កាលពីថ្ងៃទី១៣ខែកញ្ញា លោកវ៉ាងយីសមាជិកក្រុមប្រឹក្សាកិច្ចការរដ្ឋចិននិងជារដ្ឋមន្រ្តីការបរទេសចិននិងលោកJean-Yves Le Drianរដ្ឋមន្រ្តីការបរទេសបារាំងបានរួមគ្នាចូលរួមសន្និសីទសារព័ត៌មានបន្ទាប់ពីបញ្ចប់ជំនួបពិភាក្សាការងារនៅក្រុងប៉េកាំង ។
លោកវ៉ាងយីបានថ្លែងថា ប្រទេសចិនគាំទ្រការធ្វើកំណែទម្រង់និងការបំពេញបន្ថែមដ៏ចាំបាច់ចំពោះយន្តការពាណិជ្ជកម្មអន្តរជាតិដែលមានស្រាប់ក្នុងនោះរួមទាំងអង្គការពាណិជ្ជកម្មពិភពលោក ដើម្បីធ្វើឲ្យយន្តការនេះកាន់តែសច្ចធម៌ មានប្រសិទ្ធិភាព និងសមហេតុផល។ក្នុងដំណើរការពិគ្រោះពិភាក្សាស្តីពីការជំរុញកំណែទម្រង់ ភាគីចិនត្រូវតែប្រកាន់ខ្ជាប់គោលការណ៍ចំនួន៣ ទី១មិនត្រូវបោះបង់ចោលតម្លៃជាស្នូលនិងគោលការណ៍ជាមូលដ្ឋានរបស់អង្គការពាណិជ្ជកម្មពិភពលោក ទី២មិនត្រូវបោះបង់ចោលសិទ្ធិនិងផលប្រយោជន៍ដ៏ត្រឹមត្រូវរបស់ប្រទេសកំពុងអភិវឌ្ឍន៍ ទី៣មិនត្រូវបោះបង់ចោលស្មារតីពិគ្រោះពិភាក្សាដើម្បីឯកភាព។
លោកវ៉ាងយីគូសបញ្ជាក់ថា បញ្ហាកំណែទម្រង់នៃអង្គការពាណិជ្ជកម្មពិភពលោកគឺមានភាពស្មុគស្មាញក្រៃលែង ហើយពាក់ព័ន្ធនឹងបញ្ហាជាច្រើនសង្ឃឹមថាគ្រប់ភាគីទាំងអស់នឹងរក្សាការអត់ធ្មត់ ជំរុញកំណែទម្រង់នេះដោយសន្សឹមៗ។