នៅថ្ងៃទី២២ខែវិចិ្ឆកាតាមម៉ោងតំបន់ សន្និសីទកំពូលអាស៊ីបូព៌ាលើកទី១០បានបើកធ្វើនៅក្រុងគូឡាលំពួ រដ្ឋធានីប្រទេសម៉ាឡេស៊ី ។ លោក Li Keqiang នាយករដ្ឋមន្ត្រីចិនបានអញ្ជើញចូលរួមក្នុងសន្និសីទនេះ ហើយបានធ្វើអធិប្បាយយ៉ាងពិស្តារនូវមតិនិងសំណើអំពីទិសដៅអភិវឌ្ឍន៍នៅពេលអនាគតនៃសន្និសីទកំពូលអាស៊ីបូព៌ា ព្រមនិងលើកឡើងការផ្តើមគំនិត៥ចំណុចអំពីបញ្ហាសមុទ្រចិនខាងត្បូងទៀតផង ។ ថ្ងៃដដែល លោក Liu Zhen min អនុរដ្ឋមន្ត្រីការបរទេសចិនបានបើកធ្វើសន្និសីទអ្នកសារព័ត៌មានចិននិងបរទេសអំពីគោលជំហរនិងសំណើរបស់ភាគីចិន ខាងក្រោមនេះ សូមអញ្ជើញទស្សនាព័ត៌មានពិស្តាររបស់វិទ្យុយើងខ្ញុំ ។
សន្និសីទកំពូលអាស៊ីបូព៌ាលើកទី១០បានបើកធ្វើនៅក្រុងគូឡាឡាំពួពីថ្ងៃទី២២ខែវិចិ្ឆកា លោក Li Keqiang នាយករដ្ឋមន្ត្រីចិនបានអញ្ជើញចូលរួមសន្និសីទហើយបានលើកឡើងនូវសំណើមួយចំនួនរបស់ប្រទេសចិនអំពីកិច្ចសហប្រតិបត្តិការអាស៊ីបូព៌ានៅពេលអនាគត ។ ថ្ងៃដដែល លោក Liu Zhen min អនុរដ្ឋមន្ត្រីការបរទេសចិនបានបង្ហើបឲ្យដឹងក្នុងសន្និសីទអ្នកសារព័ត៌មានថា លោក Li Keqiang នាយករដ្ឋមន្ត្រីចិនបានអធិប្បាយនូវមតិនិងសំណើរបស់ភាគីចិនអំពីទិសដៅអភិវឌ្ឍន៍នៅពេលអនាគតនៃសន្និសីទកំពូលអាស៊ីបូព៌ាដោយគូសបញ្ជាក់ថា សន្និសីទកំពូលអាស៊ីបូព៌ាត្រូវបន្តប្រកាន់ខ្ជាប់ឋានៈណែនាំរបស់អាស៊ាន ប្រកាន់ខ្ជាប់ការអភិវឌ្ឍន៍និងសុខសន្តិភាពជាមួយគ្នា ហើយប្រកាន់ខ្ជាប់ការអភិវឌ្ឍន៍នូវកិច្ចសម្របសម្រួលរវាងសន្និសីទកំពូលអាស៊ីបូព៌ានិងយន្តការផ្សេងទៀត ។
លោកLiu Zhenminបានថ្លែងថា ឆ្នាំនេះជាខួបឆ្នាំទី១០នៃការបង្កើតសន្និសីទកំពូលអាស៊ីខាងកើត សន្និសីទបានចេញផ្សាយសេចក្តីប្រកាសក្រុងគូឡាឡាំពួរស្តីពីការរំលឹកខួបឆ្នាំទី១០នៃការបង្កើតសន្និសីទកំពូលអាស៊ីខាងកើត ។ សន្និសីទកំពូលអាស៊ីខាងកើត លើកនេះទទួលបានសមិទ្ធផលយ៉ាងច្រើន ក្នុងនោះ ភាគីចិនបានចេញវិភាគទានដ៏សំខាន់សំរាប់សន្និសីទលើកនេះ ។ សន្និសីទបានបញ្ជាក់ថា នឹងពន្យារពេលអនុវត្តន៍ផែនការនៃ
សេចក្តីប្រកាសអំពីការអភិវឌ្ឍន៍នៃទីក្រុងភ្នំពេញ ដែលលើកឡើងដោយភាគីចិន រហូតដល់ឆ្នាំទី២០១៧ ហើយគូសបញ្ជាក់ថា នឹងបន្តបង្កើនកិច្ចសហប្រតិបត្តិការក្នុងវិស័យសំខាន់ចំនួន៦មាន ដូចជា ថាមពលស្អាត ហិរញ្ញវត្ថុអប់រំ ការគ្រប់គ្រងគ្រោះថ្នាក់ សុខាភិបាលសាធារណៈនិងការភ្ជាប់គ្នាវាងអាស៊ានជាដើម ។
លោកLiu Zhenminបានថ្លែងថា សន្និសីទលើកនេះនៅបានអនុម័តលើសេចក្តីថ្លែងការណ៍អំពីការបង្កើនកិច្ចសហការលើសមុទ្រក្នុងតំបន់ ដែលមានប្រទេសឥណ្ឌូណេស៊ី ចិនអាមេរិកអូស្ត្រាលីនិងនូវ៉ែលហ្សេឡង់ចូលរួមដោយ បានចង្អុលទិសដៅយ៉ាងច្បាស់លាស់សំរាប់ការជំរុញការអភិវឌ្ឍន៍ជានិរន្តរភាពនៃសេដ្ឋកិច្ចលើសមុទ្រ ការបង្កើនការការពារបរិស្ថានលើសមុទ្រ និងការគាំពារសន្តិសុខលើសមុទ្រជាដើម ក្នុងតំបន់ដែលមានប្រទេសជាសមាជិកចំនួន១៨នៃសន្និសីទកំពូលអាស៊ីខាងកើត ។
លោកLiu Zhenminបានថ្លែងថា ក្នុងកិច្ចប្រជុំកំពូលអាស៊ីបូព៌ានៅថ្ងៃដដែល លោកលីឃឺឈាំងក៏បានលើកឡើងនូវសេចក្តីសំណើរ៥ចំណុចស្តីអំពីបណ្តាប្រទេសរួមគ្នាគាំពារសន្តិភាពនិងស្ថិរភាពនៃសមុទ្រចិនខាងត្បូង ហើយបានគូសបញ្ជាក់ថាសេរីភាពសម្រាប់នាវាចរណ៍និងការហោះហើរនៅសមុទ្រចិនខាងត្បូងតាំងពីដើមមកគឺសុទ្ធតែគ្មានបញ្ហាទាល់តែសោះ ប្រទេសចិនជាអ្នកគាំពារយ៉ាងមុតមាំនៃសេរីភាពនាវាចរណ៍និងការហោះហើរនៅសមុទ្រចិនខាងត្បូង ពេលបណ្តាប្រទេសអនុវត្តសិទ្ធិនាវាចរណ៍និងការហោះហើរក៏ត្រូវគោរពយ៉ាងពេញលេញនូវអធិបតេយ្យភាពនិងសន្តិសុខរបស់ប្រទេសតាមបណ្តោយឆ្នេរសមុទ្រដែរ ។
ពេលឆ្លើយសំនួរអំពីប្រទេសចិនកំពុងអនុវត្តវិស្វកម្មកសាងនៅថ្មប៉ប្រះទឹកក្នុងសមុទ្រចិនខាងត្បូង លោកLiu Zhenminបានថ្លែងថា ប្រទេសចិនអនុវត្តវិស្វកម្មកសាងនៅលើថ្មប៉ប្រះទឹកដែលស្ថិតក្រោមការគ្រប់គ្រងរបស់ខ្លូនក្នុងប្រជុំកោះណានសាគឺដើម្បីផ្តល់លក្ខខ័ណ្ឌសម្រាប់ជីវភាពនិងការងារកាន់តែល្អដល់បុគ្គលិកនៅលើថ្មប៉ប្រះទឹក ក៏ដើម្បីបង្កើតលក្ខខ័ណ្ឌសម្រាប់ប្រទេសចិនក្នុងការអនុវត្តកាតព្វកិច្ចអន្តរជាតិនិងដើម្បីផ្តល់សេវាកម្មសាធារណៈដល់ប្រទេសក្នុងតំបន់ផងដែរ ។
ចំពោះរដ្ឋាភិបាលហ្វីលីពីនដែលមានបំណងប្រគល់ការវិវាទនៃសមុទ្រចិនខាងត្បូងដាក់ទៅឲ្យតុលាការកាត់ក្តីអន្តរជាតិដោយឯកតោភាគី លោកLiu Zhenminបានគូសបញ្ជាក់ថា ប្រទេសចិននិងហ្វីលីពីនជាប្រទេសជាប់ជិតខាងគ្នា មានការវិវាទគឺជារឿងធម្មតា បញ្ហាគន្លឹះគឺតើត្រូវដោះស្រាយការវិវាទយ៉ាងដូចម្តេច ។ ឆ្នាំនេះជាឆ្នាំខួបទី៤០រវាងប្រទេសចិននិងហ្វីលីពីនដែលបានបង្កើតទំនាក់ទំនងការទូតជាមួយគ្នា ប្រជាជននៃប្រទេសទាំងពីរបានរក្សាទំនាក់ទំនងមិត្តភាពជាប់រហូត រដ្ឋាភិបាលចិននិងរដ្ឋាភិបាលហ្វីលីពីនគ្រប់អាណត្តិក៏បានរក្សាទំនាក់ទំនងជាមួយគ្នាបានល្អប្រសើរស្តីអំពីការដោះស្រាយការវិវាទទ្វេភាគីដោយសមរម្យ ។ ចំពោះការវិវាទលើសមុទ្រដែលមានស្រាប់របស់ប្រទេសទាំងពីរនាពេលបច្ចុប្បន្ននេះ ភាគីចិននៅតែប្រកាន់ខ្ជាប់នូវការដោះស្រាយដោយឆ្លងតាមការចរចាទ្វេភាគី ។
