ថ្ងៃទី៣ខែកញ្ញា ពិព័រណ៍ចិន-អាស៊ាននិងកិច្ចប្រជុំកំពូលធុរកិច្ចនិងវិនិយោគទុនចិន-អាស៊ានលើកទី១០បានសម្ពោធបើកនៅទីក្រុងណាននីងភូមិភាគស្វយ័តជនជាតិជាំងក្វាងស៊ី ។ លោកLi Keqiangនាយករដ្ឋមន្ត្រីចិននិងអ្នកដឹកនាំនៃប្រទេសអាស៊ានដូចជាលោកU Thein Seinប្រធានាធិបតីមីយ៉ានម៉ា សម្តេចហ៊ុនសែននាយករដ្ឋមន្ត្រីកម្ពុជា លោកThong Sing Thammavongនាយករដ្ឋមន្ត្រីឡាវ លោកស្រីយីងឡាក់ស៊ីណាវត្តនាយករដ្ឋមន្ត្រីថៃ លោកNguyen Tan Dungនាយករដ្ឋមន្ត្រីវៀតណាម លោក Teo Chee Heanឧបនាយករដ្ឋមន្ត្រីសឹង្ហបុរីជាដើមបានចូលរួមពិធីសម្ពោធបើក ។
ក្នុងសុន្ទរកថាថ្លែងដោយ លោកLi Keqiangនាយករដ្ឋមន្ត្រីចិនបានគូសបញ្ជាក់ជាច្រើនលើកនូវលក្ខណៈសំខាន់នៃការបង្កើនកិច្ចសហប្រតិបត្តិការរវាងចិននិងអាស៊ាន លោកបានថ្លែងថា កិច្ចសហប្រតិបត្តិការរវាងចិននិងអាស៊ានគឺដូចជាអ្នកជួយខ្ញុំហើយខ្ញុំជួយអ្នកវិញ ។កិច្ចសហប្រតិបត្តិការរវាងភាគីទាំងពីរគឺឈ្នះៗទាំងអស់គ្នានិងទទួលបានផលប្រយោជន៍ជាមួយគ្នាផងដែរ ។
លោកLi Keqiangបានសំដែងថា ប្រទេសចិននឹងសកម្មពង្រីកការនាំចូលពីអាស៊ាន ហើយភាគីទាំង២នឹងចុះហត្ថលេខាលើកិច្ចព្រមព្រៀងរយៈពេលយូរអំពីទំនិញកសិផល ។ហើយលោកបានសំដែងទៀតថា រហូតដល់ឆ្នាំ២០២០ចំនួនពាណិជ្ជកម្មទ្វេភាគីមានលទ្ធភាពឡើងដល់១លានលានដុល្លាអាមេរិក វិនិយោគទុនពីរផ្លូវនឹងមានដល់១សែន៥ម៉ឺនលានដុល្លាអាមេរិក ។ អាស៊ាននឹងជាទិសដៅអភិវឌ្ឍន៍មុនគេសម្រាប់ប្រទេសចិនវិនិយោគទុនចំពោះក្រៅប្រទេស ចិនក៏ស្វាគមន៍ការវិនិយោគទុនមកពីអាស៊ានដែរ ។