នៅពេលលោកស៊ីជីនភីងទទួលរ៉ាប់រងនូវមុខតំណែងជាអ្នកដឹកនាំកំពូលនៃបក្សនិងរដ្ឋចិនកាលពីខែវិច្ឆិកាឆ្នាំ២០១២ ប្រទេសចិនកំពុងតែស្ថិតក្នុងដំណាក់កាលជាគន្លឹះសម្រាប់វិវឌ្ឍន៍ឈានចូលដល់សង្គមធូរធារល្មមដោយគ្រប់ជ្រុងជ្រោយ។ក្នុងពេលជាមួយគ្នានេះ ប្រទេសចិនបានក្លាយទៅជាតួអង្គសេដ្ឋកិច្ចធំទី២លើពិភពលោក សេដ្ឋកិច្ចចិនបានក្លាយទៅជាក្បាលម៉ាស៊ីនបញ្ឆេះដ៏សំខាន់នៃកំណើនសេដ្ឋកិច្ចពិភពលោក។ក្នុងឋានៈជាអ្នកដឹកនាំនៃតួអង្គសេដ្ឋកិច្ចនេះ លោកស៊ីជីនភីងបានឈរក្នុងជួរមុខនៅលើឆាកអន្តរជាតិ។
លោកស៊ីជីនភីងបានដឹកនាំបក្សកុម្មុយនិសចិននិងប្រជាជនគ្រប់ជនជាតិនៃប្រទេសចិនខ្នះខ្នែងប្រឈមតទល់នឹងការលំបាកនិងការសាកល្បងលើផ្លូវរីកចម្រើនទៅមុខ ធ្វើកំណែទម្រង់និងបើកចំហឲ្យបានកាន់តែស៊ីជម្រៅយ៉ាងម៉ឺងម៉ាត់មិនងាករេ ខំប្រឹងជំរុញកិច្ចកសាងទំនើបភាវូបនីយកម្មនៃប្រព័ន្ធគ្រប់គ្រងរដ្ឋនិងសមត្ថភាពគ្រប់គ្រងរដ្ឋ ជំរុញកិច្ចកសាងប្រឆាំងអំពើពុករលួយនិងផ្តួចផ្តើមភាពស្អាតស្អំ។ជុំវិញការងារអភិបាលកិច្ចរដ្ឋនិងការគ្រប់គ្រងនយោបាយ លោកស៊ីជីនភីងបានចេញផ្សាយសុន្ទរកថាជាច្រើន បានដាក់ចេញនូវគំនិតថ្មីៗ ទស្សនៈថ្មីៗនិងសេចក្តីសន្និដ្ឋានថ្មីៗជាច្រើនប្រកបដោយអត្ថន័យយ៉ាងជ្រាលជ្រៅ និងបានឆ្លើយតបយ៉ាងច្បាស់នូវបញ្ហាទ្រឹស្តីនិងជាក់ស្តែងដ៏ធំៗនិងសំខាន់ៗក្នុងការអភិវឌ្ឍបក្សនិងរដ្ឋនៅក្រោមលក្ខខ័ណ្ឌនៃប្រវត្តិសាស្រ្តថ្មី ដែលបង្ហាញឲ្យឃើញនូវទស្សនៈអភិបាលកិច្ចរដ្ឋនិងយុទ្ធសាស្រ្តគ្រប់គ្រងនយោបាយរបស់សមូហភាពក្នុងការដឹកនាំមជ្ឈិមបក្សកុម្មុយនិសចិនអាណត្តិថ្មី។
ទស្សនៈនិងយុទ្ធសាស្រ្តទាំងនេះរួមមាន៖ក្នុងកិច្ចការកសាងសេដ្ឋកិច្ច គឺត្រូវប្រកាន់ខ្ជាប់ការអភិវឌ្ឍដោយវិទ្យាសាស្រ្ត។ក្នុងកិច្ចការកសាងនយោបាយ គឺត្រូវប្រកាន់ខ្ជាប់នូវទស្សនៈស្តីពីអំណាចទាំងអស់នៃរដ្ឋជារបស់ប្រជាជន ខ្នះខ្នែងជំរុញការកែទម្រង់ខាងប្រព័ន្ធនយោបាយ ដើរតាមផ្លូវអភិវឌ្ឍន៍សង្គមនិយមដែលមានលក្ខណៈពិសេសនៃប្រទេសចិនយ៉ាងម៉ឺងម៉ាត់មិនងាករេ ត្រូវគោរពតាមគោលការណ៍រដ្ឋធម្មនុញ្ញ ផ្សព្វផ្សាយស្មារតីរដ្ឋធម្មនុញ្ញនិងបំពេញបេសកកម្មរដ្ឋធម្មនុញ្ញ ប្រកាន់ខ្ជាប់ការគ្រប់គ្រងរដ្ឋតាមច្បាប់និងគ្រង់គ្រងនយោបាយតាមរដ្ឋធម្មនុញ្ញ។ក្នុងកិច្ចការកសាងវប្បធម៌ គឺត្រូវយកចិត្តទុកដាក់ដល់ការបណ្តុះបណ្តាលធនធានមនុស្ស និងយកចិត្តទុកដាក់ខ្ពស់ដល់ការបណ្តុះបណ្តាលស្មារតីជនជាតិ។ក្នុងកិច្ចការកសាងសង្គម គឺត្រូវឈរលើសភាពការណ៍ជាតិជាមូលដ្ឋាននៃប្រទេសចិនបច្ចុប្បន្នដែលជាដំណាក់កាលជាជំហានដំបូងនៃសង្គមនិយម ហើយធានានិងកែលំអជីវភាពរស់នៅរបស់ប្រជាជនឥតឈប់ឈរដោយឈរលើមូលដ្ឋានអភិវឌ្ឍសេដ្ឋកិច្ច បង្កើតទស្សនៈសេចក្តីសុខសុភមង្គលដ៏ត្រឹមត្រូវ បង្កើនទស្សនៈស្តីពីការបង្កបង្កើនជីវភាពប្រកបដោយសេចក្តីសុខតាមរយៈការឧស្សាហ៍ព្យាយាមក្នុងការងារ រួមសហការគ្នាដោយចិត្តមួយថ្លើមមួយក្នុងការកសាងសង្គមមួយដ៏ចុះសម្រុងគ្នា។ ក្នុងកិច្ចការកសាងអារ្យធម៌អេកូបរិស្ថាន គឺត្រូវប្រកាន់ខ្ជាប់នូវគោលនយោបាយជាតិជាមូលដ្ឋានស្តីពីការសន្សំសំចៃប្រភពធនធាននិងការពារបរិស្ថាន ដើរលើផ្លូវអភិវឌ្ឍជានិរន្តរភាព ហើយរួមវិភាគទានរបស់ខ្លួនក្នុងការអភិវឌ្ឍជានិរន្តរភាពនៃមនុស្សជាតិឲ្យបានសម្រេចជាស្ថាពរ។
ខាងវិស័យទំនាក់ទំនងអន្តរជាតិ លោកស៊ីជីនភីងបានលើកឡើងនូវទស្សនៈថ្មីៗជាច្រើនអំពីប្រទេសចិនដើរលើផ្លូវអភិវឌ្ឍន៍ដោយសន្តិភាព ការជំរុញការបង្កើតទំនាក់ទំនងបែបថ្មីរវាងមហាប្រទេស ទំនាក់ទំនងការទូតជាមួយប្រទេសជិតខាងឲ្យបានល្អ ការបង្កើនសាមគ្គីភាពនិងកិច្ចសហប្រតិបត្តិការជាមួយប្រទេសកំពុងអភិវឌ្ឍនិងការព្យាយាមខ្នះខ្នែងចូលរួមកិច្ចការពហុភាគីជាដើម ក្នុងនោះរួមមានទាំងការផ្តួចផ្តើមគំនិតស្តីពីយុទ្ធសាស្ត្រខ្សែក្រវាត់មួយនិងផ្លូវមួយ ទស្សនៈចំណងការទូតរាប់អានជាមួយប្រទេសជិតខាង ដើរលើផ្លូវថ្មីដែលរួមសហការគ្នាធ្វើកិច្ចសហប្រតិបត្តិការនិងឈ្នះ–ឈ្នះ ប្រកាន់ខ្ជាប់ទស្សនៈសន្តិសុខខាងនុយគ្លេអ៊ែរប្រកបដោយសតិសម្បជញ្ញៈខ្ពស់ សម្របសម្រួលគ្នានិងអភិវឌ្ឍន៍ជាមួយគ្នា ព្យាយាមខ្នះខ្នែងបង្កើតទស្សនៈស្តីពីសន្តិសុខអាស៊ី ធ្វើឲ្យអារ្យធម៌គ្រប់បែបយ៉ាងមានការផ្លាស់ប្តូរនិងរៀនសូត្រពីគ្នាទៅវិញទៅមក គៀកស្មាគ្នាធ្វើកិច្ចសហប្រតិបត្តិការ សម្រេចការអភិវឌ្ឍជាមួយគ្នា រួមគ្នាគាំពារនិងអភិវឌ្ឍសេដ្ឋកិច្ចពិភពលោកបែបបើកចំហ។ល។
បច្ចុប្បន្ននេះ សហគមន៍អន្តរជាតិកាន់តែមានការផ្តោតសំខាន់ទៅលើប្រទេសចិនជារៀងរាល់ថ្ងៃ។តើប្រទេសចិនបច្ចុប្បន្ននឹងកើតមានការប្រែប្រួលអ្វីខ្លះ?តើប្រទេសចិនដែលកំពុងអភិវឌ្ឍនឹងជះឥទ្ធិពលអ្វីខ្លះចំពោះពិភពលោក?ប្រការទាំងនេះកាន់តែក្លាយទៅជាបញ្ហាដែលសហគមន៍អន្តរជាតិចាប់អារម្មណ៍យ៉ាងទូលំទូលាយ។ដើម្បីឆ្លើយតបទៅនឹងការតាមដានយកចិត្តទុកដាក់របស់សហគមន៍អន្តរជាតិ ក៏ដូចជាបង្កើនការស្វែងយល់របស់សហគមន៍អន្តរជាតិចំពោះទស្សនៈអភិវឌ្ឍន៍ ផ្លូវអភិវឌ្ឍន៍និងគោលនយោបាយទាំងក្នុងនិងក្រៅប្រទេសរបស់ប្រទេសចិន ការិយាល័យព័ត៌មាននៃក្រុមប្រឹក្សាកិច្ចការរដ្ឋចិនបានរួមជាមួយការិយាល័យស្រាវជ្រាវឯកសារនៃមជ្ឈិបក្សកុម្មុយនិសចិននិងអគ្គនាយកដ្ឋានបោះពុម្ពផ្សាយភាសាបរទេសចិនបានចងក្រងសៀវភៅឈ្មោះ"លោកស៊ីជីនភីងថ្លែងពីអភិបាលកិច្ចរដ្ឋនិងការគ្រប់គ្រងនយោបាយ" សៀវភៅនេះបានចងក្រងស្នាដៃនិពន្ធដ៏សំខាន់របស់លោកស៊ីជីនភីងក្នុងអំឡុងពេលចាប់ពីថ្ងៃ១៥ខែវិច្ឆិកាឆ្នាំ២០១២ដល់ថ្ងៃទី១៣ខែមិថុនាឆ្នាំ២០១៤ រួមទាំងអស់មានសុន្ទរកថា ការសន្ទនា សំណួរចម្លើយ សេចក្តីបង្គាប់និងសារលិខិតជូនពរចំនួន៧៩។ក្រៅពីនេះសៀវភៅនេះក៏មានរូបថតរបស់លោកស៊ីជីនភីងតាមសម័យនីមួយៗចំនួន៤៥សន្លឹក ដើម្បីជាជំនួយដល់អ្នកអានយល់ដឹងបន្ថែមពីការងារនិងជីវភាពរស់នៅរបស់លោកផងដែរ។
សៀភៅឈ្មោះ"លោកស៊ីជីនភីងថ្លែងពីអភិបាលកិច្ចរដ្ឋនិងការគ្រប់គ្រងនយោបាយ"ចាប់តាំងពីបានត្រូវចងក្រងរួចមកក៏បានទទួលការគាំទ្រស្វាគមន៍យ៉ាងរាក់ទាក់កក់ក្តៅនិងត្រូវបានបកប្រែជាច្រើនភាសានិងបានបោះពុម្ពផ្សាយនៅក្នុងប្រទេសចិន។ជាមួយគ្នានេះដែរ សៀវភៅនេះក៏ត្រូវបានរាជបណ្ឌិត្យសភាកម្ពុជាបកប្រែជាភាសាខ្មែរនៅឆ្នាំ២០១៥ ដើម្បីបោះពុម្ពផ្សាយនៅប្រទេសកម្ពុជាផងដែរ។
នៅដើមខែកុម្ភៈឆ្នាំ២០១៥ នៅរាជធានីភ្នំពេញធ្លាប់បានរៀបចំកិច្ចប្រជុំធ្វើបទឧទ្ទេសនាមនិងពិភាក្សាស្រាវជ្រាវអំពីសៀវភៅនេះម្តងរួចមកហើយ។តាមដឹង ប្រទេសកម្ពុជាគឺជាប្រទេសទី១ដែលតាងនាមឲ្យប្រទេសជាតិរបស់ខ្លួនរៀបចំកិច្ចប្រជុំធ្វើបទឧទ្ទេសនាមនិងពិភាក្សាស្រាវជ្រាវអំពីសៀវភៅ"លោកស៊ីជីនភីងថ្លែងពីអភិបាលកិច្ចរដ្ឋនិងការគ្រប់គ្រងនយោបាយ"។ នាពេលនោះ ឯកឧត្តមសុខអាន ឧបនាយករដ្ឋមន្រ្តីកម្ពុជា លោកជំទាវខ្លូតធីតា ប្រធានរាជបណ្ឌិត្យសភាកម្ពុជានិងលោកជំទាវBuJianguoឯកអគ្គរដ្ឋទូតប្រទេសចិនប្រចាំនៅកម្ពុជាព្រមនិងមន្រ្តីនិងវិជ្ជាករចំនួនជាច្រើនរយរូបបានមានវត្តមានក្នុងកិច្ចប្រជុំលើកនេះ។ លោកជំទាវខ្លូតធីតាបានមានប្រសាសន៍ថា កិច្ចប្រជុំលើកនេះបានផ្តល់ឱកាសដ៏មានតម្លៃមួយដល់មន្រ្តីរាជរដ្ឋាភិបាលនិងវិជ្ជាករកម្ពុជាសម្រាប់ស្វែងយល់ពីអភិបាលកិច្ចរដ្ឋនិងការគ្រប់គ្រងនយោបាយរបស់ប្រទេសចិន។
ក្នុងការថ្លែងសុន្ទរកថានាពេលនោះ ឯកឧត្តមឧបនាយករដ្ឋមន្រ្តីសុខអានបានវាយតម្លៃខ្ពស់ចំពោះសៀវភៅ"លោកស៊ីជីនភីងថ្លែងពីអភិបាលកិច្ចរដ្ឋនិងការគ្រប់គ្រងនយោបាយ"នេះ ឯកឧត្តមបានថ្លែងថា៖"សៀវភៅនេះជាសៀភៅដែលចាំបាច់ត្រូវតែអានមួយក្បាល ជាពិសេសគឺនិយាយចំពោះមនុស្សដែលមានចំណាប់អារម្មណ៍បង្កើនការយល់ដឹងពីប្រទេសចិននិងទិសដៅនៅពេលអនាគតរបស់ប្រទេសចិន។"សៀវភៅនេះបានអធិប្បាយដោយគ្រប់ជ្រុងជ្រោយពីទស្សនៈរបស់លោកប្រធានរដ្ឋចិនស៊ីជីនភីងចំពោះទស្សនវិជ្ជា អភិបាលកិច្ចរដ្ឋ កំណែទម្រង់ ប្រវត្តិសាស្រ្តនិងពិភពលោក ព្រមនិងការគិតគូរចំពោះរូបភាពអភិបាលកិច្ចរដ្ឋរបស់លោក ក្នុងពេលជាមួយគ្នានេះ ក៏បង្ហាញឲ្យឃើញនូវថាមពលនិងការយល់ឃើញវែងឆ្ងាយរបស់លោកប្រធានរដ្ឋចិនស៊ីជីនភីងផងដែរដែលបានបង្ហាញតាមរូបភាពយ៉ាងច្បាស់និងបើកចំហទៅកាន់មជ្ឈដ្ឋានខាងក្រៅនូវទស្សនវិជ្ជានិងគោលនយោបាយរបស់លោក។ឯកឧត្តមសុខអានបានគូសបញ្ជាក់ថា ឆ្លងតាមការអានសៀវភៅនេះ មិនគ្រាន់តែអាចស្វែងយល់ពីទស្សនៈនិងយុទ្ធសាស្រ្តក្នុងអភិបាលកិច្ចរដ្ឋរបស់ថ្នាក់ដឹកនាំប្រទេសចិនប៉ុណ្ណោះទេ ថែមទាំងក៏អាចយកមកធ្វើជាមេរៀនសម្រាប់ឲ្យប្រទេសកម្ពុជាគ្រោងធ្វើនយោបាយអភិវឌ្ឍន៍ផងដែរ ឯកឧត្តមសង្ឃឹមសៀវភៅ"លោកស៊ីជីនភីងថ្លែងពីអភិបាលកិច្ចរដ្ឋនិងការគ្រប់គ្រងនយោបាយ"ជាភាសាខ្មែរអាចត្រូវបោះពុម្ពផ្សាយក្នុងរយៈពេលដ៏ខ្លីខាងមុខ ដើម្បីឲ្យអ្នកអានកម្ពុជាកាន់តែច្រើនរៀននិងសិក្សាស្រាវជ្រាវ៕
