កាលពីថ្ងៃទី១៥ខែសីហាតាមម៉ោងតំបន់ សារមន្ទីររំលឹកសង្គ្រាមប្រឆាំងជប៉ុនឈ្លានពានទីមួយនៅក្រៅប្រទេសបានប្រកាសបើកជាផ្លូវការនៅ Chinatown នៃទីក្រុង San Francisco ប្រទេសអាមេរិក ។ សារមន្ទីររំលឹកដែលត្រូវបានអាណិកជនចិននិងជនចិនកាន់សញ្ជាតិបរទេសនៅក្រៅប្រទេសផ្តល់ប្រាក់ទុននិងវិភាគទានកសាងឡើងនេះគឺមានគោលបំណងជួយមនុស្សជំនាន់ក្រោយរៀនសូត្រពីមេរៀនក្នុងប្រវត្តិសាស្ត្រនិងគោរពប្រវត្តិសាស្ត្រ ហើយយកចិត្តទុកដាក់ថែរក្សាសន្តិភាព ។ រីឯពេលកន្លងទៅនេះ សេចក្តីថ្លែងការណ៍របស់លោក Shinzo Abe នាយករដ្ឋមន្ត្រីជប៉ុនក្នុងខួបឆ្នាំទី៧០បន្ទាប់ពីសង្គ្រាមលោកលើកទីពីរបានបញ្ចប់ក៏ត្រូវបានមតិអាមេរិកធ្វើការរិះគន់ជាឯកច្ឆ័ន្ទដែរ បញ្ញវន្តអាមេរិកក៏បានអំពាវនាវឲ្យជប៉ុនរ៉ាប់រងភារកិច្ចរបស់ខ្លួនទៀតផង ។
ថ្ងៃទី១៥ខែសីហា លោកស្រី Fang Li bangqin ឥស្សរជនខាងសកម្មភាពសង្គមរបស់ជនជាតិចិនដ៏ល្បីឈ្មោះនៅទីក្រុង San Francisco ប្រទេសអាមេរិកបានមានប្រសាសន៍យ៉ាងរំភើបចិត្តថា ឆ្លងកាត់ការត្រៀមបម្រុងយ៉ាងតានតឹងអស់រយៈពេល៤០០ថ្ងៃមក សារមន្ទីររំលឹកសង្គ្រាមប្រឆាំងជប៉ុនឈ្លានពានទីមួយនៅក្រៅប្រទេសបានប្រកាសបើកជាផ្លូវការនៅក្នុងទិវារំលឹកខួបឆ្នាំទី៧០នៃថ្ងៃដែលជប៉ុនប្រកាសសុំចុះចាញ់ដោយឥតលក្ខខ័ណ្ឌ លោកស្រី Fang Li bangqin បានថ្លែងក្នុងពិធីសម្ពោធបើកសារមន្ទីរនោះថា ខ្ញុំបានឃើញផ្ទាល់ភ្នែកនិងបានឆ្លងកាត់គ្រោះមហន្តរាយនៃសង្គ្រាម ។ សារមន្ទីររំលឹកនេះគឺចង់ប្រាប់មនុស្សជំនាន់ក្រោយរបស់យើងថា ពេលផ្ទុះសង្គ្រាមតើមានរឿងអ្វីបានកើតឡើងនិងនាំឲ្យពួកគេយល់កាន់់តែច្បាស់អំពីភាពឃោរឃៅនៃសង្គ្រាម ហើយគោរពប្រវត្តិសាស្ត្រនិងថែរក្សាសន្តិភាពឲ្យបានគងវង្ស ។
