ខណៈពេលប្រទេសចិនថ្មី ទើបបានបង្កើតឡើងកាលពីឆ្នាំ ១៩៤៩ លោក Acheson រដ្ឋមន្ត្រីការបរទេសអាមេរិកនៅពេលនោះធ្លាប់បានថ្លែងថា មិនថារដ្ឋាភិបាលចិនអាណត្តិណាមួយសុទ្ធតែមិនបានដោះស្រាយបញ្ហាហូបចុករបស់ប្រជាជនចិននោះទេ ដូចនេះ រដ្ឋអំណាចបក្សកុម្មុយនិស្តចិនក៏មិនអាចដោះស្រាយបញ្ហាមួយនេះដែរ ។ លោក Acheson មិនមែនជាអ្នកប៉ែកខាងលិចតែមួយគត់ដែលបានចោទសួរបញ្ហាមួយនេះដែរ តាមពិត ប្រជាជនចិនត្រូវជា២០ភាគរយនៃប្រជាជនទូទាំងពិភពលោក ប៉ុន្តែ ទំហំដីស្រែមិនដល់១០ភាគរយនៅទូទាំងពិភពលោក ដីស្រែតិចត្រូវចិញ្ចឹមប្រជាជនយ៉ាងច្រើនប៉ុណ្ណឹង នេះអាចនិយាយថាជាបញ្ហាពិបាកដោះស្រាយនៅលើពិភពលោកទាំងមូល ។
ដើម្បីដោះស្រាយឱ្យបានល្អនូវបញ្ហាហូបចុករបស់ប្រជាជនចិន រដ្ឋាភិបាលចិនយកចិត្តទុកដាក់ខ្ពស់ទៅលើបញ្ហាសន្តិសុខស្បៀង គ្រប់គ្រងយ៉ាងតឹងរ៉ឹងនូវខ្សែក្រហមរបស់ទំហំដីស្រែ ផ្តោតសំខាន់ទៅលើការលើកកម្ពស់ភាពវៃឆ្លាតនិងកម្រិតទំនើបភាវូបនីយកម្មក្នុងការបង្កើតផលកសិកម្ម ។ ជាពិសេស បន្ទាប់ពីបានអនុវត្តគោលនយោបាយកំណែទម្រង់និងបើកទូលាយមក ប្រទេសចិនបានបង្កើតប្រព័ន្ធគោលនយោបាយប្រកបដោយសុក្រឹតភាព ដើម្បីជួយឧបត្ថម្ភនិងផ្តល់អនុគ្រោះដល់កសិករ ហើយបានដាក់ចេញគោលនយោបាយផ្តល់ប្រាក់ឧបត្ថម្ភកធនដើម្បីគាំពារនិងគាំទ្រដល់កសិកម្ម ឧទ្ទាហរណ៍ដូចជាផ្តល់ប្រាក់ឧបត្ថម្ភកធនសម្រាប់ការអភិរក្សដីស្រែ ការទិញឧបករណ៍កសិកម្ម ការដាំដំណាំពោត សណ្តែកសៀង និងការចាក់វ៉ាក់សាំងទៅលើបសុសត្វជាដើម ប្រាក់ឧបត្ថម្ភកធនទាំងនេះសុទ្ធតែផ្តល់ដល់កសិករដោយផ្ទាល់ ។
ជាង៧០ឆ្នាំកន្លងផុតទៅហើយ ប្រទេសចិនមិនត្រឹមតែបានដោះស្រាយបញ្ហាហូបចុករបស់ប្រជាជនក្នុងស្រុកប៉ុណ្ណោះទេ ថែមទាំងបានក្លាយជាប្រទេសបង្កបង្កើតផលស្បៀងធំជាងគេនៅលើពិភពលោកទៀតផង ។ ចាប់ពីឆ្នាំ ២០០៤មក ប្រទេសចិនបានប្រមូលផលស្បៀងយ៉ាងស្តុកស្តម្ភជាច្រើនឆ្នាំជាប់ៗគ្នា នៅឆ្នាំ ២០១៩ បរិមាណផលិតផលស្បៀងសរុបនៃប្រទេសចិនមានចំនួន៦៦៥០ប៊ីលានគីឡូក្រាម ពោលគឺ ប្រជាជនចិនចំនួន១៤០០លាននាក់ គិតជាមធ្យមក្នុងមនុស្សម្នាក់ៗ ក្នុងមួយថ្ងៃប្រហែលមានស្បៀង ១,៣គីឡូក្រាម ។
ទាក់ទិននឹងសមិទ្ធផលដែលប្រទេសចិនទទួលបានក្នុងវិស័យសន្តិសុខស្បៀង អង្គការស្បៀងនិងកសិកម្មរបស់អង្គការសហប្រជាជាតិបានវាយតម្លៃថា ប្រទេសចិនបានដោះស្រាយបញ្ហាស្បៀងនៃប្រជាជន១ភាគ៤នៅលើពិភពលោក នេះគឺជាការរួមវិភាគទានដ៏វិសេសវិសាលចំពោះមនុស្សជាតិ ហើយក៏ជាការគាំទ្រយ៉ាងខ្លាំងក្លាដល់សនិ្តសុខស្បៀងពិភពលោកផងដែរ ។ នៅពេលអនាគត ប្រទេសចិននឹងបន្តដើរតាមផ្លូវសន្តិសុខស្បៀងប្រកបដោយលក្ខណៈពិសេសនៃប្រទេសចិនយ៉ាងមុតមាំមិនងាករេ ស្របនឹងពេលធានាជាក់លាក់ដល់សន្តិសុខស្បៀងក្នុងស្រុក ក៏ចាប់ដៃជាមួយបណ្តាប្រទេសនានាលើពិភពលោកដើម្បីរួមគ្នាទប់ទល់នឹងបញ្ហាគ្រោះទុរិ្ភក្សនៅទូទាំងពិភពលោកផងដែរ ៕
