ក្នុងអំឡុងពេលវេទិកាសេដ្ឋកិច្ចទិសបូព៌ាលើកទី ៤ ទើបតែបញ្ចប់មុននេះ លោកស៊ីជីនភីងប្រធានរដ្ឋចិនបានជួបពិភាក្សាការងារលើកទី៣ ជាមួយលោកភូទីន ប្រធានាធិបតីក្នុងរយៈពេល ៤ ខែកន្លងទៅនេះ ។ ក្នុងរយៈពេលជាង ៥ ឆ្នាំចុងក្រោយនេះ លោកស៊ីជីនភីងនិងលោកភូទីនបានជួបពិភាក្សាការងារច្រើនជាង ២០ លើក ។ ការប្រាស្រ័យទាក់ទងគ្នាយ៉ាងញឹកញាប់រវាងប្រមុខរដ្ឋនៃប្រទេសទាំងពីរបានឆ្លុះបញ្ចាំងពីកម្រិតខ្ពស់និងលក្ខណៈពិសេសនៃទំនាក់ទំនងរវាងចិននិងរុស្ស៊ី ។
ពេលបច្ចុប្បន្ននេះ ការណែនាំយុទ្ធសាស្ត្រពីប្រមុខរដ្ឋនៃប្រទេសចិននិងរុស្ស៊ីបានក្លាយជាកម្លាំងចលករយ៉ាងខ្លាំងក្លាសម្រាប់ពង្រឹងនិងពង្រីកទំនាក់ទំនងរវាងប្រទេសទាំងពីរយ៉ាងស៊ីជម្រៅ ។ ទំនាក់ទំនងភាពជាដៃគូសហប្រតិបត្តិការយុទ្ធសាស្ត្រគ្រប់ជ្រុងជ្រោយរវាងចិននិងរុស្ស៊ីបានឈានចូលយុគសម័យអភិវឌ្ឍន៍ថ្មីកម្រិតខ្ពស់ ។ ក្រៅពីការលើកកម្ពស់គុណភាពនិងទំហំពាណិជ្ជកម្ម ប្រទេសទាំងពីរនៅបានជំរុញជាបន្តបន្ទាប់នូវគម្រោងសំខាន់ៗជាយុទ្ធសាស្ត្រមួយចំនួនក្នុងវិស័យវិនិយោគ ថាមពល ផ្លូវគមនាគមន៍ ការកសាងហេដ្ឋារចនាសម្ព័ន្ធ អវកាសនិងអាកាសចរណ៍ជាដើម ហើយបានលេចចេញនូវចំណុចកំណើននៃកិច្ចសហប្រតិបត្តិការថ្មីជាច្រើនក្នុងវិស័យបច្ចេកវិទ្យា កសិកម្មនិងពាណិជ្ជកម្មអេឡិត្រូនិចជាដើម ។
មជ្ឈមណ្ឌលកុមារ”សមុទ្រ”រុស្ស៊ីដែលស្ថិតនៅទីក្រុងVladivostokធ្លាប់បានទទួលនិងថែរក្សាកុមារចិននៃតំបន់រងគ្រោះដីរញ្ជួយនៅស្រុកWenChuanប្រទេសចិនចំនួនជាង៩រយនាក់ កុមារចិននៅមជ្ឈមណ្ឌលនេះបានទទួលការថែទាំយ៉ាងម៉ត់ចត់ដូច្នេះបានចងមិត្តភាពដ៏ជ្រាលជ្រៅជាមួយនឹងរុស្ស៊ី។
ក្រោមការដឹកនាំរបស់ប្រមុខរដ្ឋប្រទេសទាំងពីរ មូលដ្ឋានសង្គមនិងមតិសាធារណៈនៃមិត្តភាពរវាងចិននិងរុស្ស៊ីមានភាពកាន់តែរឹងមាំ។ឆ្លងតាមការរៀបចំធ្វើសកម្មភាពប្រចាំឆ្នាំប្រធានបទថ្នាក់ជាតិដូចជាឆ្នាំជាតិ ឆ្នាំផ្លាស់ប្តូរមេត្រីភាពរវាងយុវជន និងឆ្នាំផ្លាស់ប្តូររវាងប្រព័ន្ធសារព័ត៌មាន ការទាក់ទងប្រាស្រ័យទៅវិញទៅមករវាងប្រជាជនប្រទេសទាំងពីរចិននិងរុស្ស៊ីមានភាពកាន់តែជិតស្និទ្ធជារៀងរាល់ថ្ងៃ ការស្វែងយល់ពីគ្នាកាន់តែស៊ីជម្រៅជាសន្សឹមៗ។
ទំនាក់ទំនងរវាងប្រទេសចិននិងរុស្ស៊ីជាគំរូសម្រាប់ទំនាក់ទំនងរវាងប្រទេសធំៗនិងបណ្តាប្រទេសជិតខាង ហើយក៏បង្ហាញឲ្យឃើញនូវជោគជ័យនៃការទូតនៃមហាប្រទេសដែលប្រកបដោយលក្ខណៈពិសេសចិន។ដូចដែលប្រសាសន៍របស់លោកវ៉ាងយី សមាជិកក្រុមប្រឹក្សាកិច្ចការរដ្ឋចិននិងជារដ្ឋមន្រ្តីការបរទេសចិនបានថ្លែងថាក្រោមការថែរក្សានិងបណ្តុះបណ្តាលរបស់ប្រមុខរដ្ឋប្រទេសទាំងពីរមិត្តភាពតកូនតចៅរវាងចិននិងរុស្ស៊ីបានក្លាយទៅជាកម្លាំងចលករមិនចេះចប់ក្នុងការអភិវឌ្ឍទំនាក់ទំនងប្រទេសទាំងពីរ៕