ព្រឹកថ្ងៃទី២២ខែវិចិ្ឆកាតាមម៉ោងតំបន់ លោក Li Keqiang នាយករដ្ឋមន្ត្រីចិនបានអញ្ជើញចូលរួមសន្និសីទកំពូលអាស៊ីបូព៌ាលើកទី១០នៅមជ្ឈមណ្ឌលសន្និសីទអន្តរជាតិក្រុងគូឡាឡាំពួ ។ នៅក្នុងសន្និសីទនោះមានការអញ្ជើញចូលរួមពីអ្នកដឹកនាំរបស់ប្រទេសអាស៊ាន១០ លោកស្រី Park Geun-hye ប្រធានាធិបតីកូរ៉េខាងត្បូង លោក Shinzo Abe នាយករដ្ឋមន្ត្រីជប៉ុន លោក Obama ប្រធានាធិបតីអាមេរិក លោក Medvedev នាយករដ្ឋមន្ត្រីរុស្ស៊ី លោក Modi នាយករដ្ឋមន្ត្រីឥណ្ឌា លោក Malcolm Turnbull នាយករដ្ឋមន្ត្រីអូស្ត្រាលី លោក John Phillipkey នាយករដ្ឋមន្ត្រីនូវ៉ែលហ្សេឡង់និងលោក Ban ki-moon អគ្គលេខាធិការអង្គការសហប្រជាជាតិផងដែរ ។ ចំណែកលោក Najib នាយករដ្ឋមន្ត្រីម៉ាឡេស៊ីអញ្ជើញធ្វើជាអធិបតីក្នុងអង្គសន្និសីទនេះ ។
លោក Li Keqiang បានថ្លែងក្នុងសុន្ទរកថាថា សន្និសីទកំពូលអាស៊ីបូព៌ាបានបង្កើតឡើងអស់រយៈពេល១០ឆ្នាំហើយ ១០ឆ្នាំនេះជាការអភិវឌ្ឍន៍យ៉ាងឆាប់រហ័សនៃកិច្ចសហប្រតិបត្តិការអាស៊ីបូព៌ា ជា១០ឆ្នាំដែលប្រទេសនានាចែករំលែកសមិទ្ធផលនៃភាពរុងរឿង ហើយក៏ជា១០ឆ្នាំដែលកម្លាំងឥទ្ធិពលនៃសន្និសីទកំពូលអាស៊ីបូព៌ាពង្រីកខ្លួនឥតឈប់ឈរដែរ ។ ឈរលើចំណុចចាប់ផ្តើមដែលថ្មីនេះ យើងត្រូវបន្តប្រកាន់ខ្ជាប់ឋានៈណែនាំរបស់អាស៊ាន ប្រកាន់ខ្ជាប់ការអភិវឌ្ឍន៍ដោយចុះសម្រុងគ្នានៃយន្តការនានា ។ លោក Li Keqiang បានលើកឡើងអំពីកិច្ចសហប្រតិបត្តិការនៃសន្និសីទកំពូលនៅពេលអនាគតថា៖
ទីមួយ បង្កើនល្បឿនជំរុញសមាហរណកម្មផ្នែកសេដ្ឋកិច្ចក្នុងតំបន់ ធ្វើឲ្យអាស៊ីបូព៌ាក្លាយទៅជាប៉ូលដែលមានកំណើនដោយនឹងនររបស់សេដ្ឋកិច្ចពិភពលោក ។
ទីពីរ សកម្មធ្វើការចរចាលើផ្នែកសន្និសុខនយោបាយ ស្វែងរកនិងពិភាក្សាអំពីការបង្កើតរចនាសម្ព័ន្ធសន្តិសុខដែលសមស្របនឹងតំបន់នេះ ។
ទីបី បង្កើនការចរចានិងការផ្លាស់ប្តូរខាងអរិយធម៌អាស៊ី ជំរុញការរួមរស់ជាមួយគ្នាដោយមេត្រីភាពក្នុងខណៈដែលប្រទេសមានវប្បធម៌ខុសគ្នា ។
