កាលពីថ្ងៃទី ២៤ ខែធ្នូ រដ្ឋបាលភូមិភាគស្វយ័តវៃវូអឺស៊ីនជាំងប្រទេសចិនបានចេញសេចក្តីថ្លែងការណ៍ស្តីពីការដែលសហរដ្ឋអាមេរិកបានចុះហត្ថលេខាលើអ្វីដែលហៅថា “សេចក្តីព្រាងច្បាប់ស្តីពីការបង្ការការបង្ខំឱ្យធ្វើពលកម្មនៅភូមិភាគស្វយ័តវៃវូអឺស៊ីនជាំងប្រទេសចិន" ។
សេចក្តីថ្លែងការណ៍នេះបានលើកឡើងថា សហរដ្ឋអាមេរិកធ្វើបែបនេះគឺប៉ុនប៉ងដកហូតសិទ្ធិរបស់ប្រជាជនគ្រប់ជនជាតិនៃភូមិភាគស្វយ័តវៃវូអឺស៊ីនជាំងក្នុងការស្វែងរកជីវភាពរស់នៅកាន់តែប្រសើរឡើងតាមរយៈការធ្វើពលកម្មនិងបំពេញការងារ ព្រមទាំងទប់ស្កាត់ការអភិវឌ្ឍប្រកបដោយស្ថិរភាពនៃភូមិភាគស្វយ័តវៃវូអឺស៊ីនជាំង ដើម្បីសម្រេចគោលដៅដ៏អាក្រក់ដែលយកបញ្ហាតំបន់ស៊ីនជាំងមកគាបសង្កត់ប្រទេសចិន។ចំពោះបញ្ហានេះ ភូមិភាគស្វយ័តវៃវូអឺស៊ីនជាំងនិងប្រជាជនគ្រប់ជនជាតិក្នុងស៊ីនជាំងបានថ្កោលទោសយ៉ាងខ្លាំងក្លា និងប្រឆាំងតវ៉ាជាដាច់ខាត។
ក្នុងប៉ុន្មានឆ្នាំកន្លងមកនេះ ទន្ទឹមពេលខិតខំប្រឹងប្រែងជំរុញឱ្យបង្កើនឱកាសការងារ ភូមិភាគស្វយ័តវៃវូអឺស៊ីនជាំងបានគោរពយ៉ាងពេញលេញនូវគោលបំណងរបស់កម្មករក្នុងការជ្រើសរើសឱកាសការងារ និងគាំពារយ៉ាងម៉ឺងម៉ាត់នូវសិទ្ធិនិងផលប្រយោជន៍ស្របច្បាប់របស់កម្មករ ពោលគឺមិនមានបញ្ហាអ្វីដូចគេលើកឡើងថា "បង្ខំឱ្យធ្វើពលកម្ម" នោះទេ។