ថ្ងៃទី ១៣ ខែតុលា ឆ្នាំ ២០១៨នេះ គឺជាខួបទី ២ នៃការសោយទិវង្គតរបស់ព្រះបាទ ភូមីបុល អាឌុលយ៉ាដេត អតីតព្រះមហាក្សត្រថៃ ។ តំបន់នានានៃប្រទេសថៃបានរៀបចំពិធីរំលឹកវិញ្ញាណក្ខន្ធ ដោយប្រជាជនបានពាក់អាវព័ណ៌លឿង ដើម្បីរំលឹកដល់អតីតព្រះមហាក្សត្រដែលជាទីសក្ការបូជាដ៏ខ្ពង់ខ្ពស់បំផុតរបស់ពួកគេ ។
នៅវេលាប្រមាណម៉ោង ៦ ព្រឹកថ្ងៃដដែល លោក ប្រាយុទ្ធ ចាន់អូចា នាយករដ្ឋមន្រ្តីថៃនិងភរិយា ព្រមនិងសមាជិកគណៈរដ្ឋមន្ត្រី មន្ត្រីរាជរដ្ឋាភិបាល បានរៀបចំពិធីព្រះពុទ្ធសាសនានៅវាលព្រះស្រែក្រុងបាងកក ដើម្បីរំលឹកពីព្រះរាជបូជនីយកិច្ចរបស់អតីតព្រះមហាក្សត្រ ។
នៅពេលមុននេះ លោក ប្រាយុទ្ធ បានថ្លែងសុន្ទរកថាតាមកញ្ចក់ទូរទស្សន៍នាយល់ថ្ងៃទី ១២ ខែតុលាថា សង្ឃឹមប្រជាជនថៃពាក់អាវព័ណ៌លឿងដែលជាព័ណ៌តំណាងឲ្យព្រះមហាក្សត្រនៅថ្ងៃទី ១៣ ខែតុលា ដោយមិនចាំបាច់ពាក់អាវព័ណ៌ខ្មៅឬព័ណ៌កាន់ទុក្ខផ្សេងទៀតនោះទេ ៕
