ថ្ងៃទី ១៧ ខែឧសភា អ្នកសារព័ត៌មានទទួលបានដំណឹងពីសន្និសីទលើកទី៨ នៃថ្នាក់ដឹកនាំស្ថាប័នប្រយុទ្ធប្រឆាំងគ្រឿងញៀនរបស់ប្រទេសជាសមាជិកអង្គការសហប្រតិបតិ្តការសៀងហៃឲ្យដឹងថា សនិ្នសីទលើកនេះបានឈានដល់គំនិតឯកភាពរួម៤ចំណុច៖
ទីមួយ សនិ្នសីទបានវាយតម្លៃយ៉ាងសកម្មចំពោះសនិ្នសីទជាន់ខ្ពស់លើកទីពីរដែលបានប្រារព្ធធ្វើក្រោមប្រធានបទ "ការគំរាមកំហែងថ្មី ប្រតិបតិ្តការរួម"ដែលសហការរៀបចំដោយអង្គការសហប្រតិបត្តិការសៀងហៃនិងការិយាល័យទទួលបន្ទុកបញ្ហាគ្រឿងញៀននិងបទឧក្រិដ្ឋកម្មនៃអង្គការសហប្រជាជាតិនៅក្រុងវីយែន ប្រទេសអូទ្រីស កាលពីថ្ងៃទី ១២ ខែមីនាឆ្នាំ២០១៨នេះ ។
ទីពីរ ឯកភាពគ្នាលើសេចកី្តព្រាងដែលបណ្តាភាគីនានាបានកំណត់ គឺ"ទស្សនទានរបស់អង្គការសហប្រតិបតិ្តការសៀងហៃស្តីពីការទប់ស្កាត់ការប្រើប្រាស់ថ្នាំស្ពឹកនិងថ្នាំព្យាបាលជំងឺផ្លូវចិត្តដោយផ្តេសផ្តាស" ព្រមទាំងគាំទ្រឲ្យដាក់សេចក្តីព្រាងនេះជូនសនិ្នសីទក្រុមប្រឹក្សប្រមុខរដ្ឋរបស់ប្រទេសជាសមាជិកអង្គការសហប្រតិបតិ្តការសៀងហៃទៅតាមរបៀបវារៈដើម្បីទទួលបានអនុម័ត ។
ទីបី គាំទ្រក្រុមការងាររបស់អ្នកជំនាញឲ្យបង្កើនការផ្លាស់ប្តូរការស៊ើបការណ៍អំពីសំណុំរឿងគ្រឿងញៀន បង្កើនការគ្រប់គ្រងចំពោះសម្ភារៈគីមីដែលងាយផលិតជាគ្រឿងញៀន កាត់បន្ថយតម្រូវការខាងគ្រឿងញៀន ក៏ដូចជាធ្វើកិច្ចសហប្រតិបតិ្តការលើវិស័យកែលម្អមូលដ្ឋានច្បាប់ ។
ទីបួន រំលឹកឡើងវិញថា នឹងគាំពារយ៉ាងម៉ឺងម៉ាត់នូវប្រព័ន្ធប្រយុទ្ធប្រឆាំងគ្រឿងញៀនអន្តរជាតិដែលកំពុងអនុវត្តក្នុងពេលបច្ចុប្បន្ន និងគាំពារកិត្យានុភាពនៃសន្ធិសញ្ញាស្តីពីការប្រយុទ្ធប្រឆាំងគ្រឿងញៀនទាំងបីរបស់អង្គការសហប្រជាជាតិ ក៏ដូចជាប្រឆាំងនឹងការធ្វើឲ្យគ្រឿងញៀនទៅជាស្របច្បាប់ផងដែរ ៕
