ថ្ងៃទី១៤ខែឧសភា លោកលូខាងអ្នកនាំពាក្យក្រសួងការបរទេសចិនបានប្រកាសថា តបតាមការអញ្ជើញរបស់រដ្ឋាភិបាលអាមេរិក លោកលាវហឺ បេសកជនពិសេសរបស់លោកស៊ីជីនភីងប្រធានរដ្ឋចិន សមាជិកការិយាល័យនយោបាយមជ្ឈិមបក្សកុម្មុយនិស្តចិន ឧបនាយករដ្ឋមន្រ្តីចិននិងជាអ្នកដឹកនាំនៃភាគីចិនសម្រាប់កិច្ចសន្ទនាសេដ្ឋកិច្ចគ្រប់ជ្រុងជ្រោយរវាងចិននិងសហរដ្ឋអាមេរិកនឹងអញ្ជើញទៅបំពេញទស្សនកិច្ចនៅសហរដ្ឋអាមេរិកពីថ្ងៃទី១៥ដល់១៩ខែឧសភាខាងមុខ។ ដល់ពេលនោះ លោកលាវហឺនឹងធ្វើការពិគ្រោះពិភាក្សាអំពីបញ្ហាសេដ្ឋកិច្ចនិងពាណិជ្ជកម្មរវាងប្រទេសទាំងពីរជាមួយក្រុមការងារសេដ្ឋកិច្ចអាមេរិកដែលដឹកនាំដោយលោកម្នូឈីនរដ្ឋមន្រ្តីហិរញ្ញវត្ថុអាមេរិក។
លោកលូខាងបានថ្លែងថា ប្រទេសចិនរីករាយក្នុងការធ្វើកិច្ចខិតខំរួមគ្នាជាមួយអាមេរិក ដើម្បីជំរុញការពិគ្រោះពិភាក្សាអំពីបញ្ហាសេដ្ឋកិច្ចនិងពាណិជ្ជកម្មជុំថ្មីដែលជិតនឹងបើកធ្វើនេះឲ្យទទួលបានសមិទ្ធផលវិជ្ជមាននិងប្រកបដោយភាពស្ថាបនា៕
