ថ្ងៃទី ១៥ ខែមេសា នៅក្រុងតូក្យូ រាជធានីជប៉ុន លោក Zhong Shan រដ្ឋមន្ត្រីក្រសួងពាណិជ្ជកម្មចិនបានជួបពិភាក្សាការងារជាមួយលោក Sekou Hiroshige រដ្ឋមន្ត្រីក្រសួងសេដ្ឋកិច្ចនិងឧស្សាហកម្មនៃប្រទេសជប៉ុន ។
ក្នុងកិច្ចជំនួប លោក Zhong Shan បានលើកឡើងនូវសំណើ៦ចំណុចសម្រាប់ជំរុញកិច្ចសហប្រតិបតិ្តការលើវិស័យពាណិជ្ជកម្មនិងការបណ្តាក់ទុនរវាងចិននិងជប៉ុនឲ្យមានភាពកាន់តែស៊ីជម្រៅ ។ ទីមួយ សកម្មអនុវត្តគំនិតឯកភាពសំខាន់ៗរបស់ថ្នាក់ដឹកនាំនៃប្រទេសទាំងពីរស្តីពីកិច្ចសហប្រតិបតិ្តការរវាងចិននិងជប៉ុនក្នុងទីផ្សារទីបីក្នុងក្របខ័ណ្ឌ "ខ្សែក្រវាត់មួយនិងផ្លូវមួយ" ទីពីរ រួមសហការជាមួយគ្នាដើម្បីគាំពារប្រព័ន្ធពាណិជ្ជកម្មពហុភាគីតាមរយៈប្រតិបតិ្តជាក់ស្តែង ប្រឆាំងការគាំពារពាណិជ្ជកម្មនិយមយ៉ាងដាច់ខាត ទីបី បង្កើនកិច្ចសហប្រតិបតិ្តការរវាងភាគីទាំងពីរលើវិស័យផលិតកម្មបច្ចេកវិទ្យាខ្ពស់និងការច្នៃប្រឌិតថ្មី ទីបួនគឺ អញ្ជើញភាគីជប៉ុនចូលរួមពិព័រណ៍នាំចូលចិនអន្តរជាតិ ទីប្រាំ បង្កើនកិច្ចសហប្រតិបតិ្តការរវាងភាគីទាំងពីរលើវិស័យពាណិជ្ជកម្មសេវាកម្ម ទីប្រាំមួយ ពន្លឿនការជំរុញការចរចាអំពីតំបន់ពាណិជ្ជកម្មសេរីរបស់ចិន ជប៉ុននិងកូរ៉េខាងត្បូង ធ្វើការខិតខំប្រឹងប្រែងដើម្បីឈានដល់កិច្ចព្រមព្រៀង RCEP ក្នុងពេលឆាប់ៗ ៕