លោកស៊ីជីនភីង ប្រធានរដ្ឋចិនព្រមទាំងឧត្តមភរិយាលោកស្រី Peng Liyuan បានចូលរួមទស្សនាមហោស្រពវប្បធម៌អាស៊ីជាមួយមេដឹកនាំអន្តរជាតិនានាដែលអញ្ជើញចូលរួមក្នុងកិច្ចប្រជុំសន្ទនាស្តីពីអរិយធម៌អាស៊ីនៅក្រុងប៉េកាំងនាយប់ថ្ងៃទី ១៥ ខែឧសភា ។
លោកស៊ីជីនភីងបានតំណាងឲ្យរដ្ឋាភិបាលនិងប្រជាជនចិនដើម្បីសម្តែងការអបអរស្វាគមន៍យ៉ាងរាក់ទាក់កក់ក្តៅចំពោះភ្ញៀវកិត្តិយសនិងសិល្បៈករនៃបណ្តាប្រទេសនានា ។
មហោស្រពវប្បធម៌នេះបានប្រារព្ធឡើងក្រោមប្រធានបទស្តីពី” មហោស្រពយុវវ័យ ធ្វើឲ្យសុបិនអាស៊ីកា្លយជាការពិត “ ។ មហោស្រពនេះជាសកម្មភាពដ៏សំខាន់មួយនៃកិច្ចប្រជុំសន្ទនាស្តីពីអរិយធម៌អាស៊ី ។ លោកបានថ្លែងថា
បណ្តាប្រទេសនានានៅអាស៊ីមានអរិយធម៌បុរាណដ៏ត្រចះត្រចង់ មានលក្ខណៈពិសេសរៀងៗខ្លួន មានភាពចុះសម្រុងគ្នាដើម្បីរួមរស់នៅជាមួយគ្នា ។ ពិពិធកម្មអរិយធម៌អាស៊ីបានធ្វើឲ្យវប្បធម៌អាស៊ីពោរពេញទៅដោយកម្លាំងរស់រវើកជានិរន្តរភាព ។ ក្នុងយប់នេះ តាមរយៈសិល្បៈនឹងតភ្ជាប់ដួងចិត្តនិងគំនិតនៃជនជាតិនានា ដើម្បីបង្ហាញទៅកាន់ពិភពលោកឲ្យឃើញពីអរិយធម៌មួយដែលមានភាពត្រចេះត្រចង់ កម្លាំងរស់រវើក សន្តិភាពនិងការអភិវឌ្ឍ ។
លោក ស៊ី ជីនភីង បានគូសបញ្ជាក់ថា ប្រទេសចិនរំពឹងទុកយ៉ាងមុតមាំថា បណ្តាប្រទេសអាស៊ីនានាអាចជួយយកអាសាគ្នាទៅវិញទៅមក និងរួមសុខរួមទុក្ខ ដើរឆ្ពោះទៅមុខក្នុងបុព្វហេតុនៃការរីកចម្រើននៃពិភពលោក ក៏ដូចជាទទួលបាននូវការអភិវឌ្ឍក្នុងបរិបទនៃការអភិវឌ្ឍពិភពលោក ក្នុងន័យចាប់ដៃគ្នានិងរួមគ្នាបង្កើតអនាគតកាន់តែល្អបវរដល់អាស៊ីនិងពិភពលោក ។
សូមបញ្ជាក់ថានាយល់ថ្ងៃដដែល មហោស្រពវប្បធម៌អាស៊ីបានសម្តែងកម្មវិធីសិល្បៈចំនួន១៤ បានបង្ហាញឲ្យឃើញនូវអរិយធម៌អាស៊ីដ៏ល្អផូរផង់ឥតខ្ចោះនិងមានប្រវតិ្តសាស្ត្រយូរអង្វែង ហើយក៏បានពិពណ៌នាផ្លូវសូត្រដែលមានកំណើតតាំងពីបុរាណកាលមករហូតដល់ពេលបច្ចុប្បន្ន ក៏ដូចជាទស្សនទានដ៏ល្អបរវរបស់បណ្តាប្រទេសនានាលើពិភពលោកក្នុងការរួមគ្នាកសាងនិងចែករំលែកអនាគតប្រកបដោយសុភមង្គល ។
អ្នកច្រៀងវ័យក្មេងនិងក្រុមតន្ត្រីករនៃប្រទេសជាច្រើនបានចូលរួមប្រគំនិងច្រៀងនូវបទចម្រៀងរួមគ្នាក្រោមចំណងជើង «អាស៊ីរបស់យើង/ Our Asia» ដែលជាចម្រៀងតំណាងនៃព្រឹត្តិការណ៍មហោស្រពវប្បធម៌អាស៊ីនេះ ។ លោក Andrea Bocelli អ្នកចម្រៀងសំឡេងខ្ពស់ល្បីឈ្មោះលើលោកដែលមកពីប្រទេសអ៊ីតាលី ក៏បានអញ្ជើញចូលរួមសម្តែង។
បិទបញ្ចប់កម្មវិធីត្រូវបានកំដដោយបទចម្រៀងដែលមានចំណងជើងថា « ភាពត្រចះត្រចង់នៃអាស៊ី/ Splendour of Asia» បង្កប់នូវខ្លឹមសារបង្ហាញពីសំឡេងចេញពីដួងចិត្តរបស់ប្រជាជនទ្វីបអាស៊ី ក្នុងស្មារតីរួមវាសនាជាមួយគ្នា ចែករំលែកសុភមង្គលជាមួយគ្នា។
ទស្សនិកជននិងគណៈប្រតិភូចំនួនប្រហែល ៣ ម៉ឺននាក់បានចូលរួមទស្សនាមហោស្រពវប្បធម៌ដ៏ឱឡារិកមួយនេះ៕
