ទាក់ទិននឹងរឿងដែលអាមេរិកគ្រោងនឹងអនុវត្តបទបញ្ជាហាមឃាត់មុខជំនាញរបស់សហគ្រាសជាម្ចាស់កម្មវិធីAPPចំនួន៨របស់ចិន អ្នកនាំពាក្យក្រសួងពាណិជ្ជកម្មចិនបានថ្លែងសុន្ទរកថាកាលពីថ្ងៃទី៦ខែមករា ដោយលើកឡើងថា ភាគីចិនប្រឆាំងយ៉ាងដាច់ខាតចំពោះទង្វើខុសឆ្គងរបស់ភាគីអាមេរិក នឹងគាំទ្រយ៉ាងមុតមាំដល់សហគ្រាសចិនក្នុងការគាំពារសិទ្ធិនិងផលប្រយោជន៍ស្របច្បាប់របស់ខ្លួន ព្រមទាំងនឹងរក្សាទុកសិទ្ធិចាត់វិធានការឆ្លើយតបវិញដ៏ចាំបាច់ផងដែរ។
គួរបញ្ជាក់ថា ពេលកន្លងទៅថ្មីៗនេះ លោកត្រាំប្រធានាធិបតីអាមេរិកបានចុះហត្ថលេខាលើបទបញ្ជាប្រតិបត្តិ ដោយហាមជនជាតិអាមេរិក មិនឱ្យធ្វើការជួញដូរជាមួយស្ថាបនិកឬអ្នកគ្រប់គ្រងកម្មវិធីAPPរបស់ចិនចំនួន៨ដូចជាAlipay QQនៃក្រុមហ៊ុនTencentនិងWeChatទូទាត់ប្រាក់ជាដើម។
អ្នកនាំពាក្យចិនបានថ្លែងថា ទង្វើរបស់អាមេរិកបានល្មើសនឹងគោលការណ៍ប្រកួតប្រជែងដោយយុត្តិធម៌ ល្មើសនឹងក្បួនច្បាប់ផ្នែកសេដ្ឋកិច្ចនិងពាណិជ្ជកម្មអន្តរជាតិ បានបំផ្លាញដល់របៀបរៀបរយទីផ្សារប្រក្រតី ធ្វើឱ្យប៉ះពាល់ដល់សិទ្ធិនិងផលប្រយោជន៍ស្របច្បាប់របស់សហគ្រាសចិន ហើយក៏ធ្វើឱ្យប៉ះពាល់ដល់ផលប្រយោជន៍របស់អ្នកប្រើប្រាស់យ៉ាងច្រើនកុះករក្នុងនោះបូករួមទាំងអ្នកប្រើប្រាស់អាមេរិកផង ក៏ដូចជានឹងបន្សោយជំនឿចិត្តរបស់អ្នកវិនិយោគលើសកលលោកចំពោះបរិយាកាសប្រកបអាជីវកម្មរបស់អាមេរិកផងដែរ។ ប្រទេសចិនប្រឆាំងយ៉ាងដាច់ខាតចំពោះទង្វើខុសឆ្គងរបស់ប្រទេសអាមេរិក និងដាស់តឿនភាគីអាមេរិកឱ្យបញ្ឈប់ការដាក់សម្ពាធដោយគ្មានហេតុផលទៅលើកម្មវិធីAPPរបស់ចិន ក៏ដូចជាបញ្ឈប់ការដាក់កំហិតទៅលើការប្រើប្រាស់ជាប្រក្រតីនូវផលិតផលនិងសេវាកម្មចិននៅក្នុងប្រទេសអាមេរិកផងដែរ ៕