ពេលផ្តល់បទសម្ភាសន៍ជាមួយអ្នកសារព័ត៌មានចិននិងអន្តរជាតិនៅក្រុងគែរ ប្រទេសអេហ្ស៊ីបកាលពីថ្ងៃទី ២២ ខែមេសា លោក XieXiaoyan ប្រេសិតពិសេសរបស់រដ្ឋាភិបាលចិនទទួលបន្ទុកបញ្ហាស៊ីរីដែលកំពុងបំពេញទស្សនកិច្ចនៅប្រទេសអេហ្ស៊ីបបានបញ្ជាក់ថា បច្ចុប្បន្ននេះ ភាគីពាក់ព័ន្ធនានាគួរតែចាត់ប្រតិបត្តិការដើម្បីបន្ធូរបន្ថយស្ថានការណ៍តានតឹង មិនមែនចាក់សាំងនៅលើភ្លើងនោះទេ ។
លោក XieXiaoyan បានគូសបញ្ជាក់ថា វិធីនយោបាយជាជម្រើសពិតប្រាកដតែមួយគត់សម្រាប់ដោះស្រាយបញ្ហាស៊ីរី ។ សហគមន៍អន្តរជាតិគួរតែគិតពិចារណាពីតម្រូវការជាចាំបាច់និងគោលបំណងជាមូលដ្ឋានរបស់ប្រជាជនស៊ីរី បង្កើនកិច្ចខិតខំប្រឹងដើម្បីសម្រេចបាននូវការផ្សះផ្សានិងការពិភាក្សាគ្នា ក្នុងន័យធ្វើឲ្យភាគីពាក់ព័ន្ធនានាអាចវិលត្រឡប់ទៅរកការសន្ទនានិងការចរចាវិញ ។
លោក XieXiaoyan បានបញ្ជាក់ទៀតថា ប្រទេសចិនប្រឆាំងយ៉ាងដាច់ខាតចំពោះប្រទេសណា អង្គការណាឬបុគ្គលណាដែលប្រើប្រាស់អាវុធគីមីទោះនៅកាលៈទេសៈណាក៏ដោយ ។
