ទាក់ទិននឹងវិធានការរបស់រដ្ឋាភិបាលសហរដ្ឋអាមេរិកដែលបង្កជាជម្លោះពាណិជ្ជកម្មជាមួយប្រទេសចិននៅពេលថ្មីៗកន្លងទៅនេះ ឥស្សរជនអ្នកវិភាគនៃប្រទេសជាច្រើនបានបញ្ចេញមតិយោបល់របស់ខ្លួនប៉ុន្មានថ្ងៃជាប់ៗថា ទង្វើពាក់ព័ន្ធរបស់រដ្ឋាភិបាលសហរដ្ឋអាមេរិកគឺជាការបង្ហាញពីការគ្មានជំនឿចិត្តលើខ្លួនឯង មានតែប្រកាន់ខ្ជាប់ការចរចាទើបអាចដោះស្រាយវិវាទពាណិជ្ជកម្ម វិធានការពាក់ព័ន្ធរបស់ភាគីអាមេរិកនឹងបំផ្លាញដល់ប្រព័ន្ធពាណិជ្ជកម្មពហុភាគី ។
លោក Kiyoyuki seguchi ប្រធានស្រាវជ្រាវនៃមន្ទីរស្រាវជ្រាវយុទ្ធសាស្ត្រជាសកលនៃក្រុមហ៊ុន Canon របស់ជប៉ុនបានសម្គាល់ថា ទង្វើនៃរដ្ឋាភិបាលសហរដ្ឋអាមេរិកជាការសម្រេចគោលនយោបាយខុសឆ្គង ។ បើមើលក្នុងរយៈកាលខ្លី ការគាំពារនិយមផ្នែកពាណិជ្ជកម្មនឹងបង្កើនសម្ពាធរបស់អ្នកប្រើប្រាស់និងដំឡើងដើមទុនរបស់សហគ្រាស បើមើលក្នុងរយៈកាលមធ្យមនិងយូរ នឹងកាត់បន្ថយកម្លាំងប្រកួតប្រជែងនៃសហគ្រាសសហរដ្ឋអាមេរិក រហូតដល់នាំឲ្យសេដ្ឋកិច្ចធ្លាក់ចុះក្នុងក្របខ័ណ្ឌពិភពលោកទៀតផង ។
អត្ថបទអត្ថាធិប្បាយនៃកាសែត Handelsblatt របស់អាល្លឺម៉ង់សម្គាល់ថា ឆ្លងតាមការអនុវត្តគោលនយោបាយគាំពារនិយម រដ្ឋាភិបាលសហរដ្ឋអាមេរិកគ្រាន់តែអាចរៀនពីចំណេះដឹងមូលដ្ឋានអំពីការធ្វើពាណិជ្ជកម្មជាមួយបរទេសប៉ុណ្ណោះ គឺនៅទីបំផុត ដើមទុនខ្ពស់ដែលបណ្តាលមកពីពន្ធគយនឹងត្រូវរ៉ាប់រងដោយសហគ្រាសនិងអ្នកប្រើប្រាស់របស់សហរដ្ឋអាមេរិក ។
