កាលពីថ្ងៃទី ២២ ខែកញ្ញា សេដ្ឋវិទូជាតិនិងអន្តរជាតិបានវវិភាគលើបទពិសោធន៍នៃការអភិវឌ្ឍន៍រយៈពេល ៧០ ឆ្នាំនៃសាធារណរដ្ឋប្រជាមានិតចិនតាមចក្ខុវិស័យជំនាញសេដ្ឋសាស្ត្រ ដោយបានចង្អុលថា ការអភិវឌ្ឍរយៈពេល ៧០ ឆ្នាំនៃសាធារណរដ្ឋប្រជាមានិតចិនបានគិតគូរដល់ «ការអភិវឌ្ឍសេដ្ឋកិច្ចនិងការអភិវឌ្ឍសង្គម» «កំណើនលឿន ភាពឡើងចុះទាប» បទពិសោធទាំងនេះមានតម្លៃនិងគួរសិក្សារៀនសូត្រតាម។
វិទ្យាស្ថានស្រាវជ្រាវទស្សនៈសេដ្ឋកិច្ចនិងការអនុវត្តជាក់ស្តែងចិននៃសកលវិទ្យាល័យ Tsinghua បានបើកធ្វើសិក្ខាសាលាអន្តរជាតិមួយក្រោមប្រធានបទ «បូកសរុបផ្នែកសេដ្ឋសាស្ត្ររយៈពេល ៧០ ឆ្នាំនៃសាធារណរដ្ឋប្រជាមានិតចិន»កាលពីថ្ងៃទី ២២ កញ្ញា ព្រមទាំងបានចេញរបាយការណ៍ក្រោមចំណងជើងដូចគ្នានឹងប្រធានបទនៃសិក្ខាសាលាផងដែរ។
ពេលអញ្ជើញចូលរួមសិក្ខាសាលានេះ លោក Thomas J. Sargent ជ័យលាភីណូបែលផ្នែកសេដ្ឋសាស្ត្រ និងជាសាស្ត្រាចារ្យផ្នែកសេដ្ឋសាស្ត្រនៃសកលវិទ្យាល័យញូវយ៉កបានថ្លែងថា លទ្ធផលជាផ្លែផ្កាផ្នែកសេដ្ឋកិច្ច សុខាភិបាលនិងការអប់រំដែលប្រទេសចិនទទួលបានក្នុង រយៈពេល ៧០ឆ្នាំកន្លងទៅនេះ ធ្វើឱ្យលោកចាប់អារម្មណ៍ក្រៃលែង។ ការអភិវឌ្ឍរបស់ប្រទេសចិនបានបង្ហាញពីសារសំខាន់និងល័ក្ខខ័ណ្ឌផ្តល់ផលប្រយោជន៍ដល់គ្នានៃការធ្វើពាណិជ្ជកម្មសេរី។ លោកបានចង្អុលបង្ហាញផងដែរថា គោលនយោបាយពាណិជ្ជកម្មដែលរដ្ឋាភិបាលអាមេរិកកំពុងអនុវត្តបច្ចុប្បន្ននេះកំពុងបំផ្លាញផលប្រយោជន៍ជាតិអាមេរិក៕