ពិព័រណ៍ចិន-អាស៊ានលើកទី១៥និងសន្និសីទកំពូលស្តីពីធុរកិច្ចនិងវិនិយោគចិន-អាស៊ានដែលមានរយៈពេល៤ថ្ងៃបានបើកធ្វើនៅថ្ងៃទី១២ខែកញ្ញានៅក្រុងណាននីងភូមិភាគស្វយ័តក្វាងស៊ី ។ ប្រធានបទនៃពិព័រណ៍លើកនេះគឺ”រួមគ្នាកសាងផ្លូវសូត្រលើសមុទ្រសតវត្សរ៍ទី២១ បង្កើតសហគមន៍រួមនៃការច្នៃប្រឌិតថ្មីចិន-អាស៊ាន” ។ ក្នុងពិធីសម្ពោធបើក មេដឹកនាំនៃបណ្តាប្រទេសអាស៊ាននានាបាននាំគ្នាវាយតម្លៃខ្ពស់ចំពោះគំនិតផ្តួចផ្តើមស្តីពីខ្សែក្រវាត់មួយនិងផ្លូវមួយនិងពិព័រណ៍ចិន-អាស៊ាន ។
ឆ្នាំ២០១៨នេះជាខួបទី១៥នៃការបង្កើតទំនាក់ទំនងភាពជាដៃគូយុទ្ធសាស្ត្ររវាងចិននិងអាស៊ាន ហើយក៏ជាខួបទី៦០នៃការបង្កើតទំនាក់ទំនងផ្លូវទូតរវាងកម្ពុជានិងចិនផងដែរ ។ ប្រទេសកម្ពុជាជាប្រទេសកិតិ្តយសនៃពិព័រណ៍ចិន-អាស៊ានឆ្នាំនេះ ។ សម្តេចហ៊ុនសែនបានថ្លែងថា ក្នុងរយៈពេល១៥ឆ្នាំកន្លងទៅនេះ ពិព័រណ៍ចិន-អាស៊ានបានក្លាយជាវេទិកាដ៏សំខាន់និងមានប្រសិទ្ធភាពខ្ពស់មួយសម្រាប់មេដឹកនាំ សហគ្រិននិងវិនិយោគិននៃបណ្តាប្រទេសនានាធ្វើការផ្លាស់ប្តូរផ្នែកនយោបាយ ការទូត សេដ្ឋកិច្ចនិងពាណិជ្ជកម្ម និងបានដើរតួនាទីយ៉ាងសំខាន់ក្នុងការធ្វើឲ្យកិច្ចសហប្រតិបត្តិការផ្នែកវិនិយោគសេដ្ឋកិច្ចនិងពាណិជ្ជកម្មរវាងប្រទេសចិននិងប្រទេសអាស៊ានមានភាពកាន់តែស៊ីជម្រៅ និងជំរុញដំណើរការនៃសមាហរណកម្មសេដ្ឋកិច្ចក្នុងតំបន់យ៉ាងស៊ីជម្រៅ ។ សម្តេចសង្ឃឹមថា ប្រទេសចិននឹងចែករំលែកបច្ចេកទេសនិងបទពិសោធន៍នៅក្នុងវិស័យបច្ចេកវិទ្យានិងច្នៃប្រឌិតថ្មីជាមួយប្រទេសអាស៊ាននានា បន្តពង្រឹងនិងអភិវឌ្ឍន៍កិច្ចសហប្រតិបត្តិការក្នុងវិស័យបច្ចេកវិទ្យានិងច្នៃប្រឌិតថ្មីរវាងចិននិងអាស៊ាន ជំរុញប្រទេសអាស៊ាននានាឲ្យទទួលផលប្រយោជន៍ធំសម្បើម ដើម្បីសម្រេចគោលដៅនៃការបង្កើតសហគមន៍រួមខាងការច្នៃប្រឌិតថ្មីចិននិងអាស៊ាននៅទីចុងបំផុត ។
