កាលពីថ្ងៃទី៨ខែឧសភាឆ្នាំ២០១៨នេះ ប្រទេសអាមេរិកបានប្រកាសក្តែងៗអំពីការដកខ្លួនចេញពីកិច្ចព្រមព្រៀងគ្រប់ជ្រុងជ្រោយអំពីបញ្ហានុយគ្លេអ៊ែរអ៊ីរ៉ង់ដែលបានមូលគំនិតគ្នាកាលពីឆ្នាំ២០១៥។ទង្វើដកចេញមួយនេះបានចាប់ផ្តើមបង្កជាផលប៉ះពាល់ជាលើកដំបូងនៅវេលាម៉ោងសូន្យនិង១នាទីថ្ងៃទី៧ខែសីហា តាមម៉ោងតំបន់ភាគខាងកើតប្រទេសអាមេរិក ពោលគឺអាមេរិកបានដំណើរការវិធានការមួយចំនួនឡើងវិញដើម្បីដាក់ទណ្ឌកម្មខាងសេដ្ឋកិច្ចគ្រប់ជ្រុងជ្រោយចំពោះអ៊ីរ៉ង់។រដ្ឋាភិបាលអាមេរិកគំរាមកំហែងថា បើអ្នកណាដែលនៅតែរក្សាការប្រាស្រ័យទាក់ទងខាងពាណិជ្ជកម្មជាមួយអ៊ីរ៉ង់ អ្នកនោះគឺមិនអាចមានទំនាក់ទំនងផ្នែកពាណិជ្ជកម្មជាមួយអាមេរិកនោះទេ។
គោលនយោបាយមួយចំនួនដែលរដ្ឋាភិបាលអាមេរិកបច្ចុប្បន្នបានអនុវត្តតាំងពីបានឡើងកាន់អំណាចមក ហាក់ដូចជា”ប្រហោងខ្មៅ”នីមួយៗនៅលើលំហអវកាសដែលបានលេបត្របាក់យកភាពលេចធ្លោនីមួយៗក្នុងកំណើនសេដ្ឋកិច្ចពិភពលោកទាំងមូល។ការដកខ្លួនចេញពីកិច្ចព្រមព្រៀងនុយគ្លេអ៊ែរអ៊ីរ៉ង់ព្រមទាំងដំណើរការឡើងវិញនូវវិធានការដាក់ទណ្ឌកម្មខាងសេដ្ឋកិច្ចដោយគ្រប់ជ្រុងជ្រោយចំពោះអ៊ីរ៉ង់គឺជា”ប្រហោងខ្មៅ”មួយក្នុងចំណោម”ប្រហោងខ្មៅ”ជាច្រើននោះ។
សង្គ្រាមពាណិជ្ជកម្មដែលអាមេរិកបានបំផុសឡើងនោះ វាគ្មានអ្វីគួរឲ្យសង្ស័យនោះឡើយ គឺជា “ប្រហោងខ្មៅអាមេរិក”មួយទៀតដែលអាចនឹងរលបត្របាក់កំណើនសេដ្ឋកិច្ចពិភពលោក ។ ពិតមែនតែនាពេលកន្លងទៅថ្មីៗនេះ លោក ត្រាំបានបង្ហោះសារជារឿយតាមបណ្តាញទំនាក់ទំនងសង្គម Twitter ដោយបានប្រកាសថា “កំពុងទទួលបានជ័យជម្នះក្នុងសង្គ្រាមពាណិជ្ជកម្ម ”ក្តី ក៏ប៉ុន្តែអ្នកវិភាគបានថ្លែងថា កំណើនសេដ្ឋកិច្ចពិភពលោកមានទំនាក់ទំនងស្អិតល្មួតជាមួយពាណិជ្ជកម្ម ជាពិសេស គឺការដំឡើងពន្ធគយនៅចុងក្រោយបំផុតវានឹងប៉ះពាល់ដល់ទំហំពាណិជ្ជកម្មនិងជំនឿចិត្តផ្នែកពាណិជ្ជកម្មនៅពិភពលោកទាំងមូល ហើយនឹងអូសទាញសេដ្ឋកិច្ចពិភពលោកឲ្យធ្លាក់ក្នុងភាពថមថយទៀងផង ។
មិនថាការដកខ្លួនចេញពីកិច្ចព្រមព្រៀងនុយគ្លេអ៊ែរអ៊ីរ៉ង់ ការបំផុសសង្គ្រាមពាណិជ្ជកម្ម ឬមួយក៏ដកខ្លួនចេញពីកិច្ចព្រមព្រៀងក្រុងប៉ារីស និងការដកខ្លួនចេញពីអង្គការយូណេស្កូនៃអង្គការសហប្រជាជាតិជាដើម គោលនយោបាយនីមួយៗដែលក្រុងវ៉ាស៊ីនតោនបានដាក់ចេញនោះ បានសបញ្ជាក់នូវលក្ខណៈពិសេសបំផុតនៃនយោបាយការទូតរបស់រដ្ឋាភិបាលអាមេរិក នោះគឺ “ភាពមិនប្រាកដប្រជា” ។ ប៉ុន្តែក្នុងឋានៈជាអង្គភាពសេដ្ឋកិច្ចទីមួយ និងជាកំពូលប្រទេសខ្លាំងដែលមានឥទ្ធិពលធំជាងគេនៅលើពិភពលោក រដ្ឋាភិបាលអាមេរិកជំពាក់ពិភពលោកបច្ចុប្បន្ននូវ “ភាពប្រាកដប្រជា”ដ៏ធំមួយ ។ ពិភពលោកមិនត្រូវការ “ប្រហោងខ្មៅអាមេរិក”ទេ ដោយសារវាអាចនឹងបំផ្លិចបំផ្លាញភាពល្អបវរនិងភាពរុងរឿងទាំងអស់ក្នុងពេលតែមួយប៉ច្រិចភ្នែកប៉ុណ្ណោះ ៕
