មហាមីទីញអបអរសាទរខេត្តហៃណានបង្កើតខេត្តនិងកសាងតំបន់ពិសេសសេដ្ឋកិច្ចគម្រប់ ៣០ ឆ្នាំបានប្រារព្ធធ្វើនៅខេត្តហៃណានកាលពីថ្ងៃទី ១៣ ខែមេសា។លោកស៊ីជីនភីង អគ្គលេខាធិការមជ្ឈិមបក្សកុម្មុយនិស្តចិន ប្រធានរដ្ឋចិននិងជាប្រធានគណៈកម្មាធិការយោធាមជ្ឈិមចិនបានអញ្ជើញចូលរួមមហាមីទីញព្រមទាំងថ្លែងសុន្ទរកថាដ៏មានអត្ថន័យសំខាន់។លោកបានសង្គត់ធ្ងន់ថា ក្នុងដំណើរការដណ្តើមជ័យជំនះនូវកិច្ចកសាងសង្គមដែលប្រជាជនប្រកបដោយជីវិភាពធូរធាបង្គួរដោយគ្រប់ជ្រុងជ្រោយដើម្បីសម្រេចភាពជោគជ័យដ៏មហិមានៃសង្គមនិយមលក្ខណៈពិសេសចិនក្នុងយុគសម័យថ្មីតំបន់ពិសេសសេដ្ឋកិច្ចមិនគ្រាន់តែត្រូវបន្តកសាងនោះទេ គឺត្រូវបន្ថែមកម្លាំងខិតខំឲ្យកិច្ចកសាងនេះកាន់តែល្អមានកម្រិតកាន់តែខ្ពស់ទៀត។
លោកស៊ីជីនភីង បានលើកឡើងក្នុងសុន្ទរកថាកាលពីថ្ងៃទី១៣ ខែមេសាថា ខេត្តហៃណានប្រកបដោយអទិភាពពិសេសដើម្បីក្លាយទៅជាតំបន់ពិសោធន៏សម្រាប់កំណែទម្រង់និងបើកទូលាយនៃប្រទេសចិន។ខេត្តហៃណានត្រូវតែប្រកាន់ខ្ជាប់នូវការបើកទូលាយជាចម្បង អនុវត្តនូវយុទ្ធសាស្រ្តបើកទូលាយកាន់តែវិជ្ជមាននិងដោយម្ចាស់ការ ហើយពន្លឿនការបង្កើតប្រព័ន្ធសេដ្ឋកិច្ចថ្មីបែបបើកទូលាយដើម្បីជំរុញឲ្យកកើតទៅជាស្ថានការណ៍ថ្មីនៃការបើកទូលាយគ្រប់ជ្រុងជ្រោយទៀតផង។
លោកស៊ីជីនភីង បានថែ្លងថា យើងស្វាគមន៍វិនិយោគិនដែលមកពីពិភពលោកទាំងមូលទៅវិនិយោគនិងបង្កើតអាជីវកម្មនៅខេត្តហៃណាន ហើយសកម្មចូលរួមក្នុងការសាងសង់កំពង់ផែពាណិជ្ជកម្មសេរីនៅខេត្តហៃណានដើម្បីរួមគ្នាចែករំលែកនូវឱកាសនៃការអភិវឌ្ឍប្រទេសចិននិងរួមគ្នាចែករំលែកនូវសមិទ្ធផលនៃកំណែទម្រង់និងបើកទូលាយនៃប្រទេសចិនទៀតផង។
លោកស៊ីជីនភីង បានបញ្ជាក់ថា ខេត្តហៃណានត្រូវសកម្មអភិវឌ្ឍឧស្សាហកម្មព័ត៌មានវិទ្យានិងសេដ្ឋកិច្ចឌីជីថលជំនាន់ថ្មី ជំរុញឲ្យមានការរួមបញ្ចូលគ្នាយ៉ាងស៊ីជម្រៅរវាងបណ្តាញអ៊ីធើណែត បណ្តាញចរាចរណ៍ទំនិញ ទន្និន័យធំ ប្រព័ន្ធផ្កាយរណបស្វែងរកគោលដៅនិងភាពឈ្លាសវៃនៃសិប្បកម្មជាមួយនិងសេដ្ឋកិច្ចពិត។ត្រូវលើកកម្ពស់ភាពឈ្លាសវៃនៃបណ្តាញហេដ្ឋារចនាសម្ព័ន្ធនិងបន្ថែមជើងហោះហើរអន្តរជាតិពីខេត្តហៃណានទៅដល់តំបន់ប្រភពភ្ញៀវសំខាន់លើពិភពលោក។ត្រូវអនុវត្តគោលនយោបាយទិញទំនិញរួចពន្ធដែលប្រកបដោយភាពបើកទូលាយនិងងាយស្រួលដោយគ្របដណ្តប់លើភ្ញៀវទាំងអស់ដែលចាកចេញពីកោះ ជំរុញដល់ការអភិវឌ្ឍទេសចរណ៍តំបន់ទាំងមូល។ក្រៅពីនេះ នៅត្រូវបង្កើនកសិកម្មតំបន់ត្រូពិចដែលប្រកបដោយប្រសិទ្ធភាពខ្ពស់និងបង្កើតមូលដ្ឋានកសិកម្មតំបន់ត្រូពិចទំនើបជាតិ។ត្រូវលើកកម្ពស់សមត្ថភាពអភិវឌ្ឍប្រភពធនធានក្នុងមហាសមុទ្រគាំទ្រខេត្តហៃណានក្នុងការបង្កើតវាលគង្វាលសត្វសមុទ្រដ៏ទំនើបនិងបង្កើនការស្រាវជ្រាវបច្ចេកវិទ្យាក្នុងសមុទ្រជម្រៅជ្រៅ។
លោកស៊ីជីនភីង នៅបានថ្លែងទៀតថា គាំទ្រខេត្តហៃណានពិសោធន៍កំណែទម្រង់ផ្នែកគ្រប់គ្រងធនធានមនុស្សអន្តរជាតិ។អនុញ្ញាត្តឲ្យអ្នកបច្ចេកទេសសញ្ជាតិបរទេសនិងមកពីតំបន់ហុងកុង ម៉ាកាវ តៃវ៉ាន់ បំពេញការងារនិងស្នាក់នៅជាស្ថាពរនៅខេត្តហៃណានតាមការកំណត់ អនុញ្ញាត្តឲ្យអ្នកបន្តការសិក្សាបរទេសដ៏ឆ្នើមដែលទទួលបានបរិញ្ញាប័ត្រនិងលើសពីបរិញ្ញាប័ត្រក្នុងសកលវិទ្យាល័យចិនបំពេញការងារឬបង្កើតអាជីវកម្មនៅខេត្តហៃណាន បង្កបង្កើតយន្តការទាក់ទាញធនធានមនុស្សកាន់តែបើកទូលាយដើម្បីធ្វើឲ្យធនធានមនុស្សគ្រប់ប្រភេទអាចបញ្ចេញសមត្ថភាពរបស់ខ្លួននៅខេត្តហៃណាន។
ជាចុងក្រោយ លោកស៊ីជីនភីង បានផ្តែផ្តាំកម្មាភិបាលនិងមហាជនដ៏ច្រើនកុះកររបស់ខេត្តហៃណានថា កម្មាភិបាលនិងមហាជនដ៏ច្រើនកុះកររបស់ខេត្តហៃណានគួរតែមិនបំភ្លេចគោលដៅដើម ចងចាំបេសកកម្ម ខិតខំបង្កើតស្នាដៃថ្មីដែលមិនខកចិត្តយុគសម័យក្នុងដំណើរថ្មីដែលឈានទៅសម្រេចគោលដៅសតវត្សរ៍ចំនួន ២ និងសម្រេចសុបិនចិនដែលធ្វើឲ្យជនជាតិចិនមានភាពរុងរឿងដ៏មហាអស្ចារ្យឡើងវិញ៕
