លោកវ៉ាងឈីសាន អនុប្រធានរដ្ឋចិនជួបពិភាក្សាការងារជាមួយគណៈប្រតិភូអង់គ្លេសដែលទៅចូលរួមកិច្ចសន្ទនារវាងគណបក្សនយោបាយចិននិងអង់គ្លេសលើកទី១០

ថៃ្ងទី១១ ខែមេសា លោកវ៉ាងឈីសាន អនុប្រធានរដ្ឋចិនបានជួបពិភាក្សាការងារជាមួយគណៈប្រតិភូអង់គ្លេសដែលទៅចូលរួមកិច្ចសន្ទនារវាងគណបក្សនយោបាយចិននិងអង់គ្លេសលើកទី១០ដែលដឹកនាំដោយលោក David Lidington ប្រធានខុទ្ទកាល័យនៃទីស្តីការគណៈរដ្ឋមន្រ្តីអង់គ្លេសនៅទីស្តីការរដ្ឋ Zhong Nan Hai ក្រុងប៉េកាំង។

លោកវ៉ាងឈីសានបានថែ្លងថា មេដឹកនាំនៃប្រទេសទាំងពីរបានយកចិត្តទុកដាក់ខ្ពស់ចំពោះការរៀបចំកិច្ចសន្ទនារវាងគណបក្សនយោបាយចិននិងអង់គ្លេស ហើយរំពឹងថា ភាគីទាំងពីរនឹងអាចសម្លឹងមើលទៅអនាគតដោយឈរលើមូលដ្ឋាននៃការយល់ដឹងឲ្យបានជ្រាលជ្រៅអំពីប្រវត្តិសាស្រ្តនិងការពិតរវាងគ្នានិងគ្នាដើម្បីកសាងយុគសម័យមាសនៃទំនាក់ទំនងចិននិងអង់គ្លេសក្នុងយុគសម័យថ្មីនេះ។

ជាការឆ្លើយតប លោក David Lidington បានថែ្លងថា សុន្ទរកថាគន្លឹះរបស់លោកស៊ីជីនភីង ប្រធារដ្ឋចិនដែលថែ្លងនៅក្នុងពិធីបើកវេទិកាអាស៊ីក្រុងប៉អៅគឺជាការលើកទឹកចិត្តមួយ។យើងរំពឹងថា ភាគីទាំងពីរនឹងបន្តជំរុញឲ្យស៊ីជម្រៅនូវការប្រាស្រ័យទាក់ទងគ្នាលើគ្រប់វិស័យដើម្បីធ្វើឱ្យប្រជាជននៃប្រទេសទាំងពីរអាចទទួលបានផលប្រយោជន៍ពីកិច្ចសហប្រតិបត្តិការតទៅទៀត៕