នាពេលកន្លងទៅថ្មីៗនេះ អគ្គនាយកដ្ឋានជាតិអភិវឌ្ឍន៍និងសហប្រតិបតិ្តការអន្តរជាតិនៃប្រទេសចិនត្រូវបានបង្កើតឡើងជាផ្លូវការ ។ ថ្ងៃទី ១៩ ខែមេសា លោកស្រី Hua Chunying អ្នកនាំពាក្យក្រសួងការបរទេសចិនបានថ្លែងនៅក្រុងប៉េកាំងថា ប្រទេសចិននឹងបន្តប្រកាន់ខ្ជាប់ទស្សនៈផលប្រយោជន៍ដ៏ត្រឹមត្រូវនិងទស្សនៈមេត្រីភាពនិងស្មោះត្រង់យ៉ាងពិតប្រាកដតទៅទៀត ដើម្បីជំរុញការបង្រួញគម្លាតរវាងប្រទេសអភិវឌ្ឍន៍និងប្រទេសកំពុងអភិវឌ្ឍន៍ ក៏ដូចជាជំរុញការបង្កើតសហគមន៍រួមវាសនាតែមួយរបស់មនុស្សជាតិផងដែរ ។
ក្នុងសនិ្នសីទសារព័ត៌មានជាប្រចាំដែលបើកធ្វើនៅថ្ងៃដដែល លោកស្រី Hua Chunying បានលើកឡើងថា ការបង្កើតអគ្គនាយកដ្ឋានជាតិអភិវឌ្ឍន៍និងសហប្រតិបតិ្តការអន្តរជាតិ គឺជាសេចកី្តសម្រេចចិត្តសំខាន់របស់មជ្ឈិមបក្សកុម្មុយនិស្តចិនដែលមានលោក ស៊ីជីនភីងជាប្រមុខស្នូលដែលបានគិតពិចារណាដល់ស្ថានការណ៍ជាទូទៅនៃបុព្វហេតុអភិវឌ្ឍន៍របស់បក្សនិងរដ្ឋ គឺជាវិធានការសំខាន់សម្រាប់គាំពារសន្តិភាពពិភពលោក ក៏ដូចជាជំរុញការអភិវឌ្ឍជាមួយគ្នាផងដែរ ពោលគឺប្រកបដោយអត្ថន័យសំខាន់និងវែងឆ្ងាយក្នុងការជំរុញការបង្កើតរចនាសម័្ពន្ធទូទៅខាងវិស័យកិច្ចការទូតរបស់រដ្ឋ និងជំរុញកិច្ចសហប្រតិបតិ្តការអន្តរជាតិក្នុងក្របខ័ណ្ឌគំនិតផ្តួចផ្តើម "ខ្សែក្រវាត់មួយនិងផ្លូវមួយ"ផងដែរ ៕