ថ្ងៃទី២០ខែមេសា ពេលឆ្លើយសំណួរក្នុងសន្និសីទកាសែតជាប្រចាំ លោកស្រីហួឈុនអ៊ីងអ្នកនាំពាក្យក្រសួងការបរទេសចិនបានថ្លែងថា ទាក់ទិននឹងបញ្ហាជម្លោះពាណិជ្ជកម្មរវាងចិននិងអាមេរិក ភាគីចិនសម្គាល់ថា ជាការពិតណាស់ បញ្ហាអតុល្យភាពខាងពាណិជ្ជកម្មរវាងចិននិងអាមេរិកវាត្រូវតេដោះស្រាយ ក៏ប៉ុន្តែមិនអាចរកមូលហេតុខុស នោះទេ ហើយកាន់តែមិនអាចប្រើវិធីសាស្រ្តខុសផងដែរ មានតែការបើកទូលាយនិងធ្វើកិច្ចសហប្រតិបត្តិការទើបអាចដើរតាមផ្លូវកាន់តែទូលំទូលាយបាន។
នាពេលកន្លងទៅនេះ លោកលីសៀនឡុង នាយករដ្ឋមន្រ្តីសិង្ហបុរីបានចុះផ្សាយអត្ថបទមានដាក់ឈ្មោះអ្នកនិពន្ធមួយលើសារព័ត៌មានវ៉ាស៊ីនតោនប៉ុស្តិ៍ថា ការយកពន្ធគយដោយឯកតោភាគីមិនមែនជាវិធីត្រឹមត្រូវសម្រាប់ដោះស្រាយបញ្ហាទេ វាមុខជានឹងប៉ះពាល់យ៉ាងខ្លាំងដល់ប្រព័ន្ធពហុភាគីដែលឈរលើមូលដ្ឋាននៃច្បាប់កំណត់ជាមិនខាន។ ក្រៅពីនេះ លោកស្រីLagadeអគ្គនាយកនៃអង្គកាមូលនិធិរូបិយវត្ថុអន្តរជាតិក៏បានដាស់តឿនប្រទេសនានាឲ្យបោះបង់ចោលការគាំពារនិយមខាងពាណិជ្ជកម្មផងដែរ។
ទាក់ទិននឹងការបង្ហាញឥរិយាបថដូចខាងលើ លោកស្រីហួឈុនអ៊ីងក៏បានថ្លែងថា ប្រវត្តិសាស្ត្របានបង្ហាញម្តងហើយម្តងទៀតថា ការបិទទ្វារនឹងដើរចូលផ្លូវទាល់ច្រកនៅទីចុងបំផុត មានតែការបើកទូលាយនិងកិច្ចសហប្រតិបត្តិការទើបអាចដើរតាមផ្លូវកាន់តែទូលំទូលាយបាន។ បញ្ហាជម្លោះពាណិជ្ជកម្មរវាងចិននិងអាមេរិក គឺជាសង្គ្រាមរវាងពហុភាគីនិយមនិងឯកតោភាគីនិយម រវាងពាណិជ្ជកម្មសេរីទូទាំងពិភពលោកនិងការគាំពារនិយម។ សហគមន៍អន្តរជាតិត្រូវតែរួមគ្នាគាំពារប្រព័ន្ធពាណិជ្ជកម្មពហុភាគីដែលឈរលើមូលដ្ឋាននៃពាណិជ្ជកម្មសេរី រួមគ្នាខិតខំប្រឹងប្រែងដើម្បីជំរុញការបន្តងើបឡើង នៃសេដ្ឋកិច្ចពិភពលោកនិងពាណិជ្ជកម្មអន្តរជាតិ។
