ព្រឹកថ្ងៃទី ១១ ខែឧសភា តាមម៉ោងតំបន់ លោកលីខឺឈាំង នាយករដ្ឋមន្ត្រីចិនបានអញ្ជើញចូលរួមពិធីសម្ពោធបើកវេទិកាអភិបាលខេត្តរវាងចិននិងជប៉ុនព្រមទាំងថ្លែងសុន្ទរកថានៅកោះHokkaido ប្រទេសជប៉ុន ។ លោកនាយករដ្ឋមន្ត្រីជប៉ុនស៊ីនហ្សូអាបេក៏មានវត្តមាននៅក្នុងពិធីសម្ពោធបើកនេះផងដែរ ។
លោកលីខឺឈាំងបានបញ្ជាក់ថា ការផ្លាស់ប្តូរនិងកិច្ចសហប្រតិបត្តិការក្នុងតំបន់ជាចំណែកដ៏សំខាន់ក្នុងទំនាក់ទំនងរវាងចិននិងជប៉ុន ហើយក៏ជាមធ្យោបាយសំខាន់សម្រាប់ជំរុញការរឹតចំណងមិត្តភាពប្រជាជនរវាងប្រទេសទាំងពីរផងដែរ ។ ក្នុងដំណើរទស្សនកិច្ចលើកនេះ រដ្ឋាភិបាលប្រទេសទាំងពីរចិននិងជប៉ុនបានឈានដល់កិច្ចព្រមព្រៀងសហប្រតិបតិ្តការជាច្រើន ដែលបានបង្កើតជាលក្ខណសម្បត្តិនិងចន្លោះដល់ការធ្វើកិច្ចសហប្រតិបត្តិការយ៉ាងស៊ីជម្រៅរវាងតំបន់និងសហគ្រាសនៃប្រទេសទាំងពីរ ។
លោកស៊ីនហ្សូអាបេបានថ្លែងថា ការផ្លាស់ប្តូររវាងទីក្រុងមិត្តភាពនៃប្រទេសជប៉ុននិងចិនទទួលបានការអភិវឌ្ឍជាបន្តបន្ទាប់ បានក្លាយជាកម្លាំងចលករមួយនិងចំណងមិត្តភាពដែលមិនអាចកាច់ផ្តាច់បានក្នុងការពង្រឹងនិងពង្រីកសន្តិភាពនិងមេត្រីភាពរវាងប្រទេសទាំងពីរ ។ ភាគីទាំងពីគួរតែបំផុសកម្លាំងរស់រវើកនៃការប្រាស្រ័យទាក់ទងគ្នាក្នុងតំបន់ថែមទៀត បង្កើនកិច្ចសហប្រតិបត្តិការក្នុងការទប់ទល់នឹងបញ្ហាកើនឡើងនៃក្រុមមនុស្សវ័យចំណាស់ ការអភិវឌ្ឍក្នុងតំបន់និងទេសចរណ៍ជាដើម ដើម្បីជំរុញឲ្យទំនាក់ទំនងយុទ្ធសាស្ត្រដែលផ្តល់ផលប្រយោជន៍ដល់គ្នាទៅវិញទៅមករវាងប្រទេសទាំងពីរទទួលបានការអភវិឌ្ឍ ។
