្តរជាតិមានសេចក្តីថា ប្រទេសចិនបានបើកទូលាយថែមមួយកម្រិតទៀតចំពោះបរទេស ប្រការនេះនឹងនាំមកនូវឱកាសកាន់តែច្រើនដល់ដៃគូពាណិជ្ជកម្ម។
បច្ចុប្បន្ននេះ ផលិតផលដែលឥណ្ឌូណេស៊ីនាំចេញទៅកាន់ប្រទេសចិនសំខាន់គឺកសិផលនិងផលិតផលរ៉ែជាដើម។លោកស្រីArlindaបានរំពឹងទុកថា ឆ្លងតាមរយៈពិព័រណ៍នាំចូលចិនអន្តរជាតិលើកនេះ អាចបង្ហាញនូវផលិតផលមានសក្តានុពលខ្ពស់កាន់តែច្រើនរបស់ឥណ្ឌូណេស៊ីទៅកាន់ប្រទេសចិននិងប្រទេសដទៃទៀត៕