ប្រទេសហ្វីលីពីនច្រានចោលរបាយការណ៍សិទ្ធិមនុស្សរបស់អាមេរិកអំពីប្រតិបត្តិការប្រយុទ្ធប្រឆាំងគ្រឿងញៀនរបស់ខ្លួន

ទាក់ទិននឹងការទិទៀនចំពោះប្រតិបត្តិការប្រយុទ្ធប្រឆាំងគ្រឿងញៀនរបស់ហ្វីលីពីនដែលបានលើកឡើងក្នុងរបាយការណ៍សិទ្ធិមនុស្សនៃបណ្តាប្រទេសប្រចាំឆ្នាំ ២០១៧ ដែលក្រសួងការបរទេសអាមេរិកបានប្រកាសនាថ្ងៃទី ២០ ខែមេសាកន្លងទៅ លោករដ្ឋមន្ត្រីការបរទេសហ្វីលីពីនបានចេញមុខច្រានចោលនៅថ្ងៃទី ២១ ខែមេសាថា ប្រតិបត្តិការប្រយុទ្ធប្រឆាំងគ្រឿងញៀននិងបទឧក្រិដ្ឋមួយចំនួនដែលលោកប្រធានាធិបតីហ្វីលីពីនបានបង្គាប់ឲ្យអនុវត្តចាប់ពីលោកឡើងកាន់អំណាចមក គឺក្នុងគោលបំណងការពារសិទ្ធិមនុស្សរបស់ប្រជាជនហ្វីលីពីន ។

លោករដ្ឋមន្ត្រីការបរទេសហ្វីលីពីនថ្លែងថា ប្រទេសហ្វីលីពីនមិនត្រូវការការបង្គាប់បញ្ជាពីប្រទេសដែលគិតថាខ្លួនកាន់តែយល់ដឹងពីប្រទេសហ្វីលីពីនជាងប្រជាជនហ្វីលីពីនខ្លួនឯងនោះទេ ប្រទេសហ្វីលីពីនមានរបៀបវារៈនិងយន្តការផ្ទៃក្នុងក្នុងការការពារនិងគោរពសិទ្ធិមនុស្ស ។ ព្រមជាមួយនេះ លោកក៏បានរំលឹកឡើងវិញចំពោះសហគមន៍អន្តរជាតិថា ក្នុងប្រតិបត្តិការប្រយុទ្ធប្រឆាំងគ្រឿងញៀនជាបន្តទៀត ប្រទេសហ្វីលីពីននឹងគោរពតាមច្បាប់និងការពារសិទ្ធិមនុស្ស ៕